ନୂଆଦିଲ୍ଲୀ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଆସନ୍ତା ଗୁରୁବାର ଅର୍ଥାତ ମେ ୧୬ରେ ଚୀନ ଗସ୍ତରେ ଯିବେ । ଗାଜା ଏବଂ ୟୁକ୍ରେନକୁ ନେଇ ତିକ୍ତତା ମଧ୍ୟରେ ଏକ ବର୍ଷ ମଧ୍ୟରେ ରୁଷର ରାଷ୍ଟ୍ରପତି ଦ୍ୱିତୀୟ ଥର ପାଇଁ ଚୀନ୍ ଗସ୍ତ କରିବେ । ପଞ୍ଚମ କାର୍ଯ୍ୟକାଳରେ ପ୍ରବେଶ କରିବା ପରେ ଏହା ପୁଟିନଙ୍କ ପ୍ରଥମ ବୈଦେଶିକ ଗସ୍ତ ହେବ। ଏହି ସମୟରେ ପୁଟିନ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଅନେକ ବ୍ୟାପକ ପ୍ରସଙ୍ଗରେ ବିସ୍ତୃତ ଭାବରେ ଆଲୋଚନା କରିବେ ।

ଏକ ରିପୋର୍ଟ ଅନୁଯାୟୀ, ରୁଷ ରାଷ୍ଟ୍ରପତି ମେ ୧୬ ଏବଂ ମେ ୧୭ ଚୀନ୍ ଗସ୍ତରେ ରହିବେ । ଚୀନ୍ ରାଷ୍ଟ୍ରପତି ସି ଜିନପିଙ୍ଗ ମଧ୍ୟ ଏକ ବର୍ଷ ପୂର୍ବେ ମସ୍କୋ ଗସ୍ତ କରିଥିଲେ । ଆଉ ସବୁଠାରୁ ବଡ କଥା ହେଉଛି, ଆମେରିକାରେ ରାଷ୍ଟ୍ରପତି ନିର୍ବାଚନ ପୂର୍ବରୁ ଦୁଇ ଦେଶର ମୁଖ୍ୟଙ୍କ ମଧ୍ୟରେ ବୈଠକ ଅନୁଷ୍ଠିତ ହେଉଛି । ସୂଚନାଥାଉକି, ଗାଜା ବିରୋଧରେ ଯୁଦ୍ଧରେ ଆମେରିକା ଇସ୍ରାଏଲକୁ ସମର୍ଥନ କରିଛି ଏବଂ ଏହି କାରଣରୁ ୱାଶିଂଟନ୍ ଅନ୍ତର୍ଜାତୀୟ ସ୍ତରରେ ବିଭିନ୍ନ ପ୍ରତିକ୍ରିୟାର ସମ୍ମୁଖୀନ ହେଉଛି।

ଏକ ରିପୋର୍ଟ ଅନୁଯାୟୀ, ପୁଟିନ ଏବଂ ଜିନପିଙ୍ଗଙ୍କ ମଧ୍ୟରେ ହେବାକୁଥିବା ଏହି ବୈଠକରେ ଆମେରିକାକୁ ଜବାବ ଦେବାର ବିକଳ୍ପ ଉପରେ ଆଲୋଚନା କରାଯାଇପାରେ। ସୂଚନାଥାଉକି, ୟୁକ୍ରେନ ଯୁଦ୍ଧ ପରେ ଆମେରିକା ରୁଷ ଉପରେ ଅନେକ ପ୍ରତିବନ୍ଧକ ଲଗାଇଥିଲା। ଏହି ସମୟରେ ରୁଷ ମଧ୍ୟ ଅନେକ ଦେଶରୁ ସମର୍ଥନ ପାଇଥିଲା । ଚୀନ୍ ରାଷ୍ଟ୍ରପତି ସି ଜିନପିଙ୍ଗ ନିକଟରେ ୟୁରୋପ ଗସ୍ତରୁ ଫେରିଛନ୍ତି। ବିଭିନ୍ନ ଦେଶ ଏବଂ ନାଟୋ ସହିତ ଚୀନ୍ ଏବଂ ରୁଷ ମଧ୍ୟରେ ବିବାଦ ବଢିବାରେ ଲାଗିଛି।