ନୂଆଦିଲ୍ଲୀ,୧୯/୦୪: ରିଲ୍ସ କରିବା ନିଶାରେ ରାଜଧାନୀ ଦିଲ୍ଲୀରେ ବେପରୁଆ ଭାବେ ଗାଡି ଚଳାଇ ଆତଙ୍କ ସୃଷ୍ଟି କରିବା ଘଟଣାରେ ପୁଲିସ ୨୮ ଜଣ ବାଇକ ଆରୋହୀଙ୍କୁ ଗିରଫ କରିଛି । ଏଥିସହ ସେମାନଙ୍କ ବାଇକକୁ ଜବତ କରିଛି ।
ସୂଚନା ଅନୁସାରେ ବୁଧବାର-ଗୁରୁବାର ରାତି ୩ଟା ୩୦ରେ ୧୪ଟି ବାଇକରେ ୨୮ ଜଣ ଯୁବକ ବିନା ହେଲମେଟରେ ପାର୍ଲାମେଣ୍ଟ ଷ୍ଟ୍ରିଟ୍ ଓ କର୍ତ୍ତବ୍ୟପଥ ମଝିରେ ରାସ୍ତା ଉପରେ ବେପୁରଆ ଭାବେ ଗାଡି ଚଳାଇ ତାର ଭିଡିଓ ଉତ୍ତୋଳନ କରୁଥିଲେ । ହେଲେ ସେହିବାଟ ଦେଇ ଯାଉଥିବା ପୁଲିସ ଟିମ୍ ହାବୁଡରେ ସେମାନେ ପଡିଥିଲେ । ପୁଲିସ ସମସ୍ତଙ୍କୁ ଗିରଫ କରିବା ସହ ଥାନାକୁ ନେଇଯାଇଥିଲା । ଜେରା ବେଳେ ସେମାନେ ସ୍ୱୀକାର କରିଥିଲେ କି ସେମାନେ ଅନ୍ୟ ଅଞ୍ଚଳରେ ରହୁଛନ୍ତି । ସେଠାକୁ ରିଲ୍ସ ବନାଇବା ଲାଗି ଆସିଥିଲେ । ଭିଡିଓ ଉତ୍ତୋଳନ କରି ତାକୁ ନିଜ ନିଜର ସୋସିଆଲ ମିଡିଆରେ ଛାଡିଥାନ୍ତେ । ପୁଲିସ ମାମଲା ରୁଜୁ କରିବା ସହ ଘଟଣାର ଅଧିକ ଯାଞ୍ଚ କରୁଛି ।