ନୂଆଦିଲ୍ଲୀ,୧୬।୫; ଟିଏମ୍‌ସି ସୁପ୍ରିମୋ ମମତା ବାନାର୍ଜୀଙ୍କୁ ଲୋକସଭା ନିର୍ବାଚନ ପରେ ଇଣ୍ଡିଆ ବ୍ଲକକୁ ସମର୍ଥନ ଦେବାର ବୟାନ ଉପରେ କଂଗ୍ରେସ ନେତା ଅଧିର ରଞ୍ଜ ଚୌଧୁରୀଙ୍କ ପ୍ରତିକ୍ରିୟା ଆସିଛି। ଅଧିର କହିଛନ୍ତି, ମମତା ବାନାର୍ଜୀଙ୍କ ଉପରେ ମୋର ଭରସା ନାହିଁ। ସେ ଆଗ ମେଣ୍ଟ ଛାଡି ପଳାଇଥିଲେ, ଏତେ ଯେତେବେଳେ ଦେଖି‌ଲେ କଂଗ୍ରେସ କ୍ଷମତାକୁ ଆସୁଛି ଲାଇନ୍ ଲଗାଇବା ଆରମ୍ଭ କରିଦେଲେ। ଅଧିର କହିଛନ୍ତି, ଯଦି ବିଜେପି  ପକ୍ଷ  ଭାରି ରହିଥାନ୍ତା ତେବେ ସେପଟକୁ ‌ସେ ଯାଇଥାନ୍ତେ। ମୋତେ ତାଙ୍କ ଉପରେ ଟିକେ ବି ଭରସା ନାହିଁ, କାରଣ ସେ ମେଣ୍ଟ ଭାଙ୍ଗିଥିଲେ ଓ ଏହାକୁ ସମସ୍ତେ ଦେଖିଛନ୍ତି।’

ସେଭଳି ମମତା ବାନାର୍ଜୀଙ୍କ ବୟାନ ଉପରେ ବିଜେପି ମଧ୍ୟ କଟାକ୍ଷ କରିଛି। ବିଜେପି ନେତା ରବିଶଙ୍କର ପ୍ରସାଦ କହିଛନ୍ତି, ଦିନରେ ସ୍ବପ୍ନ ଦେଖୁଛନ୍ତି, ଦେଖିବାକୁ ଦିଅନ୍ତୁ। ଏବେ ତ ସରକାର ବି ହୋଇନି। ଏବେଠୁ ଆଉଟ ସାଇଟ୍ ଆଉଟ୍ ସାଇଡ୍ କହୁଛନ୍ତି। ସେଭଳି ଜେଡିୟୁ ନେତା ଉମେଶ କୁଶଓ୍ବାହ କହିଛନ୍ତି ଇଣ୍ଡି ଆଲାୟନ୍ସ ହିଁ ନାହିଁ। ତାହା ତ ଶେଷ ହୋଇସାରିଛି। ଧରାତଳରେ କିଛି ନାହିଁ। ନିର୍ବାଚନ ଲଢିବା ପୂର୍ବରୁ ମେଣ୍ଟ ହାରିସାରିଛି। 

ଉଲ୍ଲେଖନୀୟ ଯେ, ନିକଟରେ ମମତା କହିଥିଲେ,ବିଜେପି ଦାବି କରୁଥିଲା ସେ ୪୦୦ ସିଟ୍ ଜିତିବ, କିନ୍ତୁ ଲୋକ କହୁଛନ୍ତି, ଏଭଳି ହେବନି। ପୁରା ଦେଶ ବୁଝିସାରିଛି ବିଜେପି ଚୋରରେ ଭର୍ତ୍ତି ହୋଇ ରହିଥିବା ଦଳ। ଆମେ (ଟିଏମ୍‌ସି) ସରକାର ଗଠନ କରିବା ପାଇଁ ରାଷ୍ଟ୍ରୀୟ ସ୍ତରରେ ବାହାରରୁ ଇଣ୍ଡିଆ ବ୍ଲକର ସମର୍ଥନ କରିବୁ ଓ ସବୁଆଡୁ ତାକୁ ସାହାଯ୍ୟ କରିବୁ।