ହରଭଙ୍ଗା ୮।୮ : ରାଜ୍ୟ ରେ ତିନି ଦିନ ଧରି ଲଘୁଚାପ ଜନିତ ଲଗାଣ ବର୍ଷା  ଲାଗି ରହିଛି। ଏଥିସହ ମହାନଦୀ ର ଉପର ମୁଣ୍ଡ ରେ ମଧ୍ୟ ଲଗାଣ ବର୍ଷା ହୋଇଥିବାରୁ ମହାନଦୀ ରେ ବନ୍ୟା ଜଳ ଆସି ବହୁ ଚାଷ ଜମି ଜଳ ମଗ୍ନ ହୋଇଛି।ସେହିପରି ବୌଦ୍ଧ -ହରଭଙ୍ଗା ଜଗନ୍ନାଥ ସଡ଼କ ର ସାକୁସିଙ୍ଗା ନାଳ ଉପରେ ବନ୍ୟା ଜଳ ପ୍ରବାହିତ ହେଉଥିବାରୁ ଯୋଗାଯୋଗ ବିଛିନ୍ନ ହୋଇ ପଡ଼ିଛି। ବିଶେଷ ଭାବେ ଚାଷ ଜମି ଗୁଡ଼ିକ ଜଳ ମଗ୍ନ ହୋଇଥିବା ଯୋଗୁଁ ଧାନ ଫସଲ କ୍ଷତିଗ୍ରସ୍ତ ହୋଇଥିବା ଜଣା ପଡ଼ିଛି। 

ଏହି ବନ୍ୟା ରେ ହରଭଙ୍ଗା, କୁଡାସିଙ୍ଗା, ବୁକେସିଙ୍ଗା, ପାଣିଘରା, ଧଳପୁର, ଖଣ୍ଡିଧଳପୁର, କୁମାରୀ, ଅତଳସରା ଆଦି ଅଞ୍ଚଳ ର ୩୦ ରୁ ଉର୍ଦ୍ଧ ଗ୍ରାମର ଏକର ଏକର ଚାଷ ଜମି ଜଳ ମଗ୍ନ ହୋଇଛି। ବନ୍ୟା ଜଳ ଆସି ମାରଡ଼ା ଗ୍ରାମ ଟି ଜଳବନ୍ଦୀ ଅବସ୍ଥା ରେ ଅଛି । ଗ୍ରାମ ଦେଇ ପ୍ରବାହିତ ହୋଇଥିବା ଉଦଣ୍ଡି ନାଳରେ ବନ୍ୟା ଜଳ ପାଞ୍ଚଫୁଟ ଉପରେ ପ୍ରବାହିତ ହେଉଥିବାରୁ ମାରଡ଼ା ଗ୍ରାମଟି ସମ୍ପୂର୍ଣ ବାହ୍ୟ ଜଗତରୁ ବିଛିନ୍ନ ହୋଇଥିବା ମଧ୍ୟ ସୂଚନା ମିଳିଛି। ତେଣୁ ଜିଲ୍ଲା ପ୍ରଶାସନ ସ୍ୱତନ୍ତ୍ର ଦୃଷ୍ଟି ଦେବାକୁ ସାଧାରଣ ରେ ଦାବୀ ହେଉଛି।