ନୂଆଦିଲ୍ଲୀ,୩୦/୧୧: ଚଳିତ ଆର୍ଥିକ ବର୍ଷ ୨୦୨୩-୨୪ ର ଦ୍ୱିତୀୟ ତ୍ରୈମାସିକରେ ଜୁଲାଇରୁ ସେପ୍ଟେମ୍ବର ମଧ୍ୟରେ ଦେଶର ଅର୍ଥନୀତି ୭.୬ ପ୍ରତିଶତ ହାରରେ ବୃଦ୍ଧି ପାଇଛି। ଏହି ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ଅର୍ଥାତ୍ ଏପ୍ରିଲରୁ ଜୁନ୍ ମଧ୍ୟରେ ଜିଡିପି ୭.୮ ପ୍ରତିଶତ ଥିଲା। ଗତ ଆର୍ଥିକ ବର୍ଷ ୨୦୨୨-୨୩ ର ଦ୍ୱିତୀୟ ତ୍ରୈମାସିକରେ ଜିଡିପି ୬.୨ ପ୍ରତିଶତ ଥିଲା। ଦ୍ୱିତୀୟ ତ୍ରୈମାସିକରେ ଆରବିଆଇ ଜିଡିପି ୬.୫ ପ୍ରତିଶତ ହେବ ବୋଲି ଆକଳନ କରିଥିଲା। ଏହାର ଅର୍ଥ ହେଉଛି ଦ୍ୱିତୀୟ ତ୍ରୈମାସିକରେ ଆରବିଆଇର ଆକଳନ ଅପେକ୍ଷା ଦେଶର ଅର୍ଥନୀତି ଦ୍ରୁତ ଗତିରେ ବୃଦ୍ଧି ପାଇଛି।
୪୧.୭୪ ଲକ୍ଷ କୋଟି ଟଙ୍କା ରହିଛି ଜିଡିପି:
ଦ୍ୱିତୀୟ ତ୍ରୈମାସିକ ପାଇଁ ଜିଡିପି ଆକଳନ ପରିସଂଖ୍ୟାନ ଏବଂ କାର୍ଯ୍ୟକ୍ରମ କାର୍ଯ୍ୟାନ୍ୱୟନ ମନ୍ତ୍ରଣାଳୟ ଦ୍ୱାରା ପ୍ରକାଶ ପାଇଛି। ତଥ୍ୟ ଅନୁଯାୟୀ, ୨୦୨୩-୨୪ ଆର୍ଥିକ ବର୍ଷର ଦ୍ୱିତୀୟ ତ୍ରୈମାସିକରେ ଜିଡିପି ୪୧.୭୪ ଲକ୍ଷ କୋଟିରେ ପହଞ୍ଚିଛି, ଯାହା ଗତ ଆର୍ଥିକ ବର୍ଷର ଦ୍ୱିତୀୟ ତ୍ରୈମାସିକରେ ୩୮.୧୭ ଲକ୍ଷ କୋଟି ଟଙ୍କା ଥିଲା।
ଏନ୍ଏସ୍ଓ ଦ୍ବାରା ପ୍ରକାଶିତ ତଥ୍ୟରେ ଦର୍ଶାଯାଇଛି ଯେ ୨୦୨୩-୨୪ ଆର୍ଥିକ ବର୍ଷର ଦ୍ୱିତୀୟ ତ୍ରୈମାସିକରେ ଉତ୍ପାଦନ କ୍ଷେତ୍ରର ଅଭିବୃଦ୍ଧି ହାର ୧୩.୯ ପ୍ରତିଶତ ହୋଇଛି, ଯାହା ଗତ ଆର୍ଥିକ ବର୍ଷର ଦ୍ୱିତୀୟ ତ୍ରୈମାସିକରେ -୩.୮ ପ୍ରତିଶତ ଥିଲା। ଦ୍ୱିତୀୟ ତ୍ରୈମାସିକରେ କୃଷି କ୍ଷେତ୍ରର ଅଭିବୃଦ୍ଧି ହାର ୧.୨ ପ୍ରତିଶତ ଥିବାବେଳେ ୨୦୨୨-୨୩ ର ଦ୍ୱିତୀୟ ତ୍ରୈମାସିକରେ ଏହା ୨.୫ ପ୍ରତିଶତ ଥିଲା। ନିର୍ମାଣ କ୍ଷେତ୍ରର ଅଭିବୃଦ୍ଧି ହାର ୧୩.୩ ପ୍ରତିଶତ ହୋଇଥିବାବେଳେ ଗତ ବର୍ଷର ଦ୍ୱିତୀୟ ତ୍ରୈମାସିକରେ ଏହା ୫.୭ ପ୍ରତିଶତ ଥିଲା।