ନୂଆଦିଲ୍ଲୀ : ଆମେରିକା ପକ୍ଷରୁ ଅରବିନ୍ଦ କେଜ୍ରିୱାଲଙ୍କର ଗିରଫଦାରୀକୁ ନେଇ ଟିପ୍ପଣୀ କରାଯିବା ପରେ ବିଦେଶ ମନ୍ତ୍ରଣାଳୟ ତୀବ୍ର ପ୍ରତିକ୍ରିୟା ଦେଇଛି। ଭାରତ କହିଛି ଆଇନ୍ ପ୍ରକ୍ରିୟାର ଆଉ କୌଣସି ଉପାୟ ନାହିଁ, ତାହା ତ ଦେଶର ଆଇନ୍ ଅନୁସାରେ ହିଁ ଚାଲିବ। ବୁଧବାର ଆମେରିକାର ଉପ-ରାଷ୍ଟ୍ରଦୂତ ଗ୍ଲୋରିଆ ବେରବେନାଙ୍କ ମନ୍ତବ୍ୟ ଦେବାର ପରଦିନ ହିଁ ଭାରତ ଏହି ଜବାବ ଦେଇଛି। ଏହା ପୂର୍ବରୁ ଉପ-ରାଷ୍ଟ୍ରଦୂତଙ୍କୁ ଭାରତ ପକ୍ଷରୁ ୪୦ ମିନିଟ୍ ଯାଏ ପ୍ରତିକ୍ରିୟା ଦିଆଯାଇ ଥିଲା ଯେ, ଆମେରିକାର ଏହି ବୟାନ ଅବାଞ୍ଛିତ ଏବଂ ଆମର ମାମଲାରେ ହସ୍ତକ୍ଷେପ କରିବା ଉଚିତ୍ ନୁହେଁ ।
ଏହା ପରେ ମଧ୍ୟ ଆମେରିକାର ଆଭିମୁଖ୍ୟ ବଦଳି ନଥିଲା ଏବଂ ଏହା କଂଗ୍ରେସର ଫ୍ରିଜ୍ ଆକାଉଣ୍ଟକୁ ନେଇ ମଧ୍ୟ ଟିପ୍ପଣୀ କରିଥିଲେ। ଆମେରିକାର କହିବାର ଥିଲା କି ଆମକୁ ଜଣା ଯେ କଂଗ୍ରେସର ବ୍ୟାଙ୍କ ଆକାଉଣ୍ଟକୁ ଫ୍ରିଜ୍ କରାଯାଇଛି। ଏବେ ଭାରତର ବିଦେଶ ମନ୍ତ୍ରଣାଳୟ ଆମେରିକାକୁ ସ୍ପଷ୍ଟ ଭାବେ ଚେତାଇ ଦେଇଛି ଏବଂ କହିଛି କି ଆଇନ୍ ପ୍ରକ୍ରିୟାରେ ବୟାନବାଜି ଠିକ୍ ନୁହେଁ। ବିଦେଶ ମନ୍ତ୍ରଣାଳୟର ପ୍ରବକ୍ତା ରଣଧୀର ଜାୟସୱାଲ କହିଛନ୍ତି , କାଲି ଭାରତ ଆମେରିକୀୟ ଦୂତାବାସର ବରିଷ୍ଠ ଅଧିକାରୀଙ୍କୁ ତଲବ କରି ନିଜ ପକ୍ଷରୁ ସ୍ପଷ୍ଟ ମତ ରଖି ଥିଲେ। ଆମର ଆମେରିକୀୟ ବିଦେଶ ମନ୍ତ୍ରଣାଳୟ ପକ୍ଷରୁ ଦିଆଯାଇ ଥିବା ରାୟ ଉପରେ ଦୃଢ ଅଭିଯୋଗ ଅଛି।
ଜାୟସୱାଲ କହିଛନ୍ତି , ଆମେରିକୀୟ ବିଦେଶ ମନ୍ତ୍ରଣାଳୟ ଏବେ ଯେଉଁ ବୟାନ ଦେଇଛି, ତାହା ସଂପୂର୍ଣ୍ଣ ରୂପେ ଅବାଞ୍ଛିତ। ଆମର ନିର୍ବାଚନ ଓ ଆଇନ ପ୍ରକ୍ରିୟାରେ କୌଣସି ପ୍ରକାରର ବାହ୍ୟ ହସ୍ତକ୍ଷେପ ବା ଟିପ୍ପଣୀ ସ୍ୱୀକାର୍ଯ୍ୟ ନୁହେଁ । ଭାରତରେ ଆଇନ ପ୍ରକ୍ରିୟା ନିୟମାନୁସାରେ ଚାଲିଥାଏ।
