କଟକ ୨୪/୦୪: ଆସନ୍ତା ୨୬ ତାରିଖ ଅର୍ଥାତ ରବିବାର ଦିନ ମାଟ୍ରିକ୍‌ ପରୀକ୍ଷା ଫଳ ପାଇବ । ମାଟ୍ରିକ୍‌  ସହିତ ସଂସ୍କୃତ ମଧ୍ୟମା ଏବଂ ଷ୍ଟେଟ୍‌ ଓପନ୍‌  ସ୍କୁଲ୍‌ ସାର୍ଟିଫିକେଟ୍‌ (ଏସ୍‌ଓଏସ୍‌ସି) ପରୀକ୍ଷା ଫଳ ମଧ୍ୟ ପ୍ରକାଶ ପାଇବ । ବୋର୍ଡ ପକ୍ଷରୁ ପରୀକ୍ଷା ଫଳ ଘୋଷଣା ହେବା ମାତ୍ରେ ଅନ୍‌ଲାଇନ୍‌ରେ କୃତୀ ପରୀକ୍ଷାର୍ଥୀମାନେ ସେମାନଙ୍କ ସାର୍ଟିଫିକେଟ୍‌ ପାଇଯିବାର ବ୍ୟବସ୍ଥା ଏଥର ହେଉଛି । ଏନେଇ ପ୍ରେସ୍‌ମିଟ କରି ସୂଚନା ଦେଲେ ବୋର୍ଡ ସଭାପତି ଶ୍ରୀକାନ୍ତ ତରାଇ।

ସୂଚନା ମୁତାବିକ, ରବିବାର ସାଢ଼େ ୧୦ଟା ବେଳେ ପରୀକ୍ଷା ଫଳ ପ୍ରକାଶ ପାଇବ। ଦିନ ସାଢ଼େ ୧୧ଟା ମାଟ୍ରିକ୍ ରେଜଲ୍ଟ ବୋର୍ଡ଼ ସାଇଟ୍‌ www.bseodisha.ac.in  ଓ  www.bseodisha.nic.in  ରେ ଉପଲବ୍ଧ ହେବ । ଯେଉଁମାନଙ୍କ ପାଖରେ ଇଣ୍ଟରନେଟ୍‌ର ସୁବିଧା ନାହିଁ, ସେମାନେ SMS ମାଧ୍ୟମରେ ପରୀକ୍ଷା ଫଳ ଜାଣିପାରିବେ। OR10 ଲେଖି ରୋଲ୍‌ ନମ୍ବର  5676750କୁ ପଠାଇଲେ ରେଜଲ୍ଟ ମିଳିବ।  

ଅପରାହ୍ନ ୪ଟରେ ଛାତ୍ରଛାତ୍ରୀମାନେ  ଅନ୍‌ଲାଇନ୍‌ରୁ ନିଜ ନିଜର ଡିଜିଟାଲ ସାର୍ଟିଫିକେଟ୍‌ ଡାଉନ୍‌ଲୋଡ କରିପାରିବେ। ଡିଜିଟାଲ ସାର୍ଟିଫିକେଟ୍‌ ପ୍ରଧାନ ଶିକ୍ଷକଙ୍କ ମାନଙ୍କର ଡିଜିଟାଲ ଦସ୍ତଖତ ରହିବ। ଏଥି ସହିତ ରି ଚେକିଂ ପାଇଁ  ୨୯ ତାରିଖରେ ପରୀକ୍ଷାର୍ଥୀ ଆବେଦନ କରିପାରିବେ।

ବୋର୍ଡ ପକ୍ଷରୁ ଦୁଇ କଣ୍ଟେ୍ରାଲ ରୁମ୍ ନମ୍ବର ୮୭୬୩୪୪୬୨୯୨ ଏବଂ ୯୪୩୭୨୨୧୮୭ ଜାରି କରାଯାଇଛି। ଛାତ୍ରଛାତ୍ରୀମାନେ କୌଣସି ଅସୁବିଧାର ସମ୍ମୁଖୀନ ହେଲେ ବୋର୍ଡ ଯୋଗାଯୋଗ କରିପାରିବେ।

ଗତ ଫେବ୍ରୁଆରୀ ୨୦ରୁ ମାର୍ଚ୍ଚ ୪ ତାରିଖ  ପର୍ଯ୍ୟନ୍ତ ମାଟ୍ରିକ୍‌ ସହିତ ସଂସ୍କୃତ ମଧ୍ୟମା ଏବଂ ଏସ୍‌ଓଏସ୍‌ସି ପରୀକ୍ଷା ଏକ ସମୟରେ ହୋଇଥିଲା। ରାଜ୍ୟରେ ସାଢ଼େ ୫ ଲକ୍ଷରୁ ଅଧିକ ମାଟ୍ରିକ୍‌ ପରୀକ୍ଷାର୍ଥୀ ୩ ହଜାର  ୧୫୩ଟି କେନ୍ଦ୍ରରେ ପରୀକ୍ଷା ଦେଇଥିଲେ । 

ଚଳିତବର୍ଷ ମାଟ୍ରିକ୍‌  ପରୀକ୍ଷାକୁ ତ୍ରୁଟିଶୂନ୍ୟ କରିବା ସହ ସବୁ ସ୍ତରରେ ଅନିୟମିତତା  ରୋକିବା ଲାଗି ବୋର୍ଡ ପକ୍ଷରୁ ଅନେକ ନୂତନ ପଦକ୍ଷେପ ନିଆଯାଇଥିଲା । କୃତୀ ପରୀକ୍ଷାର୍ଥୀଙ୍କୁ ତତ୍କାଳ ହାତ ପାଖରେ ସାର୍ଟିଫିକେଟ୍‌ ପ୍ରଦାନ କରାଯିବା ଲାଗି ରାଜ୍ୟରେ ପ୍ରଥମ ଥର ପାଇଁ ବୋର୍ଡ ପକ୍ଷରୁ ଏଥର ଡିଜିଟାଲ୍‌ ସାର୍ଟିଫିକେଟ୍‌ ପ୍ରଦାନ ବନ୍ଦୋବସ୍ତ  କରାଯାଇଛି । ଫଳ ପ୍ରକାଶ ମାତ୍ରେ ପରୀକ୍ଷାର୍ଥୀମାନେ ଅନ୍‌ଲାଇନ୍‌ରେ ସାର୍ଟିଫିକେଟ୍‌ ପାଇଯିବେ । ବୋର୍ଡ ୱେବ୍‌ସାଇଟ୍‌ରୁ ପରୀକ୍ଷାର୍ଥୀମାନେ  କ୍ଲିକ୍‌ କରି କିପରି ଅନ୍‌ଲାଇନ୍‌ରେ ସୁବିଧାରେ ସାର୍ଟିଫିକେଟ୍‌ ଡାଉନ୍‌ଲୋଡ୍‌ କରିପାରିବେ ତାହାର କୌଶଳ ବୋର୍ଡ ପକ୍ଷରୁ  ନିକଟରେ ପ୍ରଦର୍ଶନ କରାଯାଇଥିଲା ।