କଳ୍ପନା କରନ୍ତୁ, ଆପଣ ଏକ ବିମାନରେ ଯାତ୍ରା କରୁଛନ୍ତି । ହଠାତ୍ କକ୍ପିଟ୍ରୁ ପାଇଲଟ୍ ବାହାରକୁ ଆସି ଯାତ୍ରୀଙ୍କୁ କହୁଛନ୍ତି, ତାଙ୍କୁ ବିମାନ ଅବତରଣର ତାଲିମ ଦିଆଯାଇ ନାହିଁ । ଏହି ସ୍ଥିତିରେ ଆପଣଙ୍କ ଅବସ୍ଥା କ’ଣ ହେବ? ବିମାନ ଭିତର ମାହୋଲ କେମିତି ହେବ? ଏହି ଅନୁଭବକୁ ଜଣେ ଯାତ୍ରୀ ସୋସିଆଲ ମିଡିଆ ପ୍ଲାଟ୍ଫର୍ମରେ ଶେୟାର କରିଛନ୍ତି । ସେ ଲେଖିଛନ୍ତି, ନିକଟରେ ସେ ପୋର୍ଟଲାଣ୍ଡରୁ ସାନ୍ ଫ୍ରାନ୍ସିସ୍କୋ ଦେଇ ଜ୍ୟାକ୍ସନ ହୋଲ୍କୁ ବିମାନ ଯାତ୍ରା କରୁଥିଲେ । କିନ୍ତୁ ହଠାତ୍ ପାଇଲଟ୍ କକ୍ପିଟ୍ରୁ ବାହାରକୁ ଆସି ଘୋଷଣା କଲେ ‘ହେଲୋ, ମୁଁ ଦୁଃଖିତ ଯେ ଜ୍ୟାକ୍ସନ୍ ହୋଲ୍ରେ ବିମାନ ଅବତରଣ କରିବା ପାଇଁ ମୋ ପାଖରେ ଉପଯୁକ୍ତ ଯୋଗ୍ୟତା ନାହିଁ । ତେଣୁ ଆମକୁ ବିମାନକୁ ସଲ୍ଟ ଲେକ୍ ସିଟି, ଉଥା ଅଭିମୁଖେ ନେବାକୁ ପଡ଼ିବ । ପରବର୍ତ୍ତୀ ସମସ୍ତ ପଦକ୍ଷେପ ବିଷୟରେ ଆମେ ଆପଣଙ୍କୁ ସୂଚନା ଦେବୁ ।’ ଏହାପରେ ବିମାନ ସଲ୍ଟ ଲେକ୍ ସିଟିରେ ଅବତରଣ କଲା ।
ସେଠାରେ ଯାତ୍ରୀଙ୍କୁ ପ୍ରାୟ ୧ ଘଣ୍ଟା ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିଲା । ଏହି ସମୟ ମଧ୍ୟରେ ପାଇଲଟ୍ ଜଣକ ବିମାନରୁ ଚାଲିଗଲେ । ତାଙ୍କ ସ୍ଥାନରେ ଆଉ ଜଣେ ପାଇଲଟ୍ଙ୍କୁ ଅଣାଗଲା । ସେ ବିମାନକୁ ଜ୍ୟାକ୍ସନ୍ ହୋଲ୍ ଅଭିମୁଖେ ନେଲେ । ଶେଷରେ ବିମାନ ନିର୍ଦ୍ଧାରିତ ଲକ୍ଷ୍ୟସ୍ଥଳରେ ପହଞ୍ଚିଲା । ଏହାକୁ ଭୟଙ୍କର ବିମାନ ଅବତରଣ ଅନୁଭବ ବୋଲି ୟୁଜର ଉଲ୍ଲେଖ କରିଛନ୍ତି । ପାଇଲଟ୍ଙ୍କ ଯୋଗୁ ନିର୍ଦ୍ଧାରିତ ସ୍ଥାନରେ ବିମାନ ପହଞ୍ଚିବାରେ ପ୍ରାୟ ୩ ଘଣ୍ଟା ବିଳମ୍ବ ହେଲା । ଘଟଣାଟି ସ୍କାଇୱେଷ୍ଟ୍ ଏୟାରଲାଇନ୍ସ ଦ୍ୱାରା ପରିଚାଳିତ ଏକ ବିମାନର । ଘଟଣା ସମ୍ପର୍କରେ ବିମାନ ସଂସ୍ଥା ଏକ ବୟାନ ଜାରି କରିଛି । ଏଥିରେ ସ୍ପଷ୍ଟ କରିଛି, କାଗଜପତ୍ରରେ ତ୍ରୁଟି ଯୋଗୁ ବିମାନର ଦିଗ ପରିବର୍ତ୍ତନ କରାଯାଇଥିଲା ।
ପାଇଲଟ୍ଙ୍କ ଅଯୋଗ୍ୟତା ଏହାର କାରଣ ନୁହେଁ । ବିମାନକୁ ଗନ୍ତବ୍ୟ ସ୍ଥଳ ପରିବର୍ତ୍ତେ ସଲ୍ଟ ଲେକ୍ ସିଟିରେ ଅବତରଣ କରାଇ ଚାଳକ ଦଳ ସଦସ୍ୟ ସମ୍ପର୍କିତ ଦସ୍ତାବିଜର ତ୍ରୁଟି ସଂଶୋଧନ କରାଗଲା । ସେଠାରୁ ଜ୍ୟାକ୍ସନ୍ ହୋଲ୍କୁ ଉଡ଼ାଣ ଲାଗି ଜଣେ ନୂଆ ପାଇଲଟ୍ଙ୍କୁ ମୁତୟନ କରାଗଲା । ବିମାନ ଅବତରଣରେ ନିୟୋଜିତ ସମସ୍ତ ପାଇଲଟ୍ ଯୋଗ୍ୟ ଥିଲେ । ଉପଯୁକ୍ତ ସତର୍କତାର ସହିତ ବିମାନର ଦିଗ ପରିବର୍ତ୍ତନ କରାଯାଇଥିଲା ବୋଲି ବିମାନ ସଂସ୍ଥା ସ୍ପଷ୍ଟ କରିଛି । ଘଟଣାଟି ଜଣାପଡ଼ିବା ପରେ ଲୋକେ ବିଭିନ୍ନ କଥା ଅନୁମାନ କରୁଛନ୍ତି ।
