ଭୁବନେଶ୍ୱର,୧୧/୦୬: ଆସନ୍ତା ରବିବାର ଦିନ ଘରକୁ ଆସିବେ ମେଟ୍ରିକ୍ ଫେଲ୍ ବୋହୂ । କାରଣ ଜୀସାର୍ଥକ ଫିଲ୍ମସ୍ର ନୂଆ ସିନେମା ‘ବୋହୂ ଆମର ମେଟ୍ରିକ୍ ଫେଲ୍’ ଆସନ୍ତା ୧୬ ତାରିଖ ସନ୍ଧ୍ୟା ସାଢ଼େ ୬ଟାରେ ଜୀସାର୍ଥକରେ ଟେଲିଭିଜନ ପ୍ରିମିୟର ହେବ । ଏହାଦ୍ୱାରା ଏକ ନୂଆ ଓଡ଼ିଆ କାହାଣୀକୁ ଦର୍ଶକ ଦେଖିବାକୁ ପାଇବେ, ଯାହା ନିଃସ୍ୱାର୍ଥପର ପ୍ରେମକୁ ବଖାଣିବ ବୋଲି ସୋମବାର ସନ୍ଧ୍ୟାରେ ଅନୁଷ୍ଠିତ ପୋଷ୍ଟର୍ ଉନ୍ମୋଚନ ଉତ୍ସବରେ ଚ୍ୟାନେଲ୍ ପକ୍ଷରୁ ଏହି ସୂଚନା ଦିଆଯାଇଛି ।
କଥାବସ୍ତୁ ଅନୁଯାୟୀ, ଏକ ପ୍ରତିଜ୍ଞାରୁ ଫିଲ୍ମ କାହାଣୀର ଆରମ୍ଭ । ବନ୍ଧୁତାର ସମ୍ପର୍କକୁ ଆଉ ପାଦେ ଆଗକୁ ନେବାକୁ ଜଗଦୀଶ ଓ ଜଗବନ୍ଧୁ ପ୍ରତିଜ୍ଞା କରିଛନ୍ତି । ନିଜ ପୁଅ ଓ ଝିଅଙ୍କୁ ବିବାହ ବନ୍ଧନରେ ବାନ୍ଧିବେ । ପ୍ରତିଜ୍ଞା ମଧ୍ୟ ପୂରଣ ହୋଇଛି । ସିନେମାର କେନ୍ଦ୍ରବିନ୍ଦୁରେ ରହିଛି ଶିକ୍ଷାରେ ପଛୁଆ ସ୍ନେହୀ ତଥା ସର୍ବଗୁଣାସମ୍ପନ୍ନା ଗାଉଁଲି ଗୌରୀ । ତା’ ସହିତ ବିଜ୍ନେସ୍ମ୍ୟାନ୍ ବିବେକର ବିବାହ ହୋଇଛି । କିନ୍ତୁ ବିବେକ ମନରେ ଗୌରୀ ପାଇଁ ପ୍ରେମ ନାହିଁ ।
ଅପରପକ୍ଷରେ ବିବେକଙ୍କ ଘର ଲୋକଙ୍କ ସହ ଗୌରୀଙ୍କ ସମ୍ପର୍କ ଭଲ, କିନ୍ତୁ ତାଙ୍କୁ କେହି ପସନ୍ଦ କରନ୍ତିନି । ସେପଟେ ଚକ୍ରାନ୍ତ ଖେଳୁଛି ବିବେକର ବିଜ୍ନେସ୍ ପାର୍ଟନର୍ ତନୟା । ବିବେକଙ୍କ ସମ୍ପତ୍ତି ଉପରେ ତା’ର ନଜର ରହିଛି । ବିବେକ ଏହି କଥା ଜାଣିବା ପରେ ଭୁଲ୍ ବୁଝିପାରି ଗୌରୀ ସହିତ ମିଶି କେମିତି ସମସ୍ୟାକୁ ସାମ୍ନା କରୁଛି ତାହା ସିନେମାରେ ଦେଖିବାକୁ ମିଳିବ । ଏତେ ଭିତରେ ବି ଉଭୟଙ୍କ ପ୍ରେମକୁ ବି ଦେଖାଇବାକୁ ନିର୍ଦ୍ଦେଶକ ଭୁଲିନାହାନ୍ତି । ସୋମନାଥ ସାଇନ୍ ପ୍ରଡକ୍ସନ୍ସ ହାଉସ୍ ପ୍ରସ୍ତୁତ ଏହି ସିନେମାର ପ୍ରଯୋଜକ ସୁନୀଲ କୁମାର ପଟ୍ଟନାୟକ । ସେ ସିନେମାର ସଫଳତା ନେଇ ବହୁତ ଆଶାବାଦୀ ରହିଛନ୍ତି ।
ସିନେମାରେ ଦର୍ଶକ ଖୁବ୍ ମନୋରଞ୍ଜନ ପାଇବେ ବୋଲି ଜୀସାର୍ଥକ ଚିଫ୍ ଚ୍ୟାନେଲ୍ ଅଫିସର ପ୍ରତୀକ ସିଲ୍ କହିଛନ୍ତି । ଏହାର ନିର୍ଦ୍ଦେଶନା ଦେଇଛନ୍ତି ମୃତ୍ୟୁଞ୍ଜୟ ସାହୁ ଏବଂ ପ୍ରିୟବ୍ରତ କାହାଣୀ ଲେଖିଥିଲା ବେଳେ ସଙ୍ଗୀତ ଦେଇଛନ୍ତି ବୈଦ୍ୟନାଥ ଦାଶ । ପ୍ରମୁଖ ଗୌରୀ ଚରିତ୍ରରେ ଅଭିନୟ କରିଛନ୍ତି ମ୍ୟୁଜିକ୍ ଭିଡିଓ, ଧାରାବାହିକ ଓ ସିନେମାର ଚର୍ଚ୍ଚିତ ନାୟିକା ନିକିତା ମିଶ୍ର । ନାୟକ ଭୂମିକାରେ ଓଲିଉଡ୍ର ପରିଚିତ ଚେହେରା ରାକେଶ ଦେଓ ଥିଲାବେଳେ ଅନ୍ୟାନ୍ୟ ଭୂମିକାରେ ଚୌଧୁରୀ ଜୟପ୍ରକାଶ ଦାସ, ପୁଷ୍ପା ପଣ୍ଡା, ଅନନ୍ତ ମିଶ୍ର ଓ ଧରିତ୍ରୀ ଖଣ୍ଡୁଆଳ ପ୍ରମୁଖ ଅଛନ୍ତି ।
