ପାନିପଥ, ୧୬/୦୯: କାଶ୍ମୀରର ଅନନ୍ତନାଗରେ ଆତଙ୍କବାଦୀଙ୍କ ସହ ମୁହାଁମୁହିଁ ବେଳେ ସହିଦ ହୋଇଥିବା ମେଜର ଆଶିଷ ବେଶ୍ ସାହସର ସହ ଲଢ଼େଇ କରିଥିଲେ । ଆତଙ୍କୀ ନିପାତ ମିଶନରେ ଥିବା ପାନିପଥର ମେଜର ଆଶିଷ ଅନନ୍ତନାଗ ଟିମ୍ ସହ ମିଶନରେ ଥିଲେ । ଘଞ୍ଚ ଜଙ୍ଗଲରେ ସେ ଆତଙ୍କବାଦୀଙ୍କ ସହ ମୁହାଁମୁହିଁ ହୋଇଥିଲେ । ଆତଙ୍କୀଙ୍କ ଆଖିବୁଜା ଗୁଳିମାଡ଼ ପରେ ମେଜର ଆଶିଷଙ୍କ ଜଂଘରେ ଗୁଳି ବାଜିଥିଲା । ଫଳରେ ପ୍ରବଳ ରକ୍ତସ୍ରାବ ହେବାରେ ଲାଗିଥିଲା । ସେହି ଅବସ୍ଥାରେ ବି ସେ ଆତଙ୍କବାଦୀଙ୍କୁ ନିପାତ ଅଭିଯାନରେ ଲାଗିଥିଲେ । ପ୍ରାୟ ୧୦ ଘଣ୍ଟା ଧରି ତାଙ୍କ ଗୋଡ଼ରୁ ରକ୍ତ ବୋହିଥିଲା । ଏତେ ସମୟ ରକ୍ତସ୍ରାବ ନ ଅଟକିବାରୁ ମେଜରଙ୍କ ସ୍ୱାସ୍ଥ୍ୟ ବିଗିଡ଼ିବାରେ ଲାଗିଥିଲା । ଫଳରେ ସେ ସହିଦ ହୋଇଯାଇଥିଲେ ।
ତାଙ୍କ ବନ୍ଧୁ ବିକାଶ କହିଛନ୍ତି, ସେ ମେଜର ଆଶିଷଙ୍କ ସହ କେନ୍ଦ୍ରୀୟ ବିଦ୍ୟାଳୟରେ ନବମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିଥିଲେ । ସ୍କୁଲ ସମୟରୁ ହିଁ ଆଶିଷଙ୍କ ମନରେ ଦେଶସେବାର ଉତ୍ସାହ ଭରିରହିଥିଲା । ମେଜର ଆଶିଷଙ୍କ ଲକ୍ଷ୍ୟ ସେତେବେଳୁ ହିଁ ସ୍ଥିର ଥିଲା ଯେ ସେ ସେନାରେ ଭର୍ତ୍ତି ହେବେ । ୨୦୧୨ରେ ମାତ୍ର ୨୫ ବର୍ଷ ବୟସରେ ସେ ଭାରତୀୟ ସେନାରେ ଲ୍ୟୁଟନାଣ୍ଟ ଭାବେ ଭର୍ତ୍ତି ହୋଇଥିଲେ । ୨୦୧୮ରେ ତାଙ୍କ ପଦୋନ୍ନତି ହୋଇଥିଲା ଏବଂ ସେ ମେଜର ହୋଇଥିଲେ । ଅଢ଼େଇ ବର୍ଷ ପୂର୍ବରୁ ରଜୌରୀରେ ତାଙ୍କର ପୋଷ୍ଟିଂ ହୋଇଥିଲା । ମେଜର ଆଶିଷ ୨୦୧୫ରେ ବିବାହ କରିଥିଲେ । ତାଙ୍କର ୨ ବର୍ଷର ଜଣେ ଝିଅ ରହିଛି । ୩ ଭଉଣୀଙ୍କ ଭିତରେ ସେ ଏକମାତ୍ର ପୁଅ ଥିଲେ ।
