ନୂଆଦିଲ୍ଲୀ: କୁଖ୍ୟାତ ଆତଙ୍କବାଦୀ ଏବଂ ଅଲ କାଏଦାର ମୁଖ୍ୟ ଓସାମା ବିନ ଲାଡେନ୍ର ପୁଅ ହମଜା ବିନ ଲାଡେନ ବଞ୍ଚିଛି । ୨୦୧୯ରେ ଆମେରିକା ପକ୍ଷରୁ ହୋଇଥିବା ଏୟାର ଷ୍ଟ୍ରାଇକରେ ହମଜାର ମୃତ୍ୟୁ ହୋଇଥିବା ନେଇ ଦାବି ହୋଇଥିଲା । କିନ୍ତୁ ଏବେ ‘ଦ ମିରର୍’ରେ ପ୍ରକାଶିତ ରିପୋର୍ଟ ଅନୁସାରେ, ହମଜା ବିନ ଲାଡେନ ଜୀବିତ ରହିଛି ଏବଂ ଆଫଗାନିସ୍ତାନରେ ଅଲ କାଏଦା ଆତଙ୍କବାଦୀ ସଂଗଠନର ନେତୃତ୍ବ ନେଉଛି । ହମଜା ତା’ର ଭାଇ ଅବଦୁଲ୍ଲା ବିନ ଲାଡେନକୁ ସାଥି କରି ଆଫଗାନିସ୍ତାନରେ ଅଲ କାଏଦାର ନେଟୱର୍କ ବିସ୍ତାର କରିବାରେ ଲାଗିଛି । ତାଲିବାନ ବିରୋଧୀ ମିଲିଟାରୀ ସଂଗଠନ ନ୍ୟାଶନାଲ ମୋବିଲାଇଜେସନ ଫ୍ରଣ୍ଟ (ଏନଏମଏଫ) ମଧ୍ୟ ବିସ୍ତୃତ ଭାବେ ହମଜା ଓ ତା’ର ସହଯୋଗୀଙ୍କ ଅପରେସନ ସମ୍ପର୍କରେ ରିପୋର୍ଟ ପ୍ରକାଶ କରିଛି ।
ରିପୋର୍ଟ ଅନୁସାରେ, ଆତଙ୍କର କ୍ରାଉନ ପ୍ରିନ୍ସ ଭାବେ ପରିଚୟ ହାସଲ କରିଥିବା ବ୍ୟକ୍ତି ଜଣକ ନର୍ଦ୍ଦନ ଆଫଗାନିସ୍ତାନରେ ରହିଛି । ତା’ ଚାରିପାଖରେ ସବୁବେଳେ ୪୫୦ ଜଣ ସ୍ନାଇପର ସୁରକ୍ଷା ଦେଉଛନ୍ତି । କାବୁଲରୁ ନିର୍ବାଚିତ ସରକାର ୨୦୨୧ରେ ହଟିବା ପରେ ଆଫଗାନିସ୍ତାନ ଧୀରେଧୀରେ ବିଭିନ୍ନ ଆତଙ୍କବାଦୀ ସଂଗଠନ ଗୁଡ଼ିକର ତାଲିମ ସ୍ଥାନ ପାଲଟି ଯାଇଛି । ହମଜା ବିନ ଲାଡେନ ନିଜର ସହଯୋଗୀମାନଙ୍କ ସହ ପଞ୍ଜଶିରରେ ଥିବା ଦାରା ଅବଦୁଲ୍ଲା ଖେଲ ଜିଲ୍ଲାକୁ ଚାଲି ଯାଇଛି।
ସେଠାରେ ତାକୁ ୪୫୦ ଆରବ ଓ ପାକିସ୍ତାନୀ ସୁରକ୍ଷା ଦେଉଛନ୍ତି । ତା’ କମାଣ୍ଡରେ ଏବେ ଅଲ କାଏଦା ପୁଣି ସଂଗଠିତ ହେଉଛି ଓ ପଶ୍ଚିମ ଦେଶଗୁଡ଼ିକ ଉପରେ ଆକ୍ରମଣ କରିବା ପାଇଁ ଯୋଜନା ପ୍ରସ୍ତୁତ କରୁଛି ।