ନୂଆଦିଲ୍ଲୀ,୧୦/୦୯: ନୂଆଦିଲ୍ଲୀରେ ଦୁଇ ଦିନିଆ ଜି -୨୦ ଶିଖର ସମ୍ମିଳନୀ ଆଜି ରବିବାର ଶେଷ ହୋଇଛି। ଏହି ସମ୍ମିଳନୀରେ ଚୀନ୍ ଏବଂ ଋଷର ରାଷ୍ଟ୍ରମୁଖ୍ୟମାନେ ଯୋଗ ଦେଇନାହାଁନ୍ତି। ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଚୀନ୍ ପ୍ରଧାନମନ୍ତ୍ରୀ ଲି କେକିଆଙ୍ଗଙ୍କୁ ତାଙ୍କ ପ୍ରତିନିଧୀ ଭାବରେ ଦିଲ୍ଲୀ ପଠାଇଥିଲେ। ତେବେ ଚୀନ୍କୁ ଜି -୨୦ ରୁ ଏକ ବଡ଼ ଝଟ୍କା ଲାଗିବାକୁ ଯାଉଛି। କାରଣ ସଂଗଠନର ଏକ ଗୁରୁତ୍ୱପୂର୍ଣ୍ଣ ସଦସ୍ୟ ଇଟାଲୀ ବର୍ତ୍ତମାନ ନିଜର ମହତ୍ବପୂର୍ଣ୍ଣ ପ୍ରକଳ୍ପ ବିଆରଆଇରୁ ଓହରିଯିବାକୁ ଯୋଜନା କରୁଛି ଏବଂ ଏହି ପ୍ରସଙ୍ଗରେ ମଧ୍ୟ ନିଜର ଉଦ୍ଦେଶ୍ୟ ପ୍ରକାଶ କରିଛି।
ଚୀନ୍ ନିଜର ମହତ୍ବାକାଂକ୍ଷୀ ପ୍ରକଳ୍ପ ବେଲ୍ଟ ଆଣ୍ଡ ରୋଡ୍ ଇନିସିଏଟିଭ୍ (ବିଆରଆଇ) ପାଇଁ ବହୁ ଅର୍ଥ ଖର୍ଚ୍ଚ କରୁଛି, କିନ୍ତୁ ବର୍ତ୍ତମାନ ଏହି ପ୍ରକଳ୍ପରେ ଇଟାଲୀରୁ ଏକ ଝଟକା ଲାଗିଛି। ସୂତ୍ରରୁ ପ୍ରକାଶ ଯେ, ଇଟାଲୀ ବିଆରଆଇରୁ ପ୍ରତ୍ୟାହାର ପାଇଁ ପ୍ରସ୍ତୁତି ଆରମ୍ଭ କରିଛି। ଚୀନ୍ର ପ୍ରଧାନମନ୍ତ୍ରୀ ଲି କ୍ବିଙ୍ଗଙ୍କ ସହ ସାକ୍ଷାତ ସମୟରେ ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନି ମଧ୍ୟ ଏହିପରି ସୂଚନା ଦେଇଛନ୍ତି।
ବିଆରଆଇରୁ କାହିଁକି ପଛକୁ ହଟୁଛି ଇଟାଲି:
ଶନିବାର ଶିଖର ସମ୍ମିଳନୀରେ ଚୀନ୍ ପ୍ରଧାନମନ୍ତ୍ରୀ ଲି ଇଟାଲୀ ପ୍ରଧାନମନ୍ତ୍ରୀ ମେଲୋନିଙ୍କୁ ଭେଟି ଦ୍ୱିପାକ୍ଷିକ ସମ୍ପର୍କ ଉପରେ ଆଲୋଚନା କରିଥିଲେ। ଏହି ବୈଠକ ଗୁରୁତ୍ୱପୂର୍ଣ୍ଣ କାରଣ ଚୀନ୍ର ବିଆରଆଇରୁ ଇଟାଲୀ ପ୍ରତ୍ୟାହାର ହେବାକୁ ଯୋଜନା କରୁଛି କାରଣ ଏହି ପ୍ରକଳ୍ପ ଆଶାନୁରୁପ ଫଳାଫଳ ଦେଇ ନାହିଁ। ଦୁଇ ଦେଶର ପ୍ରଧାନମନ୍ତ୍ରୀଙ୍କ ମଧ୍ୟରେ ହୋଇଥିବା ଏହି ବୈଠକକୁ ଗୁରୁତ୍ୱପୂର୍ଣ୍ଣ ବିବେଚନା କରାଯାଏ, କାରଣ ଇଟାଲୀ ସରକାର ଖୋଲାଖୋଲି ଭାବେ ବିଆରଆଇ ରୁ ନିଜକୁ ପ୍ରତ୍ୟାହାର କରିବାକୁ ଇଚ୍ଛା ପ୍ରକାଶ କରିଛନ୍ତି। କୋଟି କୋଟି ଟଙ୍କାର ଚାଇନାର ପ୍ରକଳ୍ପରୁ ଏହା କୌଣସି ଲାଭ ପାଇନାହିଁ ବୋଲି ଇଟାଲୀ କହିଛି। ତେବେ, ଜର୍ଜିଆ ମେଲୋନି, ଦିଲ୍ଲୀରେ ଲିଙ୍କ ସହ ସାକ୍ଷାତ ସମୟରେ ଏଠାରେ ପୁଞ୍ଜି ବିନିଯୋଗ ଏବଂ ବ୍ୟବସାୟ ପାଇଁ ଏକ 'ନ୍ୟାୟଯୁକ୍ତ, ନିରପେକ୍ଷ ନଥିବା ବ୍ୟବସାୟ ପରିବେଶ' ପ୍ରଦାନ କରିବାକୁ ପ୍ରତିଶୃତି ଦେଇଛନ୍ତି।
