ନୂଆଦିଲ୍ଲୀ,୯।୧୧:  ପ୍ରଶ୍ନ ବଦଳରେ ଟଙ୍କା ନେଇଥିବା ଅଭିଯୋଗରେ ଏଥିକ୍ସ କମିଟି ଗୁରୁବାର ତୃଣମୂଳ କଂଗ୍ରେସ (ଟିଏମସି) ସାଂସଦ ମହୁଆ ମୋଇତ୍ରାଙ୍କ ବିରୋଧରେ ଏକ ରିପୋର୍ଟ ଆଡପ୍ଟ କରିଛନ୍ତି। ଏହି ରିପୋର୍ଟରେ ମହୁଆଙ୍କୁ ଲୋକସଭାରୁ ବହିଷ୍କାର କରିବାକୁ ସୁପାରିଶ କରାଯାଇଛି। ବିଜେପି ସାଂସଦ ବିନୋଦ କୁମାର ସୋନକରଙ୍କ ଅଧ୍ୟକ୍ଷତାରେ ଥିବା ଆଚାର କମିଟି(ଏଥିକ୍ସ କମିଟି) ର ଗୁରୁବାର ବୈଠକ ହୋଇଛି। ଏହି ବୈଠକରେ ରିପୋର୍ଟ ଗ୍ରହଣ କରାଯାଇଛି। ଏହା ପକ୍ଷରେ ୬ସଦସ୍ୟ ଓ ବିରୋଧରେ ୪ ସଦସ୍ୟ ଥିଲେ। ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ଅମରିନ୍ଦର ସିଂହଙ୍କ ପତ୍ନୀ ଓ କଂଗ୍ରେସ ସାଂସଦ ପରିଣିତି କୌର ରିପୋର୍ଟକୁ ସମର୍ଥନ କରି ଭୋଟ ଦେଇଛନ୍ତି। ଅମରିନ୍ଦର ସିଂହ ଏବେ କଂଗ୍ରେସରେ ନାହାନ୍ତି।

ଉଲ୍ଲେଖନୀୟ ଯେ, କମିଟିରେ ୧୫ ସଦସ୍ୟ ଅଛନ୍ତି। ଏଥିରେ ବିଜେପିର ୭, କଂଗ୍ରେସର ତିନି ଓ ବିଏସପି, ଶିବସେନା, ଓ୍ବାଇଏସ୍‌ଆର କଂଗ୍ରେସ ପାର୍ଟି, ମାର୍କ୍ସବାଦୀ କମ୍ୟୁନିଷ୍ଟ ପାର୍ଟି(ମାକପା) ଓ ଜନତା ଦଳ (ୟୁନାଇଟେଡ୍)ର ଜଣେ ଜଣେ ସଦସ୍ୟ ରହିଛନ୍ତି। 

ମୋଇତ୍ରାଙ୍କ ଉପରେ ଅଭିଯୋଗ ଆଣିଥିବା ବିଜେପି ସାଂସଦ ନିଶିକାନ୍ତ ଦୁବେ ପରିଣିତି କୌରଙ୍କୁ ଧନ୍ୟବାଦ ଜଣାଇଛନ୍ତି। ସେ କହିଛନ୍ତି, ପଞ୍ଜାବ ସବୁବେଳେ ଭାରତର ଅସ୍ମିତା ଓ ରାଷ୍ଟ୍ରୀୟ ସୁରକ୍ଷା ପାଇଁ ଠିଆ ହୋଇ ରହିଛି। ଆଜି ପୁଣିଥରେ କ୍ୟାପଟେନ୍ ଅମରିନ୍ଦର ସିଂହ ଓ କଂଗ୍ରେସ ପାର୍ଟିର ସାଂସଦ ପରିଣିତ କୌର ରାଷ୍ଟ୍ରୀୟ ସୁରକ୍ଷା ପାଇଁ କୌଣସି ଡିଲ୍‌ କରି ନାହାନ୍ତି। ଭାରତ ପଞ୍ଜାବର ଯୋଦ୍ଧାଙ୍କ ନିକଟରେ କୃତଜ୍ଞ ରହିଛି ଓ ରହିବ।