ନୂଆଦିଲ୍ଲୀ: ୟୁକ୍ରେନର କୁର୍ସକ ଆକ୍ରମଣ ଯୋଜନା ସଂପର୍କରେ ଜାଣିଥିଲା ଋଷିଆ । ଏପରିକି ଏହାକୁ ପ୍ରତିହତ କରିବା ଲାଗି ପୁଟିନ୍‌ ସରକାର ଯୋଜନା ମଧ୍ୟ କରିଥିଲେ । ୟୁକ୍ରେନୀୟ ସେନା ଦ୍ବାରା ଜବତ ହୋଇଥିବା ଋଷିଆର କିଛି ଦସ୍ତାବିଜ୍‌ରୁ ଏନେଇ ଖୁଲାସା ହୋଇଛି । ଏହି ଦସ୍ତାବିଜକୁ ନେଇ ‘ଦ ଗାର୍ଡିଆନ୍‌’ରେ ରିପୋର୍ଟ ପ୍ରକାଶ ପାଇଛି ଯେ, ୟୁକ୍ରେନ ଯୁଦ୍ଧରେ ସୈନିକଙ୍କ ମନୋବଳ ଦୁର୍ବଳ ହେବାକୁ ନେଇ ଋଷିଆ ଚିନ୍ତାରେ ରହିଛି । 

ଋଷର ସୈନିକ ଅଧିକ ଦିନ ଯୁଦ୍ଧରେ ନିୟୋଜିତ ହେବା ପରେ ଆତ୍ମହତ୍ୟା କରିଥିଲେ । ଏନେଇ ଖବର ପ୍ରକାଶ ପାଇବା ପରେ ଋଷ ସୈନିକଙ୍କ ମନୋବଳ ଆହୁରି ଭାଙ୍ଗିପଡ଼ିଥିଲା । ତେଣୁ ଋଷ ସରକାର ନିଜର ସୈନିକଙ୍କୁ ଅଧିକରୁ ଅଧିକ ଦେଶ ସପକ୍ଷରେ ଖବର ପ୍ରସାରଣ କରୁଥିବା ନ୍ୟୁଜ ଚ୍ୟାନେଲ ଦେଖିବାକୁ  ନିର୍ଦ୍ଦେଶ ଦେଇଥିଲେ । ଏହା ଦ୍ବାରା ସୈନିକଙ୍କ ମନୋବଳ ବଢ଼ାଇବାକୁ ଉଦ୍ୟମ କରିଥିଲା ଋଷ । ତେବେ କୁର୍ସକ କ୍ଷେତ୍ରର ପରିତ୍ୟକ୍ତ ଅଞ୍ଚଳରୁ ଏହି ଦସ୍ତାବିଜ ପାଇଥିବା ନେଇ ୟୁକ୍ରେନ ସେନା ଦାବି କରିଛି । ସେପଟେ ଡକ୍ୟୁମେଣ୍ଟର ସତ୍ୟାସତ୍ୟ ସଂପର୍କରେ କୌଣସି ସ୍ପଷ୍ଟ ସୂଚନା ନଥିବା ଦ ଗାର୍ଡିଆନ୍‌ରେ ଉଲ୍ଲେଖ କରାଯାଇଛି । କିନ୍ତୁ ଏହି ଦସ୍ତାବିଜ ଉପରେ ଋଷ ସେନାର ହଲମାର୍କ ରହିଛି । 

ୟୁକ୍ରେନ ସେନା ପାଇଥିବା ଏହି ଦସ୍ତାବିଜ ଋଷିଆର ଗୃହ ମନ୍ତ୍ରାଳୟ ଏବଂ ଗୁଇନ୍ଦା ଏଜେନ୍ସି ଏଫଏସବିର ବୋଲି କୁହାଯାଉଛି । ୟୁକ୍ରେନ୍ କୁର୍ସକ ଉପରେ ଆକ୍ରମଣ କରିବାର ମାତ୍ର ୬ ମାସ ପୂର୍ବରୁ ଏହି ଡକ୍ୟୁମେଣ୍ଟ ଲେଖା ହୋଇଥିବା ଜଣାପଡିଛି ।  ଜାନୁଆରୀ ୪ ତାରିଖ ଲେଖାଥିବା ଏକ ଦସ୍ତାବିଜ୍‌ରେ ଋଷ ସୀମା ଭିତରେ ୟୁକ୍ରେନ ସେନା ଦ୍ବାରା ଆକ୍ରମଣ ହେବା ନେଇ ଉଲ୍ଲେଖ ରହିଛି । ଆଉ ଏଥିପାଇଁ ଉପଯୁକ୍ତ ପ୍ରଶିକ୍ଷଣ ସହ ସମ୍ଭାବ୍ୟ ଆକ୍ରମଣକୁ ପ୍ରତିହତ ଲାଗି ପ୍ରସ୍ତୁତ ରହିବାକୁ ନିଜର ସେନାକୁ ନିର୍ଦ୍ଦେଶ ଦେଇଥିଲା ମସ୍କୋ । ଏହା ବ୍ୟତୀତ ସୁମି କ୍ଷେତ୍ରରେ ୫୦ କିଲୋମିଟର ପର୍ଯ୍ୟନ୍ତ ୟୁକ୍ରେନ ସେନା ପଶିଆସିବ ବୋଲି ଋୁଷ ସେନା ଜାଣିଥିଲା ।  ସେପଟେ ୟୁକ୍ରେନ୍‌ର ସୀମା ପାର ଆକ୍ରମଣକୁ ପଣ୍ଡ କରିବା ଲାଗି ସଜାଗ ରହିବାକୁ ଋଷ ସେନାକୁ ମଧ୍ୟ ନିର୍ଦ୍ଦେଶ ମିଳିଥିଲା ବୋଲି ଡକ୍ୟୁମେଣ୍ଟରୁ ଜଣାପଡ଼ିଛି ।