ନୂଆଦିଲ୍ଲୀ,୧୨।୪: ଲୋକସଭା ନିର୍ବାଚନକୁ ଦୃଷ୍ଟିରେ ରଖି ନିର୍ବାଚନ ପ୍ରଚାର ଜୋରଦାର ଭାବରେ ଚାଲିଛି। ଏହା ଭିତରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଉତ୍ତରାଖଣ୍ଡର ପୌଢି ଗଢଓ୍ବାଲାରେ ଏକ ରାଲିକୁ ସମ୍ବୋଧିତ କରି କଂଗ୍ରେସ ଉପରେ ଜୋରଦାର ବର୍ଷିଛନ୍ତି। ରାଜନାଥ କହିଛନ୍ତି, କିଛି ବର୍ଷରେ ଡାଇନୋସର ଭଳି କଂଗ୍ରେସ ପାର୍ଟି ମଧ୍ୟ ବିଲୁପ୍ତ ହୋଇଯିବ। ସେ କଂଗ୍ରେସ ଭିତରେ ଆଭ୍ୟନ୍ତରୀଣ କଳହର ତୁଳନା ଟିଭି ରିଏଲିଟି ଶୋ’ ‘ବିଗ୍ ବସ୍’ର ଘର ସହ କହିଛନ୍ତି। ଏହା ସହ ପାର୍ଟି ନେତା ପ୍ରତିଦିନ ପରସ୍ପରର କପଡା ଚିରିବାରେ ଲାଗିଛନ୍ତି ବୋଲି କହିଛନ୍ତି ରାଜନାଥ।
ସେ କହିଛନ୍ତି, କଂଗ୍ରେସ ନେତାଙ୍କ ପଳାୟନ ଜାରି ରହିଛି। ସେ ଗୋଟିଏ ପରେ ଗୋଟିଏ ଦଳ ଛାଡୁଛନ୍ତି ଓ ବିଜେପିରେ ସାମିଲ ହେଉଛନ୍ତି। ମୋତେ ଡର ଲାଗୁଛି ଏବେଠାରୁ କିଛି ବର୍ଷ ପରେ କଂଗ୍ରେସ ଡାଇନୋସର ଭଳି ବିଲୁପ୍ତ ହୋଇଯିବ। ସ୍ବାଧୀନ ଭାରତର ପ୍ରଥମ ଦୁର୍ନୀତି, ଜିପ୍ ଦୁର୍ନୀତି କଂଗ୍ରେସ ସମୟରେ ହୋଇଥିଲା। କଂଗ୍ରେସ ସମୟରେ ଦୁର୍ନୀତି କାରଣରୁ ମନ୍ତ୍ରୀଙ୍କୁ ଜେଲ୍ ଯିବାକୁ ପଡିଥିଲା।
ରାଜନାଥ କହିଛନ୍ତି, ୨୦୧୯ ପର୍ଯ୍ୟନ୍ତ ଉତ୍ତରାଖଣ୍ଡରେ ୧୦୦ ରୁ ୯ ପରିବାର ପାଖରେ ପାଇପ୍ ଓ୍ବାଟର ସୁବିଧା ଥିଲା। ଆଜି ଉତ୍ତରାଖଣ୍ଡରେ ୧୦୦ ରୁ ୯୦ ପରିବାରଙ୍କ ଘରେ ନଳରୁ ଜଳ ଆସୁଛି। ଦୁନିଆରେ କେହି ବି ମୋଦି ସରକାରଙ୍କ କୌଣସି ମନ୍ତ୍ରୀ ଉପରେ ଆଙ୍ଗୁଳି ଉଠାଇ ପାରିବେନି।’
