ଲାଉସେନ,୨୩/୦୮: ସ୍ୱିଜରଲାଣ୍ଡ୍ରେ ଚାଲିଥିବା ୱାଣ୍ଡା ଡାଏମଣ୍ଡ ଲିଗ୍ରେ ଭାରତର ନୀରଜ ଚୋପ୍ରାଙ୍କୁ ଦ୍ୱିତୀୟ ସ୍ଥାନରେ ସନ୍ତୁଷ୍ଟ ହେବାକୁ ପଡ଼ିଛି । ସେ ୮୯.୪୯ ମିଟର ଦୂର ଜାଭେଲିନ୍ ଫିଙ୍ଗି ସିଜନର ଶ୍ରେଷ୍ଠ ପ୍ରଦର୍ଶନ ଦେଇଥିଲେ ହେଁ ପ୍ରଥମ ସ୍ଥାନରେ ପହଞ୍ଚିବାରେ ବିଫଳ ହୋଇଛନ୍ତି । ଗ୍ରେନାଡ଼ାର ଆଣ୍ଡରସନ ପିଟର୍ସ ୯୦.୬୧ମିଟର ଜାଭେଲିନ୍ ଫିଙ୍ଗି ପ୍ରଥମ ସ୍ଥାନ ଦଖଲ କରିବା ସହ ମିଟ୍ ରେକର୍ଡ ଓ ସିଜନର ଶ୍ରେଷ୍ଠ ପ୍ରଦର୍ଶନ କରିଛନ୍ତି ।
ଲାଉସେନ୍ ପ୍ରଦର୍ଶନ ବଳରେ ଆଣ୍ଡରସନ ଓ ଜାକୁବ ଭାଲଡେଚ ଡାଏମଣ୍ଡ ଲିଗ୍କୁ ଯୋଗ୍ୟତା ଅର୍ଜନ କରିଛନ୍ତି । ଉଭୟ ଯଥାକ୍ରମେ ୨୧ ଓ ୧୬ ପଏଣ୍ଟ ଲେଖାଏଁ ଅର୍ଜନ କରିଛନ୍ତି । ନୀରଜ ଓ ଜୁଲିଆନ ୱେବର ୧୪ ପଏଣ୍ଟ ଲେଖାଏଁ ଅର୍ଜନ କରି ଯଥାକ୍ରମେ ତୃତୀୟ ଓ ଚତୁର୍ଥ ସ୍ଥାନରେ ରହିଛନ୍ତି । ଲାଉସେନ୍ରେ ଆଜି ୧୦ଜଣ ପ୍ରତିଯୋଗୀ ଶ୍ରେଷ୍ଠ ପ୍ରଦର୍ଶନ ପାଇଁ ଲଢେଇକୁ ଓହ୍ଲାଇଥିଲେ । ଏମାନଙ୍କ ମଧ୍ୟରେ ପ୍ୟାରିସ ଅଲିମ୍ପିକ୍ସରେ ଭାଗ ନେଇଥିବା ୮ଜଣ ପ୍ରତିଯୋଗୀ ପ୍ରତିଦ୍ୱନ୍ଦ୍ୱିତା କରୁଥିଲେ । ପିଟର୍ସଙ୍କ ପ୍ରଥମ ଥ୍ରୋ ୮୬.୩୬ ମିଟର ରହିଥିଲା । ସେହିପରି ଜୁଲିଆନ ୱେବର ୮୫.୦୭ ମିଟର ଓ ଜାପାନର ଡିନ ରୋଡେରିକ ଗେଙ୍ଗି ୮୩.୧୯ ମିଟର ଥ୍ରୋ କରିଥିଲେ । ନୀରଜଙ୍କ ପ୍ରଥମ ଥ୍ରୋ ୮୨.୧୦ ମିଟର ରହିଥିଲା ।
ପ୍ରତି ରାଉଣ୍ଡ୍ରେ ରୋମାଞ୍ଚ ବଢି ଚାଲିଥିଲା । ଶେଷ ପ୍ରୟାସ ପର୍ଯ୍ୟନ୍ତ ପ୍ରତ୍ୟେକ ପ୍ରତିଯୋଗୀ ନିଜ ନିଜ ପ୍ରଦର୍ଶନକୁ ଉନ୍ନତି କରିବା ପାଇଁ ଲାଗି ପଡ଼ିଥିଲେ । ଆଣ୍ଡରସନଙ୍କ ପରବର୍ତ୍ତୀ ୪ଟି ଥ୍ରୋ ଯଥାକ୍ରମେ ୮୮.୪୯, ୮୭.୪୦, ୮୫.୫୯ ଓ ୮୨.୨୨ମିଟର ରହିଥିଲା । ସେହିପରି ୱେବର ଦ୍ୱିତୀୟ ପ୍ରୟାସରେ ୮୭.୦୮ ମିଟର ଥ୍ରୋ କରିଥିଲେ । ୟୁକ୍ରେନ୍ର ଆର୍ତର ଫେଲଫନର୮୩.୩୮ ମିଟର ଥ୍ରୋ ସହ ଯଥାକ୍ରମେ ଦ୍ୱିତୀୟ ଓ ତୃତୀୟ ସ୍ଥାନ ଅକ୍ତିଆର କରିଥିଲେ । ନୀରଜ ପଞ୍ଚମ ରାଉଣ୍ଡ୍ ପର୍ଯ୍ୟନ୍ତ ୮୩.୨୧ମିଟର(ଦ୍ୱିତୀୟ ପ୍ରୟାସ) ଶ୍ରେଷ୍ଠ ପ୍ରଦର୍ଶନ ଦେଇ ଚତୁର୍ଥ ସ୍ଥାନରେ ରହିଥିଲେ ।
ଷଷ୍ଠ ରାଉଣ୍ଡ୍ ଦର୍ଶକଙ୍କ ହୋସ୍ ଉଡ଼ାଇ ଦେଇଥିଲା । ଆଣ୍ଡରସନ ୯୦.୬୧ ମିଟର ଥ୍ରୋ’ କରି ଉତ୍ସାହ ବଢାଇ ଦେଇଥିଲେ । ନୀରଜ ଷଷ୍ଠ ପ୍ରୟାସରେ ଜାଭେଲିନ୍କୁ ୮୯.୪୯ ମିଟର ଦୂରରେ ପହଞ୍ଚାଇ ଦେଇଥିଲେ । ମାତ୍ର ୫୧ସେଣ୍ଟି ମିଟର ପାଇଁ ସେ ୯୦ମିଟର ଛୁଇଁବାରେ ବିଫଳ ହୋଇଥିଲେ । ୱେବରଙ୍କ ଅନ୍ତିମ ଥ୍ରୋ’ ୮୨.୩୩ ମିଟର ରହିଥିଲା ଓ ନୀରଜଙ୍କ ଦ୍ୱିତୀୟ ସ୍ଥାନ ନିଶ୍ଚିତ ହୋଇଯାଇଥିଲା ।