୨୦୧୯ରେ ଆମେରିକା କରିଥିବା ଏୟାର ଷ୍ଟ୍ରାଇକରେ ହମଜା ପ୍ରାଣ ହରାଇଥିବା ଦାବିକୁ ଏନଏମଏଫ ରିପୋର୍ଟ ଖଣ୍ଡନ କରିଛି। ଏଥିରେ କୁହାଯାଇଛି ଯେ, ଲାଡେନ ନିହତ ହେବା ପରେ ଅୟମାନ ଅଲ ଜୱାହିରି ଅଲକାଏଦା କଥା ବୁଝିବା ଆରମ୍ଭ କରିଥିଲା। ତା’ ପାଖରେ ହମଜା ରହିଥିଲା। ଜୱାହିରି ସହ ସେ ମିଳିତ ଭାବେ କାମ କରୁଥିଲା। ତେଣୁ ମୃତ୍ୟୁ ଖବରରେ କୌଣସି ସତ୍ୟତା ନଥିବା ରିପୋର୍ଟରେ କୁହାଯାଇଛି।
ଆମେରିକା ଓ ଅନ୍ୟ ଦେଶଗୁଡ଼ିକ ଉପରେ ହମଲା କରିବା ପାଇଁ ହମଜାର ଅଡିଓ ଓ ଭିଡିଓ ଭାଇରାଲ ହେବା ପରେ ତା’ ମୃତ୍ୟୁ ଖବର ସାମ୍ନାକୁ ଆସିଥିଲା। ହେଲେ ମୃତ୍ୟୁର ତାରିଖ ଓ ସ୍ଥାନ ବିଷୟରେ ସ୍ପଷ୍ଟ ସୂଚନା ମିଳିନଥିଲା । ପେଣ୍ଟାଗନ ମଧ୍ୟ ଏ ସମ୍ପର୍କରେ କୌଣସି ପ୍ରତିକ୍ରିୟା ଦେଇ ନଥିଲା । ହମଜାକୁ ଆମେରିକା ବିଶ୍ୱସ୍ତରୀୟ ଆତଙ୍କବାଦୀ (ଗ୍ଲୋବାଲ ଟେରୋରିଷ୍ଟ) ଭାବେ ଘୋଷଣା କରିଥିଲା ଓ ସେ ଇରାନରେ ଗୃହବନ୍ଦୀ ହୋଇ ରହିଥିବା କୁହାଯାଉଥିଲା। ହେଲେ ସେ ଏବେ ଆଫଗାନିସ୍ତାନରେ ସକ୍ରିୟ ରହିଥିବା ରିପୋର୍ଟ ପ୍ରକାଶ ପାଇଛି।
ସାଉଦି ଆରବର ଜେଦାହରେ ଜନ୍ମଗ୍ରହଣ କରିଥିଲା ହମଜା ଲାଡେନ । ଏହା ପରେ ଏହାପରେ ସେ ଇରାନରେ ତା’ର ମା’ ସହ ରହିଥିଲା। ହମଜାର ବାପା ଓସାମା ବିନ ଲାଡେନକୁ ଆମେରିକାର ସ୍ପେଶାଲ ଫୋର୍ସ ସ୍ୱତନ୍ତ୍ର ଅପରେସନ ମାଧ୍ୟମରେ ହତ୍ୟା କରିଥିଲା । ସେ ପାକିସ୍ତାନର ଆବୋଟ୍ଟାବାଦରେ ଲୁଚି ଥିବା ବେଳେ ତା’କୁ ୨୦୧୧ରେ ହତ୍ୟା କରାଯାଇଥିଲା। ଓସାମା ବିନ ଲାଡେନ ଆମେରିକା ୯/୧୧ ଆକ୍ରମଣର ମାଷ୍ଟରମାଇଣ୍ଡ ଥିଲା । ଏହି ଆକ୍ରମଣରେ ୩ ହଜାର ଲୋକ ପ୍ରାଣ ହରାଇଥିଲେ । ତେବେ ଓସାମା ବିନ ଲାଡେନର ମୃତ୍ୟୁ ପରେ ଅଲ କାଏଦାର ନେତୃତ୍ବ ନେଉଛି ତା ପୁଅ ହମଜା ଲାଡେନ ।
