ଖଜୁରିପଡା,୯/୬(ଆପ୍ର) : ଖଜୁରିପଡା ଥାନା ଅନ୍ତର୍ଗତ ନିଶ୍ବାସ କଲେଜ ପାଖରେ ସିରିଜ୍  ଦୁର୍ଘଟଣାରେ ଜଣେ ଯୁବକଙ୍କ ମୃତ୍ୟୁ ହୋଇଥିବା ବେଳେ ୬ଜଣ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ଗୋଟିଏ ପରିବାରର ତିନି ଜଣଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତରିତ କରାଯାଇଛି। 

ସୂଚନା ଅନୁଯାୟୀ, ଏକ ମୋଟର ସାଇକେଲରେ ଚାରିଛକ ଥାନା ଅନ୍ତର୍ଗତ ଗୁଣ୍ଡ୍ରିବିଡାର ତାପସ ପ୍ରଧାନ (୧୯) ଏବଂ ଦୁତିପଡାର ନାଶିରୁଦ୍ଦିନ ଶାହା କହଁର (୧୮) ଫୁଲବାଣୀରୁ ଦୂତିପଡ଼ା ଯାଉଥିଲେ। ଦ୍ରୁତ ଗତିରେ ଯାଉଥିବା ବାଇକଟି ପ୍ରଥମେ ଫୁଲବାଣୀ ସହର ଉପକଣ୍ଠ ନିଶ୍ବାସ କଲେଜ ନିକଟରେ ବିପରୀତ ଦିଗରୁ ଆସୁଥିବା ଏକ ବାଇକକୁ ଧକ୍କା ଦେଇଥିଲା । ଫଳରେ ଦୁଇ ବାଇକ ଆରୋହୀ ଆହତ ହୋଇଥିଲେ। ପରେ ପରେ ବାଇକଟି ଅନ୍ୟ ଏକ   ସ୍କୁଟି ସହିତ ବାଡେଇ ହୋଇଥିଲା। ଫଳରେ ସ୍କୁଟିରେ ବସିଥିବା ଗଞ୍ଜାମ ଜିଲ୍ଲା ବେଲଗୁଣ୍ଠା ଥାନା ଲୁଣିଝୋଲା ଗ୍ରାମର ଗୋଟିଏ ପରିବାରର ବୁଲୁ   ଗଉଡ,ଶାରଦା ଗଉଡ ଓ ଚିନ୍ମୟ ଗଉଡ ଗୁରୁତର ହୋଇଥିଲେ। ବୁଲୁ ଫୁଲବାଣୀ ସର୍କଲ ଜେଲରେ ଚାକିରୀ କରନ୍ତି ଓ ସେ ପରିବାର ସହିତ ଖଜୁରୀପଡା ଯାଇ ଫେରୁଥିଲେ ବୋଲି ଜଣାପଡିଛି।  ବାଇକ୍ ଚାଳକ ତାପସ ପ୍ରଧାନଙ୍କ ଘଟଣା ସ୍ଥଳରେ ମୃତ୍ୟୁ ହୋଇଥିଲା। ଅନ୍ୟ ଆହତ ମାନଙ୍କୁ ଫୁଲବାଣୀ ମୂଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ତେବେ ବୁଲୁ, ଶାରଦା ଓ ଚିନ୍ମୟ ଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ବ୍ରହ୍ମପୁର ସ୍ଥାନାନ୍ତର କରାଯାଇଥିବା ଜଣାପଡିଛି। ଏ ନେଇ ଖଜୁରୀପଡ଼ା ଥାନାରେ ୯୩/୨୪ରେ ଏକ ମାମଲା ରୁଜୁ କରାଯାଇଥିବା ତଦନ୍ତକାରୀ ଅଧିକାରୀ ଦୀନବନ୍ଧୁ ପ୍ରଧାନ କହିଛନ୍ତି। 

ଆହୁରି ପଢନ୍ତୁ : ଟିଉସନରୁ ସାଇକେଲରେ ଘରକୁ ଫେରୁଥିଲେ ନାବାଳକ, ଗୋଡ଼ରେ ଚଢ଼ିଗଲା ହାଇଓ୍ବା