ଭୁବନେଶ୍ୱର, ୪।୯: ରମାଦେବୀ ମହିଳା ବିଶ୍ୱବିଦ୍ୟାଳୟ ପରିଦର୍ଶନରେ ଆସନ୍ତା ୨୫ ତାରିଖରେ ଆସିବେ ନ୍ୟାସନାଲ୍ ଆସେସ୍ମେଣ୍ଟ ଆଣ୍ଡ ଆକ୍ରିଡେସନ୍ କାଉନସିଲ୍ (ନାକ୍) ଟିମ୍ । ତିନି ଦିନିଆ ଗସ୍ତରେ ଆସୁଥିବା ଏହି ଟିମ୍ ବିଶ୍ୱବିଦ୍ୟାଳୟର ସମସ୍ତ ଦିଗକୁ ଯାଞ୍ଚ କରିବେ । ତେବେ ନାକ୍ ମାନ୍ୟତା କିପରି ଭଲ ହେବ ସେଥିଲାଗି ଏବେଠୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ପୂରା ପ୍ରସ୍ତୁତ ହେଉଛନ୍ତି । ଏନେଇ ଆଗୁଆ ଘନ ଘନ ବୈଠକ ବସୁଛି । ନାକ୍ ଟିମ୍ ଆଗରେ କିପରି ଭଲ ଭାବେ ବିଶ୍ୱବିଦ୍ୟାଳୟର ସମସ୍ତ ସଫଳତାକୁ ଉପସ୍ଥାପନ କରିବେ ତାକୁ ନେଇ ରୋଡ୍ମ୍ୟାପ୍ ପ୍ରସ୍ତୁତ କରାଯାଉଛି । ବିଶେଷ ସୁତ୍ରରୁ ମିଳିଥିବା ତଥ୍ୟ ଅନୁଯାୟୀ, ଆସନ୍ତା ୨୫ ତାରିଖରେ ରମାଦେବୀ ଆସୁଥିବା ନାକ୍ ଟିମ୍ ୨୭ ତାରିଖ ପର୍ଯ୍ୟନ୍ତ ରହିବେ । ପ୍ରଥମ ଦିନରେ ବିଶ୍ୱବିଦ୍ୟାଳୟର କୁଳପତି, କୁଳସଚିବଙ୍କ ସମତେ ଅନ୍ୟ ବରିଷ୍ଠ ଅଧିକାରୀ ଓ ଅଧ୍ୟାପକଙ୍କ ସହ ଆଲୋଚନା କରିବେ । ଏହାପରେ ସମସ୍ତ ବିଭାଗ ପରିଦର୍ଶନ କରିବେ ।
ବିଭାଗୀୟ ମୁଖ୍ୟ ମାନେ ପାୱାର ପଏଣ୍ଟରେ ଡକ୍ୟୁମେଣ୍ଟ ଉପସ୍ଥାପନ କରିବେ । କୁଳପତି ବିଶ୍ୱବିଦ୍ୟାଳୟ ଉପରେ ଏକ ସ୍ୱତନ୍ତ୍ର ଉପସ୍ଥାପନ କରିବେ । ଏହାପରେ ଇଣ୍ଟରନାଲ୍ କ୍ୱାଲିଟି ସେଲ୍ (ଆଇକ୍ୟୁସି) ଉପସ୍ଥାପନା କରାଯିବ । ଅଧ୍ୟାପକ, ଛାତ୍ରୀଙ୍କ ସହ ନାକ୍ ସଦସ୍ୟମାନେ ଆଲୋଚନା କରିବେ । ପରିଦର୍ଶନ ସମୟରେ ହଷ୍ଟେଲ୍, ସ୍ପୋର୍ଟସ କାଉନ୍ସିଲ୍, ଗବେଷଣାଗାର, କ୍ରୀଡ଼ା ଭିତ୍ତିଭୂମି, କ୍ୟାଣ୍ଟିନ୍, ଗେଷ୍ଟହାଉସ୍, ଷ୍ଟାଡିୟମ୍ ଆଦିର ତଦାରଖ କରିବେ । ଆଲୁମିନି ଛାତ୍ରୀଙ୍କ ସହ ବୈଠକ କରିବେ । ଉଲ୍ଲେଖଯୋଗ୍ୟ, ରମାଦେବୀ ମହିଳା ମହାବିଦ୍ୟାଳୟ ଥିବା ସମୟରେ ଶେଷ ଥର ପାଇଁ ୨୦୧୪ରେ ନାକ୍ ପରିଦର୍ଶନ କରିଥିଲା । ଏହି ସମୟରେ କଲେଜକୁ ନାକ୍-ଏ ଗ୍ରେଡ୍ ମାନ୍ୟତା ମିଳିଥିଲା । ମାତ୍ର ୨୦୧୫ରେ ବିଶ୍ୱବିଦ୍ୟାଳୟ ମାନ୍ୟତା ପାଇବା ପରେ ଏହା ପ୍ରଥମ ନାକ୍ ପରିଦର୍ଶନ । ମାତ୍ର ଏସବୁ ସତ୍ତେ୍ୱ ଅଧ୍ୟାପକ, ଗବେଷଣା ପେପର, ଭିତ୍ତିଭୂମି ସମସ୍ୟାକୁ ନେଇ ଚିନ୍ତାରେ କର୍ତ୍ତୃପକ୍ଷ ।
