ବାରିପଦା, ୧୨/୦୯ : ସେ ମା ନା ଡ଼ାହାଣୀ ? ଦେଢ ମାସର ଛୁଆକୁ ପାଣିରେ ଫିଙ୍ଗି ଦେଲା ଜନ୍ମକଲା ମାଆ। ଆଉ ଛୁଆ ହଜିଯାଇଥିବା କହି ନାଟକ କଲା। ଶେଷରେ ପରିବାର ଆଗରେ ସତ ମାନିଲା। ମୟୁରଭଞ୍ଜ ଜିଲ୍ଲା ବିଶୋଇ ଥାନା ଅନ୍ତର୍ଗତ ବାଙ୍କିଡିହି ଗ୍ରାମରେ ଏଭଳି ଘଟଣା ଘଟିଛି। ପୋଲିସ ଅଭିଯୁକ୍ତ ମାକୁ ଅଟକ ରଖିଛି।

ସୂଚନାନୁଯାୟୀ, ବାଙ୍କିଡିହି ଗ୍ରାମର ସେଲାଇ ନାଏକଙ୍କ ଦ୍ଵିତୀୟ ସ୍ତ୍ରୀ ପ୍ରଭାତୀ ନାଏକ ସୋମବାର ନିଜ ପୁଅକୁ ଗାଁ ପାଖରେ ଥିବା ଏକ ନାଳରେ ଫିଙ୍ଗିଦେଇ ଆସିଥିଲେ। ଏହାପରେ ପୁଅ ହଜିଯାଇଥିବା ଗାଁରେ କହିଥିଲେ। ଏନେଇ ପରିବାର ଲୋକେ ଓ ଗ୍ରାମବାସୀ ଖୋଜାଖୋଜି କରିଥିଲେ କିନ୍ତୁ ପାଇନଥିଲେ। ପରିବାର ଲୋକେ ଏନେଇ ଥାନାରେ ଅଭିଯୋଗ କରିବା ପରେ ପୋଲିସ ପ୍ରଭାତୀ ନାଏକକୁ ପଚରାଉଚୁରା କରିଥିଲା। ପରେ ସେ ତାଙ୍କ ଭାଉଜଙ୍କ ପାଖରେ ଛୁଆକୁ ଛାଡିଥିବା କହିଥିଲେ।

ପରିବାର ଲୋକେ ପୁଣି ଗାଁକୁ ଫେରିଆସି ପଡୋଶୀ ଘରକୁ ଯାଇଥିଲେ କିନ୍ତୁ ସେଠି କାହାକୁ ପାଇନଥିଲେ। ପରଦିନ ଘର ଲୋକ ପ୍ରଭାତୀକୁ ପଚାରିବାରୁ ସେ ପୁଅକୁ ନେଇ ନାଳରେ ଭସାଇ ଦେବା କଥା ମାନିବା ସହିତ ଭସାଇ ଥିବା ସ୍ଥାନକୁ ଦେଖାଇ ଥିଲା। ପରେ ଘଟଣା ସ୍ଥଳରେ ବିଶୋଇ ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚି ମୃତ ଶିଶୁ ପୁତ୍ରକୁକୁ ଉଦ୍ଧାର କରି ଶବ ବ୍ୟବଚ୍ଛେଦ ପାଇଁ ରାଇରଙ୍ଗପୁର ଜିଲ୍ଲା ଉପଖଣ୍ଡ ଚିକିତ୍ସାଳୟକୁ ପଠେଇଥିଲେ। ଏହାପରେ ହତ୍ୟାକାରୀ ମା ପ୍ରଭାତୀ ନାଏକକୁ ପୋଲିସ ଗିରଫ କରି ବିଶୋଇ ଥାନାରେ 171/23 ରେ ମାମଲା ରୁଜୁ କରିଛି। ପୋଲିସ ଏନେଇ ଅଧିକ ତଦନ୍ତ କରୁଛି । ଅପରପକ୍ଷରେ କେଉଁ କାରଣରୁ ମହିଳା ଜଣଙ୍କ ନିଜ ଜନ୍ମିତ ପୁତ୍ର ସନ୍ତାନକୁ ହତ୍ୟା କଲେ ତାହା ସଠିକ୍ ଜଣା ପଡ଼ିନାହିଁ।