ନୂଆଦିଲ୍ଲୀ,୨୭/୦୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ରାତିରେ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ସହ ଟେଲିଫୋନ୍‌ରେ କଥା ହୋଇଛନ୍ତି । ଉଭୟ ନେତା ଭାରତ- ଆମେରିକା ଦ୍ୱିପାକ୍ଷିକ ସମ୍ପର୍କ ଏବଂ କ୍ୱାଡ  ଉପରେ ବିସ୍ତୃତ ଆଲୋଚନା କରିଥିଲେ ।  ସେହିଭଳି ୟୁକ୍ରେନ ସମେତ ବିଶ୍ୱର ବିଭିନ୍ନ  ପ୍ରସଙ୍ଗ ଉପରେ ସେମାନଙ୍କ ଭିତରେ ଆଲୋଚନା  ହୋଇଥିଲା । 

ୟୁକ୍ରେନରେ ଶାନ୍ତି ଓ ସ୍ଥିରତା ପାଇଁ ଭାରତର ସମର୍ଥନ ସମ୍ପର୍କରେ ମଧ୍ୟ ମୋଦି ଦୋହରାଇଥିଲେ । ଉଭୟ ନେତାଙ୍କ  ଭିତରେ ବାଂଲାଦେଶର ସାମ୍ପ୍ରତିକ ରାଜନୈତିକ  ପରିସ୍ଥିତି ଉପରେ ଚର୍ଚ୍ଚା ହୋଇଥିଲା । ସେମାନେ  ବାଂଲାଦେଶରେ ତୁରନ୍ତ ସ୍ଥିତି ସ୍ୱାଭାବିକ ହେବା  ଉପରେ ଗୁରୁତ୍ୱାରୋପ କରିଥିଲେ । ଏଥିସହ ବାଂଲାଦେଶରେ ଆଇନ ଶୃଙ୍ଖଳା ପରିସ୍ଥିତିରେ  ତୁରନ୍ତ ସୁଧାର ଅଣାଯିବା ଏବଂ ସଂଖ୍ୟାଲଘୁ ବିଶେଷକରି ହିନ୍ଦୁଙ୍କ ବିରୋଧରେ ହେଉଥିବା ହିଂସା ବନ୍ଦ କରିବା ଉପରେ ଉଭୟ ମୋଦି ଓ  ବାଇଡେନ ଜୋର୍‌ ଦେଇଥିଲେ । ମୋଦି ତାଙ୍କର  ୟୁକ୍ରେନ ଗସ୍ତ ସମ୍ପର୍କରେ ବାଇଡେନଙ୍କୁ ମଧ୍ୟ ଅବଗତ କରିଥିଲେ । ବାଇଡେନଙ୍କ ସହ କଥା  ହୋଇଥିବା ନେଇ ମୋଦି ତାଙ୍କ ସୋସିଆଲ ମିଡିଆ ଏକ୍ସରେ ଉଲ୍ଲେଖ କରିଛନ୍ତି ।