ଜଳେଶ୍ଵର,୦୫/୦୮: ପାରିବାରିକ କଳହର କରୁଣ ପରିଣତି । ସ୍ତ୍ରୀକୁ ବାଲଟିରେ ପିଟି ପିଟି ହତ୍ୟା କଲା ସ୍ବାମୀ । ଏଭଳି ଦୃଶ୍ୟ ଦେଖିବାକୁ ମିଳିଛି ବାଲେଶ୍ଵର ଜିଲ୍ଲା ଜଳେଶ୍ଵର ଥାନା ବାଣିଦା ଗ୍ରାମରେ । 

ସୂଚନା ଅନୁଯାୟୀ, ସଞ୍ଜୟ ମହାନ୍ତି ଦୀର୍ଘ ୧୪ ବର୍ଷ ପୂର୍ବରୁ ପଶ୍ଚିମବଙ୍ଗର ଦାନ୍ତନ ଥାନା ଅନ୍ତର୍ଗତ ଜାମଗାଦି ଗ୍ରାମର ନବୀନ ଦାସଙ୍କ ଝିଅ କବିତାଙ୍କୁ ବିବାହ କରିଥିଲେ । ତେବେ ବାହାଘର ପରଠୁ ସ୍ବାମୀ-ସ୍ତ୍ରୀଙ୍କ ମଧ୍ୟରେ ବାରମ୍ବାର ଝଗଡା ଲାଗି ରହୁଥିଲା । ଏନେଇ ବିଭିନ୍ନ ସମୟରେ ପରିବାର ଲୋକେ ବସି ଆପୋଷ ବୁଝାମଣା କରିଥିଲେ । ତେବେ ସୋମବାର ସକାଳେ କୌଣସି କଥାକୁ ନେଇ ସ୍ବାମୀ-ସ୍ତ୍ରୀଙ୍କ ମଧ୍ୟରେ ବଚସା ହୋଇଥିଲା । ଏହି ସମୟରେ ସ୍ବାମୀ ସଞ୍ଜୟ ସ୍ତ୍ରୀ କବିତାଙ୍କୁ ଏକ ବାଲଟିରେ ପିଟି ଥିଲେ । ଫଳରେ କବିତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା । ଏହି କାରଣରୁ ଘଟଣା ସ୍ଥଳରେ ତାଙ୍କର ମୃତ୍ୟୁ  ହୋଇଥିଲା ।ଏ ବିଷୟରେ ସ୍ଥାନୀୟ ଲୋକେ ଜଳେଶ୍ବର ପୋଲିସକୁ ଅବଗତ କରାଇଥିଲେ । ଖବର ପାଇ ଘଟଣା ସ୍ଥଳରେ ପୋଲିସ ପହଞ୍ଚି ସ୍ବାମୀଙ୍କୁ ଥାନାକୁ ଆଣି ଅଟକ ରଖିଛି । ମୃତ ମହିଳାଙ୍କ ବାପ ଘର ଲୋକେ ଏହାକୁ ଏକ ସୁପରିକଳ୍ପିତ ହତ୍ୟାକାଣ୍ତ ବୋଲି ଅଭିଯୋଗ କରିଛନ୍ତି । ଏଥି ସହିତ ଅଭିଯୁକ୍ତ ସ୍ବାମୀଙ୍କ ବିରୁଦ୍ଧରେ ଦୃଢ କାର୍ଯ୍ୟନୁଷ୍ଠାନ ପାଇଁ ଦାବି କରିଛନ୍ତି ।