କୋଲକାତା: ଜୋସ୍ ବଟଲରଙ୍କ ଅବିଶ୍ବସନୀୟ ଇନିଂସ୍ ବଳରେ ବୃହତ୍ତ ବିଜୟ ହାସଲ କରିଛି ରାଜସ୍ଥାନ ରୟାଲ୍ସ । ୨୦ ଓଭର ଶେଷ ସହ ୮ ଓ୍ବିକେଟ ହରାଇ ୨୨୪ ରନ୍ ଟାର୍ଗେଟ ହାସଲ କରିଛି ଆରଆର । ଆଜି କୋଲକାତା ନାଇଟ ରାଇଡର୍ସକୁ ପରାଜୟ ବରଣ କରିବାକୁ ପଡ଼ିଛି । ଗୋଟିଏ ସମୟରେ ମ୍ୟାଚ୍ ହାରିବାକୁ ଯାଉଥିବା ରାଜସ୍ଥାନକୁ ଜୋସ୍ ବଟଲର ଜିତାଇ ଦେଇଛନ୍ତି । ସଂକଟମୋଚକ ସାଜି ବଟଲର ୬୦ ବଲ୍ରୁ ଅପରାଜିତ ୧୦୭ ରନ୍ କରି ରାଜସ୍ଥାନକୁ ବିଜୟ ଭେଟି ଦେଇଛନ୍ତି । ଏହା ସହ ଆଇପିଏଲରେ ଦ୍ବିତୀୟ ସର୍ବାଧିକ ଶତକ (୭) ମାରିଛନ୍ତି ଜୋସ୍ ବଟଲର ।
ଜୋସ ବଟଲରଙ୍କ ବ୍ୟତୀତ ଯଶସ୍ବୀ ଜୟସ୍ବାଲ (୧୯), ସଞ୍ଜୁ ସାମସନ (୧୨), ରିୟାନ ପରାଗ (୩୪), ଧ୍ରୁବ ଜୁରେଲ (୨), ରବିଚନ୍ଦ୍ରନ ଅଶ୍ବିନ (୮) ଏବଂ ରୋଗମେନ ପୋଓ୍ବେଲ(୨୬) ଦଳ ବିଜୟରେ ଯୋଗଦାନ ଦେଇଛନ୍ତି । ତେବେ ଆଜିର ମ୍ୟାଚ୍ରେ କେକେଆର ପକ୍ଷରୁ ସୁନୀଲ ନାରାୟଣଙ୍କ ଶତକ ବେକାର ଯାଇଛି । ସେପଟେ କେକେଆର ପକ୍ଷରୁ ହର୍ଷିତ ରାଣା, ସୁନୀଲ ନାରାୟଣ ଏବଂ ବରୁଣ ଚକ୍ରବର୍ତ୍ତୀ ୨ଟି ଲେଖାଏଁ ଓ୍ବିକେଟ ନେଇଥିବା ବେଳେ ବୈଭବ ଆରୋରା ଗୋଟିଏ ଓ୍ବିକେଟ ନେଇଛନ୍ତି ।
ଆଇପିଏଲ ୨୦୨୪ର ୩୧ ତମ ମ୍ୟାଚ୍ରେ କୋଲକାତାର ଇଡେନ ଗାର୍ଡେନସ୍ରେ କେକେଆର ଏବଂ ରାଜସ୍ଥାନ ରୟାଲ୍ସ ମଧ୍ୟରେ ଟକ୍କର ହୋଇଥିଲା । ଟସ୍ ହାରି ପ୍ରଥମେ ବ୍ୟାଟିଂ କରିଥିବା କେକେଆର ନିର୍ଦ୍ଧାରିତ ଓଭରରେ ଦଳ ୬ ଓ୍ବିକେଟ ହରାଇ ୨୨୩ ରନ୍ କରିଥିଲା। ଆଜିର ମ୍ୟାଚ୍ରେ ସୁନୀଲ ନାରାୟଣ ବିସ୍ଫୋରକ ବ୍ୟାଟିଂ କରିବା ସହ ୫୬ ବଲରୁ ୧୩ ଚୌକା ଏବଂ ୬ ଛକା ବଳରେ୧୦୯ ରନ୍ କରିଥିଲେ । ଫିଲିପ ସଲ୍ଟ (୧୦), ଅଙ୍ଗକ୍ରିସ ରଘୁବଂଶୀ (୩୦), ଶ୍ରେୟସ ଆୟର (୧୧), ଆଣ୍ଡ୍ରେ ରସେଲ (୧୩), ଭେଙ୍କଟେଶ ଆୟର (୮) ଏବଂ ରିଙ୍କୁ ସିଂଙ୍କ ଅପରାଜିତ ୨୦ ରନ୍ ଓ ରମନଦୀନ ସିଂହ(୧)ଙ୍କ ବଳରେ ଦଳ ୨୨୩ ରନ୍ର ବିଶାଳ ସ୍କୋର କରିଥିଲା । ହେଲେ ରାଜସ୍ଥାନ ୨୨୪ ରନ୍ ଟାର୍ଗେଟ ହାସଲ କରିବାରେ ସଫଳ ହୋଇଛି ।
