ନୂଆଦିଲ୍ଲୀ: ମଣିପୁର ହିଂସାକୁ ନେଇ ରାଜ୍ୟପାଳ ଅନୁସୂୟା ଉଇକେଙ୍କୁ ଭେଟିଲେ ଦଶଟି ରାଜନୈତିକ ଦଳର ପ୍ରତିନିଧୀ । ରାଜ୍ୟରେ ଶାନ୍ତି ଫେରାଇ ଆଣିବା ତଥା ସ୍ୱାଭାବିକତା ଆଣିବା ପାଇଁ ଦୁଇ ବିବାଦୀୟ ସମ୍ପ୍ରଦାୟ ମଧ୍ୟରେ ଶାନ୍ତି ଆଲୋଚନା ଆରମ୍ଭ କରିବାକୁ ଅନୁରୋଧ କରିଥିଲେ । ରାଜ ଭବନ ଏକ ବିବୃତ୍ତିରେ ଏହି ସୂଚନା ଦେଇଛନ୍ତି । 

କଂଗ୍ରେସ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଓକରାମ ଇବୋବି ସିଂଙ୍କ ନେତୃତ୍ୱରେ ୧୦ଟି ଦଳର ଏକ ପ୍ରତିନିଧୀ ମଣ୍ଡଳ ଶୁକ୍ରବାର ସନ୍ଧ୍ୟାରେ ରାଜ୍ୟପାଳଙ୍କୁ ଏକ ସ୍ମାରକପତ୍ର ପ୍ରଦାନ କରିଛନ୍ତି । ଏଥିରେ କୁହାଯାଇଛି ଯେ କେନ୍ଦ୍ର, ବିଶେଷକରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ହସ୍ତକ୍ଷେପ ବିନା ରାଜ୍ୟରେ ଶାନ୍ତି ଫେରାଇ ଅଣାଯାଇପାରିବ ନାହିଁ । ଏହି ସ୍ମାରକପତ୍ରରେ ଦୁଇ ସମ୍ପ୍ରଦାୟ ମଧ୍ୟରେ ଶାନ୍ତି ଆଲୋଚନା ପାଇଁ ତୁରନ୍ତ ପଦକ୍ଷେପ ନେବାକୁ ଦାବି କରାଯାଇଛି । ଯାହା ଦ୍ବାରା ଜାରି ରହିଥିବା ବିବାଦର ସ୍ଥାୟୀ ସମାଧାନ ହୋଇପାରିବ । 

ମଣିପୁରରେ ଗତ ୨୪ ଘଣ୍ଟା ମଧ୍ୟରେ 'ସର୍ଚ୍ଚ ଅପରେସନ୍'ରେ କେନ୍ଦ୍ରୀୟ ସୁରକ୍ଷା ବାହିନୀ ବହୁ ପରିମାଣର ଅସ୍ତ୍ରଶସ୍ତ୍ର ଏବଂ ଗୁଳି ଜବତ କରିଛି । ବିଷ୍ଣୁପୁରର ଏକ ସ୍ଥାନରୁ ମାଗାଜିନ୍  ସହିତ ଦୁଇଟି SLRS, ଗୁଳି ସହିତ ଗୋଟିଏ କାର୍ବାଇନ୍, ଚାରିଟି ଗ୍ରେନେଡ୍ ଏବଂ ବିସ୍ଫୋରକ ସାମଗ୍ରୀ ସ୍ଥାନରୁ ଜବତ କରାଯାଇଛି । ଏହା ବ୍ୟତୀତ ଶୁକ୍ରବାର ଦିନ ଗୋଟିଏ AK-56 ରାଇଫଲ, ଗୋଟିଏ ୯ ମିଲିମିଟର ପିସ୍ତଲ, ଦୁଇଟି ଗ୍ରେନେଡ ଏବଂ ମୋର୍ଟାର ଜବତ କରାଯାଇଛି । ନିଷେଧାଦେଶ ଉଲ୍ଲଂଘନ କରିବା ଅଭିଯୋଗରେ ରାଜ୍ୟର ବିଭିନ୍ନ ଜିଲ୍ଲାରୁ ୧୧୩୫ ଜଣଙ୍କୁ ପୋଲିସ ଅଟକ ରଖିଛି ।