ନୂଆଦିଲ୍ଲୀ,୧୧/୨ : ମୋଦୀ ସରକାର ୨୦୨୪ରେ ୫ଜଣ ବ୍ୟକ୍ତି ବିଶେଷଙ୍କୁ ଭାରତ ରତ୍ନ ଦେବାକୁ ଘୋଷଣା କରି ସାରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିକଟରେ ଏକ୍ସରେ ପୋଷ୍ଟ କରି ୫ବ୍ୟକ୍ତି ବିଶେଷଙ୍କୁ ଭାରତ ରତ୍ନ ଦେବାକୁ ଘୋଷଣା କରିଥିଲେ । ଲୋକସଭା ନିର୍ବାଚନର ଠିକ୍ ପୂର୍ବରୁ କେନ୍ଦ୍ରର ଏହି ନିଷ୍ପତ୍ତିରେ ରାଜନୈତିକ ଚର୍ଚ୍ଚା ଆରମ୍ଭ ହୋଇଯାଇଛି । କେତେକ ନେତା ଏହାକୁ ବିରୋଧ କରିଥିଲେ ତ ଆଉ କେତେକ ଏହାକୁ ସ୍ବାଗତ କରିଛନ୍ତି । ସେହିଭଳି ବର୍ତ୍ତମାନ ଏବେ ସମାଜବାଦୀ ପାର୍ଟି କାର୍ଯ୍ୟାଳୟର ବାହାରେ ମୁଲାୟମ ସିଂହ ଯାଦବଙ୍କୁ ଭାରତ ରତ୍ନ ଦେବାକୁ ନେଇ ପୋଷ୍ଟର ଲଗାଇଛନ୍ତି । ମୁଲାୟମ ସିଂହ ଯାଦବଙ୍କୁ ଭାରତ ରତ୍ନ ଦେବାକୁ ଦାବି କରାଯାଉଛି । ଏହି ପୋଷ୍ଟରକୁ ସପାର ଯୁବ ନେତା ଅବ୍ଦୁଲ ଅଜୀମ ଲଗାଇଛନ୍ତି ।

ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ୍ସରେ ପୋଷ୍ଟ କରି ପୂର୍ବତନ ପ୍ରଧାନମନ୍ତ୍ରୀ ପିବି ନରସିହ୍ମା ରାଓ, ଚୌଧୁରୀ ଚରଣ ସିଂହ ଏବଂ କୃଷି ବୈଜ୍ଞାନିକ ଏମଏସ ସ୍ବାମୀନାଥନଙ୍କୁ ଭାରତ ରତ୍ନ ଦେବାକୁ ଘୋଷଣା କରିଥିଲେ । ଏହାଠାରୁ କିଛି ଦିନ ପୂର୍ବରୁ ପିଏମ ମୋଦୀ ଜନନାୟକ କର୍ପୁର ଠାକୁର ଏବଂ ପୂର୍ବତନ ଉପପ୍ରଧାନମନ୍ତ୍ରୀ ଲାଲକୃଷ୍ଣ ଆଡବାଣୀଙ୍କ ଲାଗି ବି ଭାରତ ରତ୍ନ ସମ୍ମାନର ଘୋଷଣା କରିଥିଲେ । ସେହିଭଳି ଏ‌ବେ ସପା ନେତାଙ୍କ ତରଫରୁ ମୁଲାୟମ ସିଂହ ଯାଦବଙ୍କୁ ଭାରତ ରତ୍ନ ଦେବାକୁ ଦାବି ଆରମ୍ଭ ହୋଇଯାଇଛି ।