ମୁମ୍ବାଇ,୧୩/୦୮: ସେପ୍ଟେମ୍ବର ୫ ତାରିଖରୁ ଆରମ୍ଭ ହେବ ଘରୋଇ କ୍ରିକେଟ୍ ଟୁର୍ଣ୍ଣାମେଣ୍ଟ ଦୁଲୀପ ଟ୍ରଫି । ଏଥର ନୂଆ ଫର୍ମାଟ୍ରେ ଆୟୋଜିତ ହେବାକୁ ଯାଉଥିବା ଏହି ପ୍ରମୁଖ ଘରୋଇ କ୍ରିକେଟ୍ ଖେଳିବା ପାଇଁ ଭାରତୀୟ ଦଳର ସମସ୍ତ ନିୟମିତ ସଦସ୍ୟଙ୍କୁ ନିର୍ଦ୍ଦେଶ ଦିଆଯାଇଛି । କେବଳ ରୋହିତ ଶର୍ମା, ବିରାଟ କୋହଲି, ଯଶପ୍ରୀତ ବୁମରା ଓ ରବି ଚନ୍ଦ୍ରନ ଅଶ୍ୱିନଙ୍କୁ ଛାଡ଼ି ପ୍ରାୟତଃ ସବୁ ସିନିୟର ଖେଳାଳି ଦୁଲୀପ ଟ୍ରଫି ଖେଳିବା ସମ୍ଭାବନା ରହିଛି । ଏପରିକି ରୋହିତ ଓ କୋହଲି ମଧ୍ୟ ଗୋଟିଏ ଲେଖାଏଁ ମ୍ୟାଚ୍ ଖେଳିପାରନ୍ତି । କେବଳ ବୁମରାଙ୍କୁ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରୁ ବିଶ୍ରାମ ମିଳିବ ।
ଖୁବ୍ ଶୀଘ୍ର ଅଜିତ ଅଗରକରଙ୍କ ଅଧ୍ୟକ୍ଷତାରେ ଚୟନ କମିଟି ଦୁଲୀପ ଟ୍ରଫି ପାଇଁ ଦଳ ଘୋଷଣା କରିବ । କେ ଏଲ ରାହୁଲ, ରିଷବ ପନ୍ତ, ଶୁଭମନ ଗିଲ୍, ଯଶସ୍ୱୀ ଜୈସ୍ୱାଲ୍, ସର୍ଫରାଜ ଖାନ, ସୂର୍ଯ୍ୟକୁମାର ଯାଦବ, କୁଲଦୀପ ଯାଦବ, ଶ୍ରେୟାସ ଆୟର ଓ ରଜତ ପାତିଦାରଙ୍କୁ ବିଭିନ୍ନ ଦଳରେ ସ୍ଥାନ ମିଳିବା ନିଶ୍ଚିତ ।
ଫେରିବେ ସାମି
ଗତ ଦିନିକିଆ ବିଶ୍ୱକପ୍ ସମୟରେ ଆହତ ହୋଇଥିବା ମହମ୍ମଦ ସାମିଙ୍କୁ ମଧ୍ୟ ଗୋଟିଏ ମ୍ୟାଚ୍ ଖେଳିବା ପାଇଁ ସୁଯୋଗ ମିଳିବ । ସେ ଏହି ମ୍ୟାଚ୍ ଜରିଆରେ ଫିଟ୍ନେସ୍ ପ୍ରମାଣ କରିବେ । ସେ ସମ୍ପ୍ରତି ଜାତୀୟ କ୍ରିକେଟ୍ ଏକାଡେମୀରେ ରହି ଡାକ୍ତର ଓ ଫିଜିଓଙ୍କ ଅଧିନରେ ପ୍ରସ୍ତୁତି କରୁଛନ୍ତି । ଗତ କିଛି ଦିନ ଧରି ବୋଲିଂ ଅଭ୍ୟାସ ଆରମ୍ଭ କରିଛନ୍ତି । ଥରେ ଗୁରୁତର ଆହତ ହୋଇ ପିଠିରେ ଅସ୍ତ୍ରୋପଚାର କରିସାରିଥିବା ବୁମରାଙ୍କ କାର୍ଯ୍ୟଭାର ଉପରେ ବିଶେଷ ଧ୍ୟାନ ଦିଆଯାଉଛି । ତେଣୁ ତାଙ୍କୁ ଅତିରିକ୍ତ ବିଶ୍ରାମ ପାଇଁ ଅନୁମତି ମିଳିବ । ଏପରିକି ବାଂଲାଦେଶ ବିପକ୍ଷ ଟେଷ୍ଟ ସିରିଜରେ ମଧ୍ୟ ଖେଳିବା ସମ୍ଭାବନା ନାହିଁ ।
