ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ଗିରଫ କରାଯିବା ପରେ ଏବେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଆଉ ଜଣେ ଆପ୍ ବିଧାୟକଙ୍କ ଘରେ ଚଢ଼ାଉ କରିଛି । ଶନିବାର ସକାଳେ ଇଡି ଟିମ୍ ଦିଲ୍ଲୀର ମାଟିୟାଲ ଅଞ୍ଚଳରେ ଥିବା ବିଧାୟକ ଗୁଲାବ ସିଂହ ଯାଦବଙ୍କ ଘରେ ପହଞ୍ଚିଛି । ନ୍ୟୁଜ ଏଜେନ୍ସି ଏଏନଆଇ ଅନୁସାରେ, ଇଡି ଅଧିକାରୀ ବିଧାୟକଙ୍କ ଘରେ ଛାନଭିନ କରିଛନ୍ତି । ତେବେ କେଉଁ ଅଭିଯୋଗ ଆଧାରରେ ତାଙ୍କ ଘରେ ଇଡି ରେଡ୍ କରିଛି ତାହା ସ୍ପଷ୍ଟ ଭାବେ ଜଣାପଡି ନାହିଁ।
ସେପଟେ ଏହାକୁ ନେଇ ଆମ୍ ଆଦମୀ ପାର୍ଟି ବିରୋଧ କରିଛି । ଇଡିର ଏହି କାର୍ଯ୍ୟାନୁଷ୍ଠାନକୁ ନେଇ ଦଳ ପ୍ରଶ୍ନ ଉଠାଇଛି । କେନ୍ଦ୍ର ସରକାରଙ୍କ ଇସାରାରେ ଇଡି କାମ କରୁଥିବା ସ୍ପଷ୍ଟ ହୋଇଯାଇଛି ବୋଲି ଆପ୍ କହିଛି । ଯେପରି କୌଣସି ବି ନେତା କେନ୍ଦ୍ର ସରକାରଙ୍କ ବିରୋଧରେ ସ୍ୱର ନଉଠାଇ ପାରିବେ ସେଥିପାଇଁ ଜାଣିଶୁଣି ଇଡିକୁ ବ୍ୟବହାର କରାଯାଉଛି ବୋଲି ଆମ ଆଦମୀ ପାର୍ଟି ଅଭିଯୋଗ କରିଛି ।
ଜୋର ଜବରଦସ୍ତ ବଟି ଆଦାୟ କରିବା ମାମଲାରେ ଆପ୍ ବିଧାୟକ ଗୁଲାବ ସିଂହ ଯାଦବଙ୍କୁ ୨୦୧୬ରେ ଦିଲ୍ଲୀ ପୋଲିସ ଗିରଫ କରିଥିଲା । ଦୁଇ ଜଣ ପ୍ରମୋଟର ଡିଲରଙ୍କ ଅଭିଯୋଗ ପରେ ଦିଲ୍ଲୀ ପୋଲିସ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା ।
ସୂଚନାଯୋଗ୍ୟ, ଅରବିନ୍ଦ କେଜ୍ରିଓ୍ବାଲଙ୍କ ସମର୍ଥନରେ ଗୁଲାବ ସିଂହ ଏକ ପୋଷ୍ଟ କରିଥିଲେ । ସେ ଏକ୍ସରେ ଲେଖିଥିଲେ ଯେ, ‘ନରେନ୍ଦ୍ର ମୋଦିଙ୍କ ପାଇଁ ଜଣେ ହିଁ କାଳ ଅଛନ୍ତି । ଆଉ ସେ ହେଉଛନ୍ତି ଅରବିନ୍ଦ କେଜ୍ରିଓ୍ବାଲ ।’
