ନୂଆଦିଲ୍ଲୀ,୧୬/୦୯: ଭାରତୀୟ ବାୟୁସେନାକୁ ଆହୁରି ମଜଭୁତ କରିବା  ଲାଗି ପ୍ରତିରକ୍ଷା ମନ୍ତ୍ରଣାଳୟ ୧୨ ସୁଖୋଇ ୩୦ଏମ୍‌କେଆଇ ଯୁଦ୍ଧବିମାନ କ୍ରୟକୁ  ମଞ୍ଜୁରି ଦେଇଛି । ଏହି ସମସ୍ତ ବିମାନକୁ ମେକ୍‌ ଇନ୍‌ ଇଣ୍ଡିଆ ପ୍ରୋଗ୍ରାମରେ  ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍‌ (ଏଚ୍‌ଏଏଲ୍‌) ଦ୍ୱାରା ନିର୍ମାଣ  କରାଯିବ । 

ପ୍ରତିରକ୍ଷା ଅଧିକାରୀଙ୍କ ସୂଚନା  ଅନୁସାରେ, ୧୧ ହଜାର  କୋଟି  ଟଙ୍କାର  ଏହି ଯୋଜନାରେ ବିମାନ ଏବଂ ସମ୍ବନ୍ଧିତ ଅନ୍ୟ  ଉପକରଣ ନିର୍ମାଣ କରାଯିବ । ଭାରତରେ କୌଣସି ଯୁଦ୍ଧବିମାନ ନିର୍ମାଣ ଦୃଷ୍ଟିରୁ  ଏହା ଏକ ବଡ଼ ପଦକ୍ଷେପ ହେବ । ବିମାନରେ ଆବଶ୍ୟକତା ଅନୁସାରେ ବିଭିନ୍ନ  ଉପକରଣ, ଅସ୍ତ୍ରଶସ୍ତ୍ର, ସେନ୍ସର ଆଦି ଖଞ୍ଜାଯିବ । ଏଥିରେ ରହିବାକୁ ଥିବା  ଯନ୍ତ୍ରାଂଶର ପ୍ରାୟ ୬୦% ସ୍ୱଦେଶୀ ହେବ । ଏହି ସୁଖୋଇ ୩୦ଏମ୍‌କେଆଇ ବିମାନ  ଗତ କିଛି ବର୍ଷରେ ଦୁର୍ଘଟଣାର ଶିକାର ହୋଇଥିବା ୧୨ ଯୁଦ୍ଧବିମାନର  ସ୍ଥାନ ନେବ । ଏହା ଏକ ମଲ୍ଟିରୋଲ କମ୍ବାଟ୍‌ ଏୟାରକ୍ରାଫ୍ଟ । ଏହା ଆକାଶ  ମାର୍ଗରୁ ଭୂମି ଏବଂ ଆକାଶରୁ ଆକାଶ ମାର୍ଗକୁ ଗୋଟିଏ ସମୟରେ ଟାର୍ଗେଟ  କରି ଯୁଦ୍ଧ ଲଢ଼ିପାରିବ । ପ୍ରତିରକ୍ଷା ଅଧିଗ୍ରହଣ କାଉନ୍‌ସିଲ (ଡିଏସି) ପ୍ରାୟ  ୪୫ ହଜାର କୋଟି ଟଙ୍କାର ପ୍ରତିରକ୍ଷା ସାମଗ୍ରୀ କିଣା ପ୍ରସ୍ତାବକୁ ମଧ୍ୟ ମଞ୍ଜୁରି ଦେଇଛି । 

ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି, ଡିଏସି ଭାରତୀୟ  ନୌସେନା ପାଇଁ ଆଗାମୀ ପିଢ଼ିର ସର୍ବେକ୍ଷଣ ଜାହାଜ କ୍ରୟ ନିମନ୍ତେ ବି ମଞ୍ଜୁରି  ଦେଇଛି, ଯାହା କି ହାଇଡ୍ରୋଗ୍ରାଫି୍‌ ଅପରେଶନ ପରିଚାଳନାରେ ଦକ୍ଷ ।