ନୂଆଦିଲ୍ଲୀ,୨୯।୧:କେନ୍ଦ୍ର ଗୃହ ମନ୍ତ୍ରଣାଳୟ 'ଷ୍ଟୁଡେଣ୍ଟସ୍ ଇସଲାମିକ୍ ମୁଭମେଣ୍ଟ ଅଫ୍ ଇଣ୍ଡିଆ (ସିମି)' ଉପରେ କଟକଣାକୁ ପାଞ୍ଚ ବର୍ଷ ବଢାଇ ଦେଇଛନ୍ତି। ସୋମବାର  ‘ଏକ୍ସ’ (ଟ୍ବିଟର) ରେ ଏକ ପୋଷ୍ଟ ମାଧ୍ୟମରେ ଏହି ନିଷେଧାଦେଶକୁ ବଢାଇ ଦିଆଯାଇଥିବା ସମ୍ପର୍କିତ ନିର୍ଦେଶ ସମ୍ପର୍କରେ ଗୃହମନ୍ତ୍ରଣାଳୟ ସୂଚନା ଦେଇଛି।

ଗୃହ ମନ୍ତ୍ରଣାଳୟ ଏହି ପୋଷ୍ଟରେ ଲେଖିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆତଙ୍କବାଦ ବିରୋଧରେ ଜିରୋ ଟଲେରାନ୍ସ ଆଭିମୁଖ୍ୟ ଅନୁଯାୟୀ 'ଷ୍ଟୁଡେଣ୍ଟସ୍ ଇସଲାମିକ୍ ମୁଭମେଣ୍ଟ ଅଫ୍ ଇଣ୍ଡିଆ' (ସିମି) କୁ ଆସନ୍ତା ପାଞ୍ଚ ବର୍ଷ ପାଇଁ UAPA ଅଧୀନରେ ଏକ ବେଆଇନ ସଂଗଠନ ଭାବେ ଘୋଷଣା କରାଯାଇଛି। ଶେଷ ଥର ପାଇଁ ୨୦୧୯ ଜାନୁଆରି ୩୧ ତାରିଖରେ ଗେଜେଟ ନୋଟିଫିକେସନ୍ ନଂ ଏସ୍ ଓ ୫୬୪(ଇ) ଜରିଆରେ ସିମି ଉପରେ ପ୍ରତିବନ୍ଧକ ଲଗାଯାଇଥିଲା। ଏହା ବିରୋଧରେ ସିମି ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲା। ତେବେ ସିମି ଉପରେ ଲଗାଯାଇଥିବା ନିଷେଧାଦେଶ ବିରୋଧରେ ହୋଇଥିବା ଆବେଦନର ତୁରନ୍ତ ଶୁଣାଣି କରିବାକୁ କୋର୍ଟ ମନା କରିଦେଇଥିଲେ।

କେନ୍ଦ୍ର ସରକାରଙ୍କ ତରଫରୁ କୁହାଯାଇଛି ଯେ ଭାରତର ସାର୍ବଭୌମତ୍ୱ, ସୁରକ୍ଷା ତଥା ଅଖଣ୍ଡତା ପ୍ରତି ବିପଦ ସୃଷ୍ଟି କରିବା, ଆତଙ୍କବାଦକୁ ପ୍ରୋତ୍ସାହିତ କରିବା, ଶାନ୍ତି ଏବଂ ସାମ୍ପ୍ରଦାୟିକ ସୌହାର୍ଦ୍ଦ୍ୟକୁ ନଷ୍ଟ କରିବାକୁ ସିମି ଚେଷ୍ଟା କରୁଛି। ଗତ ବର୍ଷ କେନ୍ଦ୍ର ସରକାର ସୁପ୍ରିମକୋର୍ଟରେ ଏକ ସତ୍ୟପାଠ ଦଖ କରି ‘ସିମି’ ଉପରେ କଟକଣା ଲାଗୁ କରିଥିଲେ। କେନ୍ଦ୍ର ସରକାରଙ୍କ ପକ୍ଷରୁ ଦାଖଲ କରାଯାଇଥିବା ସତ୍ୟପାଠରେ କୁହାଯାଇଥିଲା ସିମି ଭାରତୀୟ ରାଷ୍ଟ୍ରବାଦ ବିରୋଧରେ ରହିଛି।