କୋଲକାତା: ଆରଜି କର ମେଡିକାଲ କଲେଜ ଓ ହସ୍ପିଟାଲରେ ମହିଳା ଡାକ୍ତରଙ୍କୁ ଦୁଷ୍କର୍ମ ଏବଂ ହତ୍ୟା ମାମଲାକୁ ନେଇ ଡାକ୍ତରମାନେ ଆନ୍ଦୋଳନ ଜାରି ରଖିଛନ୍ତି । ଆନ୍ଦୋଳନ ବନ୍ଦ କରି କାର୍ଯ୍ୟରେ ଯୋଗ ଦେବାକୁ ଉଭୟ ସୁପ୍ରିମକୋର୍ଟ ଏବଂ ରାଜ୍ୟ ସରକାର କହିବା ପରେ ମଧ୍ୟ ଡାକ୍ତରମାନେ ପୀଡ଼ିତାଙ୍କୁ ନ୍ୟାୟ ଦାବିରେ ଅଡ଼ି ବସିଛନ୍ତି ଶତାଧିକ ଡାକ୍ତର । ଏହାରି ମଧ୍ୟରେ ପଶ୍ଚିମବଙ୍ଗ ସରକାର ଆନ୍ଦୋଳନରତ ଡାକ୍ତରଙ୍କୁ ଆଲୋଚନା ପାଇଁ ଆମନ୍ତ୍ରଣ କରିଛନ୍ତି । ଆଜି ସନ୍ଧ୍ୟା ୬ରେ ଡାକ୍ତର ଏବଂ ସରକାରଙ୍କ ମଧ୍ୟରେ ଆଲୋଚନା ହେବାକୁ ଯାଉଛି । 

ମୁଖ୍ୟମନ୍ତ୍ରୀ ମମତା ବାନାର୍ଜୀ ଡାକ୍ତରଙ୍କ ସହ ଆଲୋଚନା କରିବା ଲାଗି ୧୨-୧୫ ଜଣ ସଦସ୍ୟଙ୍କୁ ନେଇ ଏକ ଟିମ୍‌ ଗଠନ କରିଥିବା ଜଣାପଡ଼ିଛି ।  ଏହା ପୂର୍ବରୁ ମଧ୍ୟ ଡାକ୍ତରମାନଙ୍କୁ ଆଲୋଚନା କରିବା ଲାଗି ଆମନ୍ତ୍ରଣ କରିଥିଲେ ମୁଖ୍ୟମନ୍ତ୍ରୀ । ହେଲେ ଏହାକୁ ସେମାନେ ପ୍ରତ୍ୟାଖାନ କରିଦେଇଥିଲେ । ଡାକ୍ତରମାନେ କୋଲକାତାର ସ୍ବାସ୍ଥ୍ୟ ଭବନ ସାମ୍ନାରେ ଆନ୍ଦୋଳନ ଜାରି ରଖିଛନ୍ତି । ଅଗଷ୍ଟ ୯ ମାମଲାରେ ଦୋଷୀଙ୍କୁ ଦଣ୍ଡ ମିଳୁ ଏବଂ ଯେଉଁମାନେ ମାମଲାକୁ ଚାପି ଦେବାକୁ ଚେଷ୍ଟା କରିଥିଲେ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି ଆନ୍ଦୋଳନରତ ଡାକ୍ତର । 

ଏହା ବ୍ୟତୀତ ସେମାନେ କୋଲକାତା ପୋଲିସ କମିଶନରଙ୍କ ସମେତ ଅନ୍ୟ ଶୀର୍ଷ ଅଧିକାରୀଙ୍କ ଇସ୍ତଫା ଦାବି କରିଛନ୍ତି । ଡାକ୍ତରମାନଙ୍କ ପ୍ରତିନିଧି ଡ. ଅନିକେତ ମଣ୍ଡଳ କହିଛନ୍ତି ଯେ, ‘ଆମେ ଗଣମାଧ୍ୟମରୁ ଜାଣିବାକୁ ପାଇଲୁ ମୁଖ୍ୟମନ୍ତ୍ରୀ ଆମ ସହ ଆଲୋଚନା କରିବାକୁ ଚାହୁଁଛନ୍ତି । ଆମେ ମେଲ୍‌ ଜରିଆରେ ମୁଖ୍ୟମନ୍ତ୍ରୀଙ୍କ ପାଖକୁ ଆମର ଦାବିଗୁଡ଼ିକ ପଠାଇ ଦେଇଛୁ । ଆମେ ମଧ୍ୟ ମୁଖ୍ୟମନ୍ତ୍ରୀଙ୍କୁ ଭେଟିବାକୁ ଚାହୁଁଛୁ ।’ 

କୋଲାକାତା ଦୁଷ୍କର୍ମ ଓ ହତ୍ୟା ମାମଲାରେ ଆରମ୍ଭ ହୋଇଥିବା ଡାକ୍ତର ଆନ୍ଦୋଳନ ଆଜି ୩୩ ଦିନରେ ପ୍ରବେଶ କରିଛି । ଏହାରି ମଧ୍ୟରେ ମାମଲାକୁ ନେଇ ବିଭିନ୍ନ ତଥ୍ୟ ସାମ୍ନାକୁ ଆସିଛି । ଦୁର୍ନୀତି ମାମଲାରେ ଆରଜି କର ମେଡିକାଲର ପ୍ରିନ୍ସିପାଲ ସନ୍ଦୀପ ଘୋଷଙ୍କୁ ସିବିଆଇ ଗିରଫ କରିସାରିଛି । ଆନ୍ଦୋଳନରତ ଡାକ୍ତରମାନେ ସ୍ବାସ୍ଥ୍ୟ ମନ୍ତ୍ରାଳୟର ଶୀର୍ଷ ଅଧିକାରୀଙ୍କ ଇସ୍ତଫା ଦାବି କରିଛନ୍ତି । ବିଶେଷ କରି ସ୍ବାସ୍ଥ୍ୟ ସଚିବ ନାରାୟଣ ସ୍ବରୂପ ନିଗମଙ୍କ ଇସ୍ତଫା ଦାବି କରିଛନ୍ତି ଡାକ୍ତର ।