ନୟାଗଡ଼, ୧୧/୪ : ନୟାଗଡ଼ ସିନ୍ଦୁରିଆ ସ୍ଥିତ ଇଦଗାହ ଠାରେ ଜିଲ୍ଲାସ୍ତରୀୟ ଇସଲାମ ଧର୍ମାବଲମ୍ବୀଙ୍କ ସବୁଠାରୁ ବଡ଼ ପର୍ବ ଇଦୁଲ୍ ଫିତର୍ ପାଳିତ ହୋଇଯାଇଛି। ମଉଲାନା ଜଲାଲୁଦ୍ଦି ଖାଁ ମିଫତାହୀଙ୍କ ଇମାମତଙ୍କ ନେତୃତ୍ୱରେ ପୂର୍ବାହ୍ନ ୯ଟାରେ ପାଳନ ହୋଇଯାଇଛି। ସିନ୍ଦୁରିଆ ତଥା ଜିଲ୍ଲାର ହଜାର ହଜାର ଶ୍ରଦ୍ଧାଳୁ ସ୍ଥାନୀୟ ଇଦଗାହ୍ ଠାରେ ଏକତ୍ରିତ ହୋଇ ଇଦ୍ ନମାଜ ପଢ଼ିଥିଲେ। ଆଜିର ସମାରୋହରେ ଅନେକ ହିନ୍ଦୁଭାଇ ତଥା ଅନ୍ୟ ଧର୍ମାବଲମ୍ବୀ ଅଧିବାସୀ ଇଦଗାହ୍ ଠାରେ ଏକତ୍ରିତ ହୋଇ ମୁସଲିମ ଭାଇମାନଙ୍କୁ ଶୁଭେଚ୍ଛା ଜଣାଇଥିଲେ।

ନୟାଗଡର ବିଧାୟକ ଡ. ଅରୁଣ କୁମାର ସାହୁ, ନୟାଗଡ ପଞ୍ଚାୟତ ସମିତି ଅଧ୍ୟକ୍ଷ କିଶୋର ସାହୁ ଓ ସମାଜସେବୀ ଶ୍ରୀକାନ୍ତ ଖଟେଇ ପ୍ରମୁଖ ସାମୁହିକ ନମାଜ ପାଠରେ ସାମିଲ ହୋଇ ସଭିଙ୍କୁ ଅଭିନନ୍ଦନ ଜଣାଇଥିଲେ। ଇସଲାମିକ କ୍ୟାଲେଣ୍ଡର ବର୍ଷର ରମଜାନ ମାସ ହେଉଛି ପବିତ୍ର ମାସ। ଏହି ମାସର ଆରମ୍ଭରେ ଚନ୍ଦ୍ର ଦର୍ଶନ କରି ମୁସଲିମ ଭାଇ ଭଉଣୀମାନେ ରୋଜା ତଥା ଉପବାସ ରଖନ୍ତି। ରାତିରେ ସାମୁହିକ ତରାୱୀ ନମାଜ ପାଠ କରାଯାଏ। ମାସ ତମାମ ପୁଣ୍ୟ ଅର୍ଜନ କରିବା ସହିତ ଅସହାୟ ମାନଙ୍କୁ ଜାତି, ଧର୍ମ, ଓ ବର୍ଣ୍ଣ ନିର୍ବିଶେଷରେ ଦାନ ଧର୍ମ କରନ୍ତି। ରମଜାନ ମାସ ଶେଷ ଦିନର ସନ୍ଧ୍ୟାରେ ଚନ୍ଦ୍ର ଦର୍ଶନ ପରେ ମାସବ୍ୟାପି ରୋଜା ବା ଉପବାସ ଭଙ୍ଗ କରାଯାଇ ତାପର ଦିନ ଇଦ୍ ପର୍ବ ପାଳନ କରାଯାଏ। ଆଜିର ଇଦ୍ ନମାଜ ଅବସରରେ ସମଗ୍ର ବିଶ୍ୱରେ ଶାନ୍ତି, ମୈତ୍ରୀ, ଭାଇଚାରା ଓ ସଦଭାବନା ପାଇଁ ପ୍ରାର୍ଥନା କରାଯାଇଥିଲା । ନମାଜ ପାଠ ଶେଷରେ ମୁସଲିମମାନେ ପରସ୍ପରକୁ ଆଲିଙ୍ଗନ ସହିତ କରମର୍ଦନ କରି ଶୁଭେଚ୍ଛା ଜଣାଇଥାନ୍ତି।