ଭୁବନେଶ୍ୱର,୨୬/୦୧: ପ୍ରଥମ ବିଶ୍ୱ ଓଡ଼ିଆ ଭାଷା ସମ୍ମିଳନୀକୁ ଆଉ ମାତ୍ର ୮ଦିନ । ଏହି ଅବସରରେ ଓଡ଼ିଆ ଭାଷା ପ୍ରତି ସ୍ୱତନ୍ତ୍ର ରୁଚି ନିମନ୍ତେ ଛାତ୍ରଛାତ୍ରୀଙ୍କ ମଧ୍ୟରେ ଏକ ପଠନ ଆନ୍ଦୋଳନ ସୃଷ୍ଟି କରାଯିବ । ଆରମ୍ଭ ହେବ ‘ଆସ ପଢ଼ିବା’ ଅଭିଯାନ । ଭୁବନେଶ୍ୱର ଜନତା ମଇଦାନରେ ହେବାକୁ ଥିବା ଏହି ସମ୍ମିଳନୀ ସ୍ଥଳୀର ବିଭିନ୍ନ ସ୍ଥାନରେ ଭ୍ରାମ୍ୟମାଣ ପାଠାଗାର ବ୍ୟବସ୍ଥା କରାଯିବ । ଏକ ବସ୍ରେ ଉପାଦେୟ ପୁସ୍ତକମାନ ରଖାଯାଇ ଭ୍ରାମ୍ୟମାଣ ଲାଇବ୍ରେରୀ ପ୍ରତିଷ୍ଠା କରାଯିବ । ସେହିଭଳି ୫ଟି ପାଠାଗାର ଗାଡ଼ି ରହିବ । ଏଥିନିମନ୍ତେ
ଭୁବନେଶ୍ୱରର ବକୁଳ ଫାଉଣ୍ଡେସନ୍ ପକ୍ଷରୁ ବୈଷୟିକ ସହଯୋଗ ପ୍ରଦାନ କରାଯିବ । ସେହିଭଳି ମହାପୁରୁଷଙ୍କ ପଠନ ସମ୍ପର୍କିତ କାଳଜୟୀ ବାର୍ତ୍ତା ଥାଇ ବୁକ୍ମାର୍କ ପ୍ରତ୍ୟେକ ପୁସ୍ତକରେ ରହିବ । ତିନିଦିନ ଧରି ସମ୍ମିଳନୀରେ ଆଗନ୍ତୁକମାନେ ଏହା ପାଖରୁ ଦେଖିବା ସହ ପଢ଼ିବାର ସୁଯୋଗ ପାଇବେ ।
ସେହିଭଳି ପଠନ ଅଭ୍ୟାସ ବୃଦ୍ଧି, ରାଜ୍ୟର ଭାଷା, କଳା, ସଂସ୍କୃତି ଓ ଐତିହ୍ୟ ସମ୍ପର୍କରେ ଛାତ୍ରଛାତ୍ରୀମାନଙ୍କ ମଧ୍ୟରେ ଆଗ୍ରହ ସୃଷ୍ଟି ପାଇଁ ଏକ ପକେଟ୍ ପୁସ୍ତିକା ମଧ୍ୟ ପ୍ରସ୍ତୁତ କରାଯିବ । ଏଥିରେ ମହାପୁରୁଷମାନଙ୍କ ଉପାଦେୟ ବାର୍ତ୍ତା ରହିବ । ପଠନ ଅଭ୍ୟାସକୁ ଆହୁରି ମଜାଦାର କରିବାକୁ ଏକ ଡାଏରୀ ମଧ୍ୟ ରହିବ । ଏକ ପୁସ୍ତକ ପଠନ ବେଳେ କ’ଣ ଶିଖିବାକୁ ମିଳିଲା, କେଉଁ ପାରାଚ୍ଛେଦ ମନକୁ ଛୁଇଁଲା, ପୁସ୍ତକର କେଉଁ ପୃଷ୍ଠା ପର୍ଯ୍ୟନ୍ତ ପଢ଼ିବା ଶେଷ ହାଇଛି ଏସବୁ ସମ୍ପର୍କରେ ଉଲ୍ଲେଖ କରିବାର ସ୍ଥାନ ରହିବ । ସେହିଭଳି ଏକ କ୍ୟାଲେଣ୍ଡର ମଧ୍ୟ ଏହି ଅବସରରେ ଦେଖିବାକୁ ମିଳିବ । ବିଭିନ୍ନ ପ୍ରସିଦ୍ଧ ବ୍ୟକ୍ତିବିଶେଷ ଏବଂ ମହାପୁରୁଷଙ୍କ ଜନ୍ମ ମାସକୁ ଭିତ୍ତିକରି ଏହା ପ୍ରସ୍ତୁତ କରାଯିବ । ଏଥିରେ ତାରିଖ ସହ ଉପାଦେୟ ବାର୍ତ୍ତା ଉଲ୍ଲେଖ ରହିବ । ଉଲ୍ଲେଖଯୋଗ୍ୟ, ଏହି ସମ୍ମିଳନୀ ଫେବ୍ରୁଆରୀ ୩ରୁ ୫ ତାରିଖ ପର୍ଯ୍ୟନ୍ତ ଚାଲିବ ।
