ନୂଆଦିଲ୍ଲୀ ୨୬/୦୯: ପ୍ରାୟ ଲୋକ ଡାଳିମ୍ବରୁ ଚୋପା ଛଡାଇବା ପରେ ଫିଙ୍ଗି ଦେଇଥାନ୍ତି । କିନ୍ତୁ ଜାଣନ୍ତି କି ଏହା ଗଛମାନଙ୍କ ପାଇଁ ପୋଷକ ତତ୍ତ୍ୱ ଭାବେ କାମ କରିଥାଏ । ଚାଲନ୍ତୁ ଜାଣିବା ବଗିଚାରେ କେମିତି ଡାଳିମ୍ବ ଚୋପାକୁ ଉପଯୋଗ କରିପାରିବେ । ଶରୀରକୁ ସୁସ୍ଥ ରଖିବା ପାଇଁ ଆମେ ବିଭିନ୍ନ ଫଳ ଖାଇଥାଉ । କିନ୍ତୁ ଫଳ ଖାଇବା ପରେ ମଞ୍ଜି ଓ ଚୋପାକୁ ଅନାବଶ୍ୟକ ଭାବି ଫିଙ୍ଗି ଦେଇଥାଉ । କିନ୍ତୁ ଜାଣନ୍ତି କି ଏସବୁକୁ ଫିଙ୍ଗିବା ପରିବର୍ତ୍ତେ ବଗିଚାରେ ଥିବା ଗଛମାନଙ୍କ ପାଇଁ ପୋଷକ ତତ୍ତ୍ୱ ଭାବେ ବ୍ୟବହାର କରିପାରିବେ । ସେଓ ଓ ପିଜୁଳିକୁ ବହୁ ଲୋକ ଚୋପା ସହ ଖାଇଥାନ୍ତି । କିନ୍ତୁ ଡାଳିମ୍ବ, ନାସପାତି ଆଦି କେତେକ ଫଳର ଚୋପା ଓ ମଞ୍ଜି ବାହାର କରିବାକୁ ପଡିଥାଏ । ଏହାକୁ ଫିଙ୍ଗିବା ପରିବର୍ତ୍ତେ ଗଛମାନଙ୍କର ଖାଦ୍ୟ ବା ପେଷ୍ଟିସାଇଡ୍ ସ୍ପ୍ରେ ଭାବେ ବ୍ୟବହାର କରିପାରିବେ ।
ଡାଳିମ୍ବ ଚୋପା ଗଛର ପୋଷକ ତତ୍ତ୍ୱ: ପ୍ରାୟ ସମସ୍ତେ ଗଛ ପାଇଁ ବଜାରରୁ ପୋଷକ ତତ୍ତ୍ୱ କିଣିଥାନ୍ତି । କିନ୍ତୁ ବିନା ପଇସା ଖର୍ଚ୍ଚରେ ମଧ୍ୟ ଡାଳିମ୍ବ ଚୋପାକୁ ପ୍ରାକୃତିକ ଖାଦ୍ୟ ଭାବେ ବ୍ୟବହାର କରିପାରିବେ । ଏଥିପାଇଁ ଡାଳିମ୍ବ ଚୋପାକୁ ଗୋବର ସହ ମିଶାଇ କିଛି ଦିନ ପାଇଁ ଢାଙ୍କି ରଖି ଦିଅନ୍ତୁ । ଏକ ସପ୍ତାହ ପରେ ଏହାକୁ ବିଭିନ୍ନ ଗଛ ମୂଳରେ ଦେଇପାରିବେ । ଗଛ ମୂଳରେ ବ୍ୟବହାର କରିବା ପୂର୍ବରୁ ଏହାକୁ ଭଲ ଭାବେ ମିଶାଇ ନିଅନ୍ତୁ ।
ଚୋପାକୁ ଶୁଖାଇ କରିପାରିବେ ପାଉଡର୍ ଫର୍ଟିଲାଇଜର୍: ଡାଳିମ୍ବ ଚୋପାକୁ ଛଡାଇ ଭଲ ଭାବେ ଶୁଖାଇ ଗୁଣ୍ଡ କରି ଗଛ ମୂଳରେ ବ୍ୟବହାର କରିପାରିବେ । ପ୍ରଥମେ ଚୋପାଗୁଡିକୁ ଏକାଠି କରି ଖରାରେ ଶୁଖାଇ ନିଅନ୍ତୁ । ଭଲ ଭାବେ ଶୁଖିଯିବା ପରେ ଏହାକୁ ଗ୍ରାଇଣ୍ଡରରେ ପେଶି ନିଅନ୍ତୁ । ଏହି ଗୁଣ୍ଡକୁ କୌଣସି ଏୟାର୍ଟାଇଟ୍ କଣ୍ଟେନର୍ରେ ରଖି ଦିଅନ୍ତୁ । ଆବଶ୍ୟକ ବେଳେ ଏହି ଗୁଣ୍ଡରେ ମାଟି ମିଶାଇ ଗଛ ମୂଳରେ ଦେଇପାରିବେ ।
କରିପାରିବେ ଲିକ୍ୱିଡ୍ ଫର୍ଟିଲାଇଜର୍: ଡାଳିମ୍ବ ଚୋପାକୁ ନେଇ ଲିକ୍ୱିଡ୍ ଫର୍ଟିଲାଇଜର୍ ପ୍ରସ୍ତୁତ କରିପାରିବେ । ଏହାକୁ ନେଇ ଗଛର ପତ୍ରମାନଙ୍କ ଉପରେ ସ୍ପ୍ରେ କରାଯାଇପାରିବ । ପ୍ରଥମେ ଡାଳିମ୍ବ ଚୋପାକୁ ଏକାଠି କରି ନିଅନ୍ତୁ । ଏବେ ଅଧା ଲିଟର ପାଣିରେ ଡାଳିମ୍ବ ଚୋପା, ଅଣ୍ଡାଖୋଳ ପାଉଡର୍ ଓ ଏପସମ୍ ଲୁଣକୁ ଭଲ ଭାବେ ମିଶାଇ ନିଅନ୍ତୁ । ସେହିପରି ଡାଳିମ୍ବ ଚୋପାକୁ କୋରି ନିଅନ୍ତୁ ଏବେ ଏଥିରେ ଅଳ୍ପ ପାଣି ଦେଇ ଛାଡ଼ି ଦିଅନ୍ତୁ । ଘୋଳ ଗାଢା ହୋଇଯିବା ପରେ ଏହାକୁ ଏକ ପାତ୍ରରେ ରଖି ନିଅନ୍ତୁ । ଆବଶ୍ୟକ ବେଳେ ଏହି ଗାଢା ଘୋଳ ଓ ପାଣିକୁ ୧:୫ ମାତ୍ରାରେ ବଗିଚାରେ ଥିବା ଗଛର ପତ୍ର ଉପରେ ସ୍ପ୍ରେ କରନ୍ତୁ । ଡାଳିମ୍ବ ଚୋପାର ବ୍ୟବହାର ଦ୍ୱାରା ମାଟିରେ ହେଉଥିବା ଜୀବାଣୁ ଓ ଫିମ୍ପିର ସଂକ୍ରମଣ କମ୍ ରହିଥାଏ ।
