ନୂଆଦିଲ୍ଲୀ: ଗୁଜୁରାଟର ଅହମ୍ମଦାବାଦ ଭଦୋଦରା ଏକ୍ସପ୍ରେସୱେରେ ଏକ ବଡ଼ ଦୁର୍ଘଟଣା ଘଟିଛି । ଏଠାରେ ଏକ କାର ଏକ ତେଲ ଟ୍ୟାଙ୍କରକୁ ପଛପଟୁ ଧକ୍କା ଦେବା କାରଣରୁ କାରରେ ଥିବା ୧୦ ଜଣ ଲୋକଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଛି । ଦୁର୍ଘଟଣା ଘଟାଇଥିବା କାର ଭଦୋଦରା ଠାରୁ ଅହମ୍ମଦାବାଦ ଯାଉଥିଲା । 

ଏହି ଘଟଣା ଅହମ୍ମଦାବାଦ ଭଦୋଦରା ଏକ୍ସପ୍ରେସୱେରେ ନଡିଆଡ ନିକଟରେ ଘଟିଛି। ଦୁର୍ଘଟଣା ଏତେ ଭୟଙ୍କର ଥିଲା ଯେ କାରରେ ଥିବା ସମସ୍ତ ୧୦ ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା । ଦୁର୍ଘଟଣା ପରେ ରାଜପଥ କିଛି ସମୟ ପାଇଁ ଜାମ୍ ରହିଥିଲା । ପରେ 108 ର ଦୁଇଟି ଆମ୍ବୁଲାନ୍ସ ଘଟଣାସ୍ଥଳରେ ପହଞ୍ଚିଥିଲା ଏବଂ ଏକ୍ସପ୍ରେସ ହାଇୱେ ପାଟ୍ରୋଲିଂ ଦଳ ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ।

ଏହାପୂର୍ବରୁ ଅକ୍ଟୋବର ୨୦୨୩ ରେ ଗୁଜୁରାଟ-ରାଜସ୍ଥାନ ସୀମାରେ ଥିବା ରତନପୁର ନିକଟରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଥିଲା, ଯେଉଁଥିରେ ୯ ଜଣଙ୍କର ମୃତ୍ୟୁ ହୋଇଥିବା ବେଳେ ୧୦ ଜଣ ଆହତ ହୋଇଥିଲେ । ବ୍ରେକ୍ ଫେଲ୍ ହେତୁ ଏକ କ୍ରୁଜର ଜିପ୍ ଟ୍ରକ୍ ସହିତ ମୁହାଁମୁହିଁ ଧକ୍କା ହୋଇଥିଲା। ଏହି ଜିପ୍ ରେ ଶ୍ରମିକ ଥିଲେ । ଯେଉଁମାନେ ବିଚିୱାଡା ଠାରୁ ଅହମ୍ମଦାବାଦ ଯାଉଥିଲେ।