ନୂଆଦିଲ୍ଲୀ, ୧୨/୦୯ : ଚୀନ୍‌ରେ ଦୁଇ କର୍ମଚାରୀ ବିବାହତ୍ତୋର ସଂପର୍କ ରଖିବା ସହିତ ଅଫିସ୍‌ରେ ପରସ୍ପରକୁ ଖୋଲାଖୋଲି ଭାବେ ଚୁମ୍ବନ ଦେବା ଯୋଗୁ ଚାକିରିରୁ ତଡ଼ା ଖାଇଛନ୍ତି । ସେମାନେ ଏହାପରେ କଂପାନି ବିରୋଧରେ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି । 

ସାଉଥ୍‌ ଚାଇନା ମର୍ଣ୍ଣିଂ ପୋଷ୍ଟ ମୁତାବକ, ଦକ୍ଷିଣପଶ୍ଚିମ ଚୀନ୍‌ର ସିଚୁଆନ୍‌ ପ୍ରୋଭିଏନ୍ସରେ ଥିବା ଏକ ଫାର୍ମାସ୍ୟୁଟିକାଲ୍‌ କଂପାନିରେ ସମାନ ବିଭାଗରେ କାମ କରୁଥିଲେ ଲିଉ ଓ ଚେନ୍‌ । ଲିଉଙ୍କର ପତ୍ନୀ ମାର୍ଚ୍ଚ ୨୦୨୦ରେ ସେମାନଙ୍କର ବିବାହତ୍ତୋର ସଂପର୍କ ନେଇ କଂପାନି କର୍ତ୍ତୁପକ୍ଷଙ୍କ ନିକଟରେ ଅଭିଯୋଗ କରିବାରୁ ସମସ୍ତେ ଏହା ଜାଣିବାକୁ ପାଇଥିଲେ । ଏହା ସତ୍ତ୍ଵେ ସେମାନଙ୍କର ସ୍ୱଭାବରେ କୌଣସି ପରିବର୍ତ୍ତନ ହୋଇନଥିଲା । ସେମାନେ ଅଫିସ୍‌ରେ ପରସ୍ପରକୁ ଚୁମ୍ବନ ଦେଉଥିବା ଅବସ୍ଥାରେ ଧରାପଡି଼ଲେ। ଏହାପରେ କଂପାନିର ଜଣେ କର୍ମଚାରୀଙ୍କର ଚେନ୍‌ଙ୍କ ସହିତ ଏ ନେଇ ଯୁକ୍ତିତର୍କ ହେଲା । ପରଦିନ ୭ ଜଣ କର୍ମଚାରୀ ମିଶି ଜେନେରାଲ୍‌ ମ୍ୟାନେଜରଙ୍କୁ ଲିଖିତ ଭାବେ ଅଭିଯୋଗ କଲେ । ଫଳରେ କଂପାନି ଦୁହିଁଙ୍କୁ ଚାକିରିରୁ ବିଦା କଲା । ଚାକିରିରୁ ବିଦା ହେବା ପରେ ସେମାନେ କୋର୍ଟଙ୍କ ଦ୍ୱାରସ୍ଥ ହୋଇଥିଲେ । ସେଥିରେ ଚେନ୍‌ ୩ ଲକ୍ଷ ଟଙ୍କା କ୍ଷତିପୂରଣ ଦାବି କରିଥିବାବେଳେ ଅପେକ୍ଷାକୃତ ବରିଷ୍ଠ ପଦରେ ଥିବା ଲିଉ ୨୭ ଲକ୍ଷ ଦାବି କରିଥିଲେ । ତେବେ କୋର୍ଟରେ କଂପାନି ପକ୍ଷରୁ ଦର୍ଶାଯାଇଥିଲା ଯେ, ଦୁଇ କର୍ମଚାରୀଙ୍କ ବ୍ୟବହାର ନୈତିକତାର ଉଲ୍ଲଂଘନ କରୁଛି । ଏହା କଂପାନିର ଭାବମୂର୍ତ୍ତିକୁ ପ୍ରଭାବିତ କରୁଥିବାବେଳେ ନକରାତ୍ମକ ପ୍ରଭାବ ମଧ୍ୟ ପକାଇଥିଲା। କୋର୍ଟ ଏହାପରେ ଲିଉ ଓ ଚେନ୍‌ଙ୍କର ଆବେଦନକୁ ଖାରଜ କରିଛନ୍ତି ।