ଭୁବନେଶ୍ୱର,୧୭/୦୯: ପାକିସ୍ତାନ କି ଆଫଗାନିସ୍ଥାନ ନୁହେଁ । ରାଜଧାନୀ ଭୁବନେଶ୍ୱରର ଜନପଥରେ କିଛି ସଂଖ୍ୟାଲଘୁ ଯୁବକ ତାଲିବାନୀ ଷ୍ଟାଇଲରେ ବେପରୁଆ ଭାବେ ଗାଡ଼ି ଚଳାଇ ଆତଙ୍କ ସୃଷ୍ଟି କରିଥିଲେ । ଗୋଟିଏ କି ଦୁଇଟି ଗାଡ଼ି ନୁହେଁ, ଏକାସାଙ୍ଗରେ ୪ଟା ଗାଡ଼ିରେ ସେମାନେ ରାସ୍ତାରେ ବୁଲି ବୁଲି ପାକିସ୍ତାନ ଜିନ୍ଦାବାଦ ଧ୍ୱନି ଦେଇଥିଲେ । ଟ୍ରାଫିକ୍ ନିୟମକୁ ତ ମାନି ନଥିଲେ, ଓଲଟା ଟ୍ରାଫିକ୍ ପୁଲିସ୍କୁ ଗାଡ଼ି ଚଢ଼ାଇ ମାରି ଦେବାକୁ ଉଦ୍ୟମ ମଧ୍ୟ କରିଥିଲେ । ଆଶ୍ଚର୍ଯ୍ୟର କଥା, ଏ ସମ୍ପର୍କରେ କମିସନରେଟ୍ ପୁଲିସ୍ ସୂଚନା ବି ପାଇ ନଥିଲା । ବେପରୁଆ ଗାଡ଼ି ଚାଳନା ଭିଡିଓ ସୋସିଆଲ୍ ମିଡ଼ିଆରେ ଭାଇରାଲ୍ ହେବା ପରେ ସ୍ପେସାଲ୍ ସ୍କ୍ୱାଡ୍ ତତ୍ପର ହୋଇଥିଲା ଏବଂ ଏହି ଯୁବକମାନଙ୍କୁ ଖୋଜିଥିଲା । ୫ ଜଣଙ୍କୁ ଧରିବା ସହ ୩ଟି ଗାଡ଼ି ଜବତ କରି ଖାରବେଳନଗର ଥାନାକୁ ହସ୍ତାନ୍ତର କରିଛି । ସେମାନଙ୍କୁ ମଙ୍ଗଳବାର କୋର୍ଟ ଚାଲାଣ କରାଯିବ ବୋଲି ପୁଲିସ୍ କହିଛି । ଗିରଫ ୫ ଜଣଙ୍କ ମଧ୍ୟରେ ୪ ଜଣ ନାବାଳକ ଥିବା ପୁଲିସ୍ କହିଛି । ଅନ୍ୟ ୫ ଜଣ ଏକ ଗାଡ଼ିରେ ଫେରାର ହୋଇଯାଇଛନ୍ତି ।
ସୋମବାର ସମୟ ପ୍ରାୟ ସକାଳ ସାଢ଼େ ୯ଟା ହେବ । ୪ଟି ଗାଡ଼ି ଝାରପଡ଼ା ମସଜିଦ୍ ବସ୍ତିରୁ ବାହାରିଥିଲେ । ଗାଡ଼ି ଗୁଡ଼ିକ ହେଲା ଟାଟା ସଫାରୀ(ଓଆର୧୪ଏକ୍ସ୪୭୨୮), କ୍ରେଟା(ଓଡି୦୨ ସିଆର ୦୦୯୨), ଆଇ-୨୦ ଓ ମହେନ୍ଦ୍ର ଏକ୍ସୟୁଭି (ଓଡି୦୨ସିଏମ୍୪୬୧୬) ସେଥିରେ ୧୨ରୁ ୧୪ ଜଣ ଥିଲେ । ସନ୍ ରୁଫ୍ ଓ ଡୋର୍ରେ ମୁଣ୍ଡ ବାହାରକୁ ବାହାର କରି ନିର୍ଦ୍ଦିଷ୍ଟ ପତାକା ଉଡ଼ାଇବା ସହ ପାକିସ୍ତାନ ଜିନ୍ଦାବାଦ ଧ୍ୱନି ଦେଇ ରାସ୍ତାରେ ଆତଙ୍କ ଖେଲାଇଥିଲେ । ଝାରପଡ଼ାରୁ ଏହି ୪ଟି ଗାଡ଼ି ସତ୍ୟନଗର ବିଗ୍ବଜାର ଦେଇ ଜନପଥରେ ପହଞ୍ଚି ବାଣୀବିହାର ଆଡ଼କୁ ଯାଉଥିଲା । ଏମାନଙ୍କ ଆତଙ୍କରେ ରାସ୍ତାରେ ଯାଉଥିବା ଲୋକ ଭୟଭୀତ ହୋଇପଡ଼ିଥିଲେ । ଯଦି କୌଣସି ଗାଡ଼ି ଏମାନଙ୍କ ସାମ୍ନାକୁ ଚାଲି ଆସୁଥିଲା ସେମାନେ ଅଶ୍ଳୀଳ ଭାଷାରେ ଗାଳି ବି କରୁଥିଲେ । ଆଶ୍ଚର୍ଯ୍ୟ କଥା, ଏହି ସଂଖ୍ୟାଲଘୁ ନାବାଳକମାନେ ଅଧିକ ଉତ୍ପାତ କରୁଥିଲେ । ଯଦି କୌଣସି ସ୍ଥାନରେ ଟ୍ରାଫିକ୍ ଜାମ୍ ରହୁଥିଲା ସେମାନେ ଫୁଟ୍ପାଥରେ ଗାଡ଼ି ଚଢ଼ାଇ ଦେଉଥିଲେ । କାହର ଗାଡ଼ି ସ୍ପିଡ୍ ୬୦ ତ’ ପୁଣି କାହାର ୮୦ ଡେଉଁଥିଲା । ଏ ସବୁ ଦେଖି ବାଟରେ ଯାଉଥିବା ଲୋକମାନେ ଭିଡିଓ କରିବା ଛଡ଼ା କିଛି ଉପାୟ ପାଉ ନଥିଲେ ।
ସତ୍ୟନଗର ବିଗ୍ ବଜାର ଛକ ନିକଟରେ ଟ୍ରାଫିକ୍ ପୁଲିସ୍କୁ ଗାଡ଼ି ଚଢ଼ାଇ ମାରି ଦେବାକୁ ଉଦ୍ୟମ କରୁଥିଲେ । ଟ୍ରାଫିକ୍ କର୍ମଚାରୀ ଜଣଙ୍କ ଏ ବିଷୟରେ ସେତେବେଳେ ଭିଏଚ୍ଏଫ୍ରେ କାହାକୁ ନ ଜଣାଇ ଚୁପ୍ ରହିଥିଲେ । ସହିଦନଗର ଆଇଡିବିଆଇ ଛକରୁ ରୂପାଲି ଛକ ମଧ୍ୟରେ ଏମାନେ ତାଣ୍ଡବ ଚଳାଇଥିଲେ । ଅତି ବିପଜ୍ଜନକ ଭାବେ ଗାଡ଼ି ଚଳାଉଥିଲେ । ତା’ପରେ ବାଣୀବିହାର ଓ ରସୁଲଗଡ଼ ଦେଇ ଝାରପଡ଼ା ଯାଇଥିଲେ ।
ସବୁଠାରୁ ଆଶ୍ଚର୍ଯ୍ୟ କଥା ହେଲା, ଚାରିଆଡ଼େ କ୍ୟାମେରା ଲାଗିଛି । ସିସିଟିଭି ଦେଖି ୨୪ ଘଣ୍ଟା ଅନ୍ଲାଇନ୍ରେ ଜରିମାନା କାଟୁଛି ପୁଲିସ୍ । ଏମାନେ ଜନପଥ ଭଳି ଅଞ୍ଚଳରେ ଆତଙ୍କ ଖେଳାଇବା ବେଳେ ପୁଲିସ୍ କିଛି ଟେର ପାଇ ନଥିଲା । ବଡ଼ କଥା ହେଲା, ୧୭ ତାରିଖ ସକାଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭୁବନେଶ୍ୱର ଆସୁଛନ୍ତି । ଜନପଥରେ ଥିବା ହୋଟେଲରେ ବିଭିନ୍ନ ନେତା ମନ୍ତ୍ରୀମାନେ ରହୁଛନ୍ତି । ପୁଲିସ୍ ମଧ୍ୟ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଛି । ୮୧ ପ୍ଲାଟୁନ୍ ପୁଲିସ୍ ଫୋର୍ସ ସହର ଜଗିଛନ୍ତି । ତିନିଦିନ ହେଲା ପୁଲିସ୍ ସୁରକ୍ଷା ବ୍ୟବସ୍ଥାକୁ ତଦାରଖ କରି ଚାଲିଛି । ସୋମବାର ମଧ୍ୟ କାରକେଡ୍ ରିହର୍ସାଲ ହୋଇଥିଲା । ଏହାରି ଭିତରେ ସୋମବାର ସକାଳ ୯ରୁ ସାଢ଼େ ୯ ଭିତରେ ଏମାନେ ପୁଲିସ୍କୁ ଖୋଲା ଚ୍ୟାଲେଞ୍ଜ କରି ଜନପଥରେ ଆତଙ୍କ ଖେଳାଇଲେ । ଅଥଚ ଖାରବେଳ ନଗର ଥାନା ପୁଲିସ୍ କିଛି ଜାଣି ପାରିଲାନାହିଁ । ପ୍ରଧାନମନ୍ତ୍ରୀଙ୍କ ଗସ୍ତର ଅବ୍ୟବହିତ ପୂର୍ବରୁ ରାଜଧାନୀ ଜନପଥରେ ଏଭଳି ଆତଙ୍କୀ କାର୍ଯ୍ୟକଳାପ ପୁଲିସର କାର୍ଯ୍ୟଦକ୍ଷତା ପ୍ରତି ଅଙ୍ଗୁଳି ନିର୍ଦ୍ଦେଶ କରୁଛି ।
ରାଜଧାନୀ ରାସ୍ତାରେ ତାଲିବାନୀ ଷ୍ଟାଇଲରେ ଗାଡ଼ି ଚଳାଇ ଆତଙ୍କ ଖେଳାଉଥିବା ଏହି ଯୁବକଙ୍କ କାର୍ଯ୍ୟକଳାପର ଭିଡିଓ ଅପରାହ୍ଣରେ ସୋସିଆଲ୍ ମିଡିଆରେ ଭାଇରାଲ୍ ହୋଇଥିଲା । ଯାହାକି ରାଜ୍ୟରେ ଚହଳ ପକାଇ ଦେଇଥିଲା । ତାପରେ ଡିଜିପି ୱାଇବି ଖୁରାନିଆ ଏ ବିଷୟରେ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ଭୁବନେଶ୍ୱର ଡିସିପି ପ୍ରତୀକ ସିଂହଙ୍କୁ ନିର୍ଦ୍ଦେଶ ଦେଇଥିଲେ । ଡିସିପିଙ୍କ ସ୍ପେଶାଲ୍ ସ୍କ୍ୱାଡ୍ ପ୍ରଥମେ ୨ଟି ଗାଡ଼ି ଜବତ କରିବା ସହ ୪ ଜଣଙ୍କୁ ଧରିଥିଲା । ଲକ୍ଷ୍ମୀସାଗର ଥାନା ପୁଲିସ୍ ଆଉ ଏକ କାର୍ (ସଫାରୀ) ଗାଡ଼ି ଓ ଫୟାଜ ଖାଁ ନାମକ ଜଣେ ଯୁବକଙ୍କୁ ଧରି ଖାରବେଳ ନଗର ଥାନା ଜିମା ଦେଇଥିଲା ।
ଆଇ-୨୦ କାର୍ରେ ଅନ୍ୟ ଯୁବକମାନେ ଫେରାର ହୋଇଯାଇଛନ୍ତି । ସେମାନଙ୍କ ଶେଷ ଲୋକେସନ୍ ଢେଙ୍କାନାଳ ବୋଲି ପୁଲିସ୍ ଜାଣିବାକୁ ପାଇଛି । ସେମାନଙ୍କୁ ଧରିବାକୁ ଏକ ଟିମ୍ ଯାଇଛି । ଗିରଫ ଅଭିଯୁକ୍ତମାନଙ୍କର ଏଭଳି ଦେଶବିରୋଧୀ ଆଚରଣ ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଛି । ଏହି ଘଟଣାରେ ଡିସିପି ପ୍ରତୀକ ସିଂହ କହିଛନ୍ତ, ଯେଉଁମାନେ ଟ୍ରାଫିକ୍ ନିୟମ ଉଲ୍ଲଙ୍ଘନ କରିଛନ୍ତି ସେମାନଙ୍କ ବିରୋଧରେ ଆଇନ୍ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ । ଫେରାର ଥିବା ଅଭିଯୁକ୍ତମାନଙ୍କୁ ଖୁବ୍ ଶୀଘ୍ର ଗିରଫ କରାଯିବ ।
