ଭୁବନେଶ୍ୱର, ୨୫/୦୫ : ଶନିବାର ମତଦାନ ପାଇଁ ଭଲ ପାଗ ରହିଛି । ଭୋଟରଙ୍କୁ ଖରା ବା ତାତି ଆଦୌ ବାଧିବନି । ଅପେକ୍ଷାକୃତ ଥଣ୍ଡା ପାଗ ରହିଛି । ଭୁବନେଶ୍ୱର, ପୁରୀ, କଟକ ଓ ଢେଙ୍କାନାଳ ସମେତ ଉପକୂଳ ଓଡ଼ିଶାର ଅଧିକାଂଶ ସ୍ଥାନରେ ତାତି ୩୫ ଡିଗ୍ରୀ ସେଲସିୟସ୍ ଟପିବନି । ସମ୍ବଲପୁର ଓ କେନ୍ଦୁଝରରେ ବି ତାତି ୩୭ ଡିଗ୍ରୀ ରହିବ । ଏମିତି ଆକଳନ କରିଛି ପାଣିପାଗ ବିଭାଗ ।
ଶନିବାର ଭୁବନେଶ୍ୱର, ପୁରୀ, କଟକ ଓ ଢେଙ୍କାନାଳ, ସମ୍ବଲପୁର ଓ କେନ୍ଦୁଝରରେ ତୃତୀୟ ପର୍ଯ୍ୟାୟ ନିର୍ବାଚନ ଚାଲିଛି । ତାପମାତ୍ରା କମ୍ ରହିବା ଯୋଗୁ ଭୋଟ୍ ଦେବାକୁ ଯାଉଥିବା ଲୋକଙ୍କୁ ବାଧିବନି । ଭୁବନେଶ୍ୱରରେ ତାତି ୩୪ ଡିଗ୍ରୀ ରହିବ । ପୁରୀରେ ୩୪, କଟକରେ ୩୪, ଢେଙ୍କାନାଳରେ ୩୬, ସମ୍ବଲପୁର ଓ କେନ୍ଦୁଝରରେ ତାତି ସର୍ବାଧିକ ୩୭ ଡିଗ୍ରୀ ରହିବ ବୋଲି ପାଣିପାଗ ବିଭାଗ ଆକଳନ କରିଛି । ଖୋର୍ଦ୍ଧା, ପୁରୀ, ଢେଙ୍କାନାଳ ଓ କଟକର କିଛି ସ୍ଥାନରେ ବିଜୁଳି ଓ ଘଡ଼ଘଡ଼ି ସହିତ ବର୍ଷା ହୋଇପାରେ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପୂର୍ବାନୁମାନ କରିଛି । ୪୦ରୁ ୫୦କିମି ବେଗରେ ପବନ ବହିପାରେ ।
ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ଡ. ସୁରେନ୍ଦ୍ରନାଥ ପଶୁପାଳକ ପୂର୍ବାନୁମାନ କରି କହିଛନ୍ତି, ୨୫ ତାରିଖ ମତଦାନ ଦିବସ ଦିନ ଭୁବନେଶ୍ୱର, କଟକ ଓ ଢେଙ୍କାନାଳ, ସମ୍ବଲପୁର ଓ କେନ୍ଦୁଝରରେ ସନ୍ଧ୍ୟା ଯାଏ ପାଗ ଶୁଖିଲା ରହିବ । ପୁରୀରେ ଅପରାହ୍ନରେ ଘଡ଼ଘଡ଼ି ସହିତ ବର୍ଷା ହୋଇପାରେ । ଏଠାରେ ତାତି କମିବ । ୨୫ ତାରିଖ ରାତିବେଳା ବିଭିନ୍ନ ସ୍ଥାନରେ ହାଲୁକା ବର୍ଷା ସମ୍ଭାବନା ଅଛି । ୨୬ରେ ଖୋର୍ଦ୍ଧା, ଢେଙ୍କାନାଳ, କଟକ, ଜଗତସିଂହପୁର, ଯାଜପୁର ଓ କେନ୍ଦୁଝରର କିଛି ସ୍ଥାନରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହୋଇପାରେ । କେନ୍ଦ୍ରାପଡ଼ା, ଭଦ୍ରକ ଓ ମୟୂରଭଞ୍ଜର କିଛି ସ୍ଥାନରେ ଭାରୀ ବର୍ଷା ହୋଇପାରେ ।
