ନୂଆଦିଲ୍ଲୀ,୦୨/୦୯: କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କର ମଇସୁର ନଗର ବିକାଶ ପ୍ରାଧିକରଣ (ଏମ୍ୟୁଡିଏ) ଦୁର୍ନୀତି ମାମଲାରେ ସମସ୍ୟା କମିବାର ନାଁ ନେଉନାହିଁ। ଏପରିକି ରାଜ୍ୟରେ ମୁଖ୍ୟମନ୍ତ୍ରୀ ପରିବର୍ତ୍ତନ କରାଯିବା ନେଇ କଳ୍ପନାଜଳ୍ପନା ଚାଲିଛି। ଏହାରି ଭିତରେ ଆରଟିଆଇର ଏକ ଜବାବରେ ଖୁଲାସା ହୋଇଛି ଯେ, ସିଏମ୍ ସିଦ୍ଧରମୈୟା ସୋସିଆଲ ମିଡିଆ ଆକାଉଣ୍ଟକୁ ପରିଚାଳନା କରିବା ପାଇଁ ମାସିକ ୫୪ ଲକ୍ଷ ଟଙ୍କା ଖର୍ଚ୍ଚ କରୁଛନ୍ତି। ସେ ଉଭୟ ବ୍ୟକ୍ତିଗତ ଏବଂ ଅଫିସିଆଲ୍ ଆକାଉଣ୍ଟ୍ ପାଇଁ ଏହି ପରିମାଣ ଖର୍ଚ୍ଚ କରୁଛନ୍ତି।
ଟାଇମ୍ସ ଅଫ୍ ଇଣ୍ଡିଆର ରିପୋର୍ଟ ଅନୁଯାୟୀ, ଆରଟିଆଇ କାର୍ଯ୍ୟକର୍ତ୍ତା ମାରଲିଙ୍ଗା ଗୋଔଡା ମାଲି ପାଟିଲ ଏହାର ଉତ୍ତର ମାଗି ଏକ ଆରଟିଆଇ ଦାଖଲ କରିଥିଲେ। ଯେତେବେଳେ ସେ ଜାଣିବାକୁ ପାଇଲେ ଯେ ଅନେକ ବିକାଶମୂଳକ କାର୍ଯ୍ୟ ପାଇଁ ସରକାରଙ୍କ ପାଖରେ ଅର୍ଥ ନାହିଁ, ସେ ଏହାର କାରଣ ଜାଣିବାକୁ ଚେଷ୍ଟା କରିଥିଲେ। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ ପୂର୍ବତନ ମୁଖ୍ୟମନ୍ତ୍ରୀଙ୍କ ତୁଳନାରେ ସିଦ୍ଧରମଢୟା ସୋସିଆଲ ମିଡିଆରେ ବହୁତ କମ୍ ଖର୍ଚ୍ଚ କରନ୍ତି। ଏହାପୂର୍ବରୁ ପୂର୍ବତନ ମୁଖ୍ୟମନ୍ତ୍ରୀଙ୍କ ଏହି ଖର୍ଚ୍ଚ ପ୍ରାୟ ୨ କୋଟି ଟଙ୍କା ଥିଲା।
ସରକାରୀ ଏଜେନ୍ସି କର୍ଣ୍ଣାଟକ ଷ୍ଟେଟ ମାର୍କେଟିଂ କମ୍ୟୁନିକେସନ୍ ଆଣ୍ଡ ଆଡ୍ଭର୍ଟାଇସିଙ୍ଗ୍ ଲିମିଟେଡ୍ (ଏମ୍ସିଏ) ଏହି ସୂଚନା ଦେଇଛି। ଗତ ବର୍ଷ ଅକ୍ଟୋବର ୨୫ ରୁ ମାର୍ଚ୍ଚ ୨୦୨୪ ପର୍ଯ୍ୟନ୍ତ, ସିଏମ୍ଓ ପ୍ରାୟ ୩ କୋଟି ଟଙ୍କା ଖର୍ଚ୍ଚ କରିଛନ୍ତି। ଆରଟିଆଇରେ ମିଳିଥିବା ସୂଚନା ଅନୁଯାୟୀ, ସିଏମଓ ପ୍ରତି ମାସରେ ପ୍ରାୟ ୫୩.୯ ଲକ୍ଷ ଟଙ୍କା ସୋସିଆଲ ମିଡିଆରେ ଖର୍ଚ୍ଚ କରନ୍ତି। ଏଥିରେ ୧୮ ପ୍ରତିଶତ ଜିଏସ୍ଟି ମଧ୍ୟ ଅନ୍ତର୍ଭୁକ୍ତ। ପଲିସି ଫ୍ରଣ୍ଟ ନାମକ ଏକ କମ୍ପାନୀକୁ ଏହି ଦେୟ ପ୍ରଦାନ କରାଯାଉଥିଲା ଯାହାକି ସିଦ୍ଧରମୈୟାଙ୍କ ଆକାଉଣ୍ଟଗୁଡିକ ପରିଚାଳନା କରେ। ଏଥିରେ ପ୍ରାୟ ୩୫ ଜଣଙ୍କର ଏକ ଟିମ୍ ରହିଛି।
ସୂଚନାଥାଉକି, ଏମ୍ୟୁଡିଏ ଦୁର୍ନୀତି ମାମଲାରେ ସିଏମମ ସିଦ୍ଧରମୈୟାଙ୍କୁ ଦୋଷୀ ସାବ୍ୟସ୍ତ କରିବାକୁ ରାଜ୍ୟପାଳ ଥାୱର ଚନ୍ଦ୍ର ଗେହଲଟ୍ ମକଦ୍ଦମା ଚଳାଇବାକୁ ଅନୁମତି ଦେଇଛନ୍ତି। ସେବେଠାରୁ ତାଙ୍କ ଉପରେ ସିଏମ୍ ପଦରୁ ଇସ୍ତଫା ଦେବାକୁ ଚାପ ପଡ଼ିଛି। ତେବେ ସିଦ୍ଧରମୈୟା ଇସ୍ତଫା ଦେବେ ନାହିଁ ବୋଲି ସ୍ପଷ୍ଟ କରିଛନ୍ତି। ଶନିବାର ଦିନ କଂଗ୍ରେସ ମଧ୍ୟ ରାଜ ଭବନ ଅଭିମୁଖେ ଯାତ୍ରା କରିଥିଲା। ଏହି ପଦଯାତ୍ରାର ଉଦ୍ଦେଶ୍ୟ ଥିଲା ପ୍ରବର୍ତ୍ତନ ନିର୍ଦ୍ଦେଶାଳୟର ଅନୁମୋଦନ ନିଷ୍ପତ୍ତି ଉପରେ ପୁନର୍ବିଚାର କରିବାକୁ ରାଜ୍ୟପାଳଙ୍କ ଉପରେ ଚାପ ପକାଇବା।
