ନୂଆଦିଲ୍ଲୀ,୨୦/୦୫: ଗୁଗୁଲ୍ ସିଇଓ ସୁନ୍ଦର ପିଚ୍ଚାଇଙ୍କ ପସନ୍ଦ ହେଉଛି ବେଙ୍ଗାଲୁରୁ ଦୋସା । ଖାଲି ସେତିକି ନୁହେଁ ଦିଲ୍ଲୀର ଛୋଲେ ଭଟୁରେ ଏବଂ ମୁମ୍ବାଇର ପାଓଭାଜି ତାଙ୍କର ଅତି ପ୍ରିୟ । ନିକଟରେ ଏକ ପଡ୍କାଷ୍ଟରେ ପିଚାଇ ନିଜ ପସନ୍ଦର ଭାରତୀୟ ଖାଦ୍ୟ ଏବଂ ଭାରତରେ ଆର୍ଟିଫିସିଆଲ ଇଣ୍ଟେଲିଜେନ୍ସ(ଏଆଇ) ଉପରେ ନିଜ ବିଚାର ବିନିମୟ କରିବା ଅବସରରେ ଏ ସୂଚନା ଦେଇଛନ୍ତି ।
ୟୁଟ୍ୟୁବର ବରୁଣ ମୟାଙ୍କ ସହ ପଡ୍କାଷ୍ଟରେ ପିଚାଇ ଭାରତୀୟ ନିଯୁକ୍ତି ବଜାର ଉପରେ ଏଆଇ ପ୍ରଭାବକୁ ନେଇ ଆଲୋଚନା କରିବା ସହ ଦେଶର ଇଞ୍ଜିନିୟରମାନଙ୍କୁ ବିଭିନ୍ନ ପ୍ରକାର ପରାମର୍ଶ ଦେଇଛନ୍ତି ।
ସୁନ୍ଦର ପିଚାଇ ନିଜ ପ୍ରିୟ ଭାରତୀୟ ଖାଦ୍ୟକୁ ନେଇ କହିଲେ ଯେ, ଯେତେବେଳେ ସେ ବେଙ୍ଗାଲୁରୁରେ ଥାଆନ୍ତି ଦୋସା ତାଙ୍କର ଅତି ପସନ୍ଦ । ଦିଲ୍ଲୀରେ ଥିଲେ ଛୋଲେ ଭଟୁରେ ଏବଂ ମୁମ୍ବାଇରେ ପାଓଭାଜି ତାଙ୍କ ପ୍ରିୟ ଖାଦ୍ୟ । ତେବେ ଆର୍ଟିଫିସିଆଲ ଇଣ୍ଟେଲିଜେନ୍ସ ଉପରେ ଆଲୋଚନା କରିବା ଅବସରରେ ପିଚାଇ ବିଶ୍ୱ ଏଆଇ ପରିଦୃଶ୍ୟରେ ଭାରତର ଭୂମିକା ଉପରେ ଜୋର ଦେଇଛନ୍ତି ।
ତାଙ୍କ କହିବାନୁସାରେ, ଭାରତ ଏହାର ଦକ୍ଷ ଇଞ୍ଜିନିୟରିଂ ପ୍ରତିଭାମାନଙ୍କ ଯୋଗୁ ଏଆଇ ନବସୃଜନରେ ନେତୃତ୍ୱ ନେବାର କ୍ଷମତା ରଖୁଛି । ସୁନ୍ଦର ପିଚାଇ କହିଲେ ଯେ, ଭାରତ ଭଲ ସ୍ଥିତିରେ ଅଛି । ଏହା ଦେଶ ପାଇଁ ଉପଯୁକ୍ତ ମୁହୂର୍ତ୍ତ । ଦେଶରେ ଡେଭେଲପର, ଇଞ୍ଜିନିୟରିଂ ଟ୍ୟାଲେଣ୍ଟ ଭରପୂର ଅଛନ୍ତି । ଏମାନେ ଭାରତ ତଥା ବିଶ୍ୱ ପାଇଁ ଗୁରୁତ୍ୱ ବହନ କରୁଥିବା ଆପ୍ଲିକେଶନ୍ ତିଆରି କରିପାରିବେ ।
ବିଭିନ୍ନ ବିଷୟର ଗଭୀରତାକୁ ବୁଝିଲେ ହିଁ ବାସ୍ତବ ସଫଳତା ମିଳିଥାଏ ବୋଲି ପିଚାଇ କହିଛନ୍ତି । ଏ ଅବସରରେ ସେ ବଲିଉଡ୍ ଫିଲ୍ମ ‘ଥ୍ରୀ ଇଡିୟଟ୍ସ’ର ଉଦାହରଣ ଦେଇ କହିଲେ ଯେ, ଏହି ଚଳଚ୍ଚିତ୍ରରେ ଏକ ଦୃଶ୍ୟ ରହିଛି ଯେଉଁଥିରେ ପ୍ରଫେସର ଅମିର ଖାନଙ୍କୁ ‘ମୋଟର’ର ସଂଜ୍ଞା ପଚାରୁଛନ୍ତି । ଏହି ସଂଜ୍ଞାର ଦୁଇଟି ଭର୍ସନ ରହିଛି । ପ୍ରଥମଟି ହେଉଛି ‘ମୋଟର’ କ’ଣ । ଦ୍ୱିତୀୟଟି ହେଉଛି ବାସ୍ତବରେ ‘ମୋଟର’ କ’ଣ ତାହାକୁ ବୁଝିବା ।
