ନୂଆଦିଲ୍ଲୀ: ଦକ୍ଷିଣ ଫିନଲ୍ୟାଣ୍ଡର ଏକ ବିଦ୍ୟାଳୟରେ ଜଣେ ୧୨ ବର୍ଷର ଛାତ୍ର ଗୁଳିକାଣ୍ଡ ଘଟାଇଛି । ଏହି ଗୁଳିକାଣ୍ଡ ପରେ ବିଦ୍ୟାଳୟରେ ଉତ୍ତେଜନା ଦେଖାଦେଇଥିଲା । ଏହି ଘଟଣାରେ ଜଣେ ଛାତ୍ରର ମୃତ୍ୟୁ ହୋଇଥିବା ବେଳେ ଅନ୍ୟ ଦୁଇଜଣ ଛାତ୍ର ଗୁରୁତର ହୋଇଛନ୍ତି । ଏହି ମାମଲା ସମ୍ପର୍କରେ ସୂଚନା ଦେଇ ପୋଲିସ କହିଛି ଯେ, ଅଭିଯୁକ୍ତ ଛାତ୍ରକୁ ଗିରଫ କରାଯାଇଛି ।
ତେବେ ପୋଲିସର ସୂଚନାନୁସାରେ, ମଙ୍ଗଳବାର ସକାଳ ପ୍ରାୟ ୯ ଟା ସମୟରେ ରାଜଧାନୀ ହେଲସିଙ୍କି ଉପକଣ୍ଠରେ ଥିବା ବନ୍ତା ସହରରେ ପ୍ରାୟ ୮ଶହ ଛାତ୍ରଛାତ୍ରୀ ଥିବା ଏକ ବିଦ୍ୟାଳୟରେ ଗୁଳି ବିନିମୟ ହୋଇଥିବାର ସୂଚନା ମିଳିଥିଲା । ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ସ୍କୁଲକୁ ଘେରି ରହିଥିଲା ।
ପୋଲିସ କହିଛି ଯେ ସନ୍ଦିଗ୍ଧ ଏବଂ ଆହତଙ୍କ ବୟସ ପ୍ରାୟ ୧୨ ବର୍ଷ ହେବ । ପରେ ହେଲସିଙ୍କି ଅଞ୍ଚଳରେ ଅଭିଯୁକ୍ତକୁ ଗିରଫ କରାଯାଇଥିଲା । ତାଙ୍କ ପାଖରୁ ଏକ ବନ୍ଧୁକ ମିଳିଥିଲା । ଆହତ ଛାତ୍ର ମାନଙ୍କର ବର୍ତ୍ତମାନର ଅବସ୍ଥା ବିଷୟରେ କୌଣସି ସ୍ପଷ୍ଟ ଭାବେ ସୂଚନା ମିଳିନାହିଁ । ଫିନଲ୍ୟାଣ୍ଡ ପ୍ରଧାନମନ୍ତ୍ରୀ ପେଟେରୀ ଓର୍ପୋ ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ ପୋଷ୍ଟ କରିଛନ୍ତି ଯେ ଏହି ଗୁଳି ବିନିମୟରେ ସେ ଅତ୍ୟନ୍ତ ଦୁଃଖିତ।
ପୋଲିସର ସୂଚନାନୁସାରେ, ଏହି ଘଟଣାର ତଦନ୍ତ ଚାଲିଛି । ବର୍ତ୍ତମାନ ପର୍ଯ୍ୟନ୍ତ ଅଭିଯୁକ୍ତ ଛାତ୍ର କାହିଁକି ଗୁଳି ଚଳାଇଛି ତାହା ସ୍ପଷ୍ଟ ହୋଇନାହିଁ। ଅଭିଯୁକ୍ତଙ୍କ ବିରୋଧରେ ହତ୍ୟା ଏବଂ ହତ୍ୟା ଉଦ୍ୟମ ମାମଲା ରୁଜୁ ହୋଇଛି ।