ଅପରପକ୍ଷେ ଅନନ୍ତନାଗ ଗଡୁଲ କୋକେରନାଗରେ ଚତୁର୍ଥ ଦିନ ଅର୍ଥାତ ଶୁକ୍ରବାର ବି ସୁରକ୍ଷାକର୍ମୀ ଏବଂ ଆତଙ୍କବାଦୀଙ୍କ ମଧ୍ୟରେ ଗୁଳିଗୋଳା ମାଡ଼ ଜାରି ରହିଛି । ଆତଙ୍କବାଦୀଙ୍କୁ ନିପାତ କରିବା ପାଇଁ ସେମାନେ ଲୁଚି ରହିଥିବା ସ୍ଥାନରେ ସୁରକ୍ଷାକର୍ମୀ ବୋମାମାଡ଼ କରୁଛନ୍ତି । ସମ୍ପୃକ୍ତ ଅଞ୍ଚଳକୁ ସମ୍ପୂର୍ଣ୍ଣ ଭାବେ ଘେରାବନ୍ଦୀ କରାଯାଇ ସର୍ଚ୍ଚ ଅପରେଶନ ଚାଲିଛି । ସେପଟେ ବୁଧବାର ଆତଙ୍କବାଦୀଙ୍କ ଗୁଳିମାଡ଼ରେ ଆହତ ହୋଇଥିବା ଆଉ ଜଣେ ଯବାନ ସହିଦ ହୋଇଛନ୍ତି । ଆଉ ୨/୩ ଆତଙ୍କବାଦୀ ରଜୈରୀ ପର୍ଯ୍ୟନ୍ତ ଥିବା ପୀର ପଞ୍ଜାଲ ଘନ ଜଙ୍ଗଲରେ ଲୁଚି ରହିଛନ୍ତି ।
ଏଥିରେ ଜଣେ ଲସ୍କର-ଏ-ତୋଏବାର କମାଣ୍ଡର ଉଜୈର ଖାନ୍ ରହିଛି । ସେମାନଙ୍କ ଆକ୍ରମଣରେ ବୁଧବାର ଭାରତୀୟ ସେନାର କର୍ଣ୍ଣେଲ ମନପ୍ରୀତ୍ ସିଂ, ମେଜର ଆଶିଷ ଧୋନ୍ଚକ ଏବଂ ଜମ୍ମୁ-କାଶ୍ମୀର ପୁଲିସର ଡିଏସ୍ପି ହୁମାୟୁଁ ଭଟ୍ଟ ସହିଦ ହୋଇଥିଲେ । ଏବେ ଆହତ ଥିବା ଆଉ ଜଣେ ଯବାନ ସହିଦ ହୋଇଛନ୍ତି । ସେନା କମାଣ୍ଡୋ, ସ୍ନିଫର ଡଗ୍, ହେଲିକପ୍ଟର ଆତଙ୍କବାଦୀଙ୍କ ତଲାସି ଅଭିଯାନରେ ସାମିଲ ହୋଇଛି । ଏଥିରେ ରକେଟ ଲଞ୍ଚର ମଧ୍ୟ ବ୍ୟବହାର ହେଉଛି ।
ସେନା ଅଧିକାରୀଙ୍କ ସୂଚନା ଅନୁସାରେ, ଆତଙ୍କବାଦୀଙ୍କୁ ୪ କିଲୋମିଟର ପରିଧି ଭିତରେ ଘେରାଉ କରାଯାଇଛି । ଡ୍ରୋନ୍ ଯୋଗେ ସମ୍ପୃକ୍ତ ସ୍ଥାନଗୁଡ଼ିକରେ ବୋମାମାଡ଼ କରାଯାଉଛି । ସେନା ଏବଂ ଜମ୍ମୁ-କାଶ୍ମୀର ପୁଲିସ ତଲାସି ଅଭିଯାନରେ ଚଳାଉଥିବାବେଳେ ଗତ ମଙ୍ଗଳବାର ଆତଙ୍କବାଦୀମାନେ ଆକ୍ରମଣ କରିଥିଲେ ।