ସବୁ ସିନିୟର ଖେଳାଳିଙ୍କୁ ଘରୋଇ କ୍ରିକେଟ୍ରେ ସାମିଲ କରିବା ପଛରେ ବଡ଼ କାରଣ ମଧ୍ୟ ରହିଛି । ଆଗାମୀ ୫ ମାସ ମଧ୍ୟରେ ଭାରତ ୧୦ଟି ଟେଷ୍ଟ ଖେଳିବାର କାର୍ଯ୍ୟକ୍ରମ ରହିଛି । ବିଶେଷ କରି ଗୁରୁତ୍ୱପୂର୍ଣ୍ଣ ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜ ଖେଳିବା ପାଇଁ ଭାରତୀୟ ଦଳ ଏଥର ଅଷ୍ଟ୍ରେଲିଆ ଯାତ୍ରା କରିବ । ସେପ୍ଟେମ୍ବର ୧୯ରୁ ବାଂଲାଦେଶ ବିପକ୍ଷ ଘରୋଇ ଟେଷ୍ଟ ସିରିଜ ଆରମ୍ଭ ହେବ । ଉଭୟ ଦଳ ମଧ୍ୟରେ ୨ଟି ଟେଷ୍ଟ ଖେଳାଯିବ ।
ବାଂଲାଦେଶ ଟେଷ୍ଟ ସିରିଜ ପୂର୍ବରୁ ବିସିସିଆଇ ସମ୍ଭାବ୍ୟ ଟେଷ୍ଟ ଖେଳାଳିଙ୍କୁ ନେଇ ଚେନ୍ନାଇରେ ଏକ ସୀମିତ ଦିନର ପ୍ରଶିକ୍ଷଣ ଶିବିର ଆୟୋଜନ କରିବାକୁ ଚିନ୍ତା କରୁଛି । ଏହା ସମ୍ଭବ ହେଲେ ରୋହିତ ଓ କୋହଲି ଦୁଲୀପ ଟ୍ରଫିର ଗୋଟିଏ ମ୍ୟାଚ୍ ଖେଳିପାରିବେ । ଚେନ୍ନାଇରେ ବାଂଲାଦେଶ ବିପକ୍ଷ ପ୍ରଥମ ଟେଷ୍ଟ ଖେଳାଯିବ ।
୪ ଦଳକୁ ନେଇ ଟୁର୍ଣ୍ଣାମେଣ୍ଟ
ଏଥର ଦୁଲୀପ ଟ୍ରଫି ଫର୍ମାଟ୍ରେ ପରିବର୍ତ୍ତନ କରାଯାଇଛି । ପୂର୍ବରୁ ୬ଟି ଜୋନାଲ ଦଳକୁ ନେଇ ଟୁର୍ଣ୍ଣାମେଣ୍ଟ ଆୟୋଜନ କରାଯାଉଥିଲା । ଏଥର ଟେଷ୍ଟ ସିଜନକୁ ନଜରରେ ରଖି ୪ଟି ଦଳକୁ ନେଇ ଟୁର୍ଣ୍ଣାମେଣ୍ଟ ଆୟୋଜନ କରାଯିବ । ଚୟନ କମିଟି ସମସ୍ତ ଦଳ ଚୂଡ଼ାନ୍ତ କରିବେ। ରାଉଣ୍ଡ ରବିନ ଫର୍ମାଟ୍ରେ ସମସ୍ତ ଦଳ ପରସ୍ପରକୁ ଭେଟିବେ । ପଏଣ୍ଟ ତାଲିକାର ଶୀର୍ଷରେ ରହିବା ଦଳ ଚାମ୍ପିଅନ୍ ହେବ ।
ସୂଚନାଯୋଗ୍ୟ, ଆନ୍ଧ୍ର ପ୍ରଦେଶର ଅନନ୍ତପୁରରେ ଦୁଲୀପ୍ ଟ୍ରଫି ଆୟୋଜନ କରିବା ପାଇଁ ପୂର୍ବରୁ ନିଷ୍ପତ୍ତି ନିଆଯାଇଥିଲା । ମାତ୍ର ସିନିୟର ଖେଳାଳିମାନଙ୍କୁ ଏଥର ଡାକରା ମିଳିଥିବାରୁ ଟୁର୍ଣ୍ଣାମେଣ୍ଟକୁ ବେଙ୍ଗାଲୁରୁକୁ ସ୍ଥାନାନ୍ତରିତ କରାଯାଇଛି । ଅନନ୍ତପୁର ଜିଲ୍ଲାକୁ ବିମାନ ସୁବିଧା ନାହିଁ ।
