ଗଞ୍ଜାମ, ୪।୦୨: ଗଞ୍ଜାମ ଜିଲ୍ଲା ଉତ୍ତର ଘୁମୁସର ବନଖଣ୍ଡ ଅଧୀନ ଜଗନ୍ନାଥ ପ୍ରସାଦ ରେଞ୍ଜରେ ହାତୀଙ୍କ ସୁରକ୍ଷା ପାଇଁ ସଚେତନ କାର୍ଯ୍ୟକ୍ରମ । ସେଭ୍ ଏଲିଫ୍ୟାଣ୍ଟ ଫାଉଣ୍ଡେସନ୍ ପକ୍ଷରୁ ଏହାର ପ୍ରତିଷ୍ଠାତା ତଥା ଲୋକଯୁକ୍ତ ସଭ୍ୟ ଦେବବ୍ରତ ସ୍ୱାଇଁ ଜଗନ୍ନାଥ ପ୍ରସାଦଠାରେ ପହଁଞ୍ଚି ହାତୀଙ୍କ ସୁରକ୍ଷା ପ୍ରତି ସମସ୍ତଙ୍କୁ ସଚେତନ କରାଇଥିଲେ । ଘୁମୁସର ଜଙ୍ଗଲରେ ସଦା ସର୍ବଦା ହାତୀଙ୍କ ଚଳପ୍ରଚଳ ରହୁଥିବାରୁ ଏଠି ପ୍ରତ୍ୟେକ ରେଞ୍ଜରେ ଗଜ ସାଥି ଗଠନ କରାଯାଇଛି । 

ଏଥିସହ ସେମାନଙ୍କୁ ହାତୀ ବିଷୟରେ ସ୍ୱତନ୍ତ୍ର ଶିକ୍ଷା ଦିଆଯାଉଛି । ଯାହା ହାତୀର ଗତିବିଧକୁ ଲକ୍ଷ ରଖିବା, ହାତୀ ବିଷୟରେ ଲୋକଙ୍କୁ ଜଣାଇବା, ହାତୀ ଫସଲ ଖାଇବା ସମୟରେ ତାକୁ ସୁରକ୍ଷିତ ଘଉଡ଼ାଇବା ଓ ହାତୀ ଫସଲ କ୍ଷତି କଲେ ତା’ର କ୍ଷତିପୂରଣ କିପରି ପ୍ରଦାନ କରାଯିବ ତା’ ଉପରେ ଅଧିକ ସଚେତନ କରାଯାଇଛି । ଉତ୍ତର ଘୁମୁସରର ଉଭୟ ବନଖଣ୍ଡର ଡିଏଫ୍‌ଓ ଉପସ୍ଥିତ ରହିବା ସହିତ ଗଞ୍ଜାମ ଆର୍‌ସିସି ଡକ୍ଟର ସଞ୍ଜୟ କୁମାର ସ୍ୱାଇଁ ଯୋଗ ଦେଇ ହାତୀଙ୍କ ସୁରକ୍ଷା ଦିଗରେ ଅଧିକ ଗୁରୁତ୍ୱ ଦେଇଥିଲେ ।