ଭୁବନେଶ୍ୱର/ଧାମରା,୨୧/୦୯: ଭଦ୍ରକ ଜିଲ୍ଲା ଧାମରା ବନ୍ଦରରେ ଲାଗୁଛି ଛୋଟ ବଡ଼ କୋଇଲା ବୋଝେଇ ଜାହାଜ । ଭିନ୍ନ ଭିନ୍ନ ଦେଶରୁ ଆସୁଛି ଅଲଗା ଅଲଗା ଗୁଣମାନର କୋଇଲା । ଜାହାଜରୁ ଏହା ଖଲାସ ହେବା ପରେ ଟ୍ରେନ୍ ଯୋଗେ ଓଡ଼ିଶା ତଥା ପଡ଼ୋଶୀ ରାଜ୍ୟକୁ ଯାଉଛି । ଏହି କୋଇଲା ଚାଲାଣ ବେଳେ ବାଟରେ ଚୋରି ହୋଇଯାଉଛି । ଆଉ କୋଇଲା ଚୋରିରେ ସଂପୃକ୍ତ ଅଛନ୍ତି ବଡ଼ ମାଫିଆ ଗ୍ୟାଙ୍ଗ୍ । ସେମାନଙ୍କ ରୋଜଗାର ରାତିକୁ ପ୍ରାୟ ୭୨ ଲକ୍ଷ ଟଙ୍କା ଏବଂ ମାସକୁ ୨୦ କୋଟିରୁ ଅଧିକ । ସେମାନଙ୍କ ପକେଟରେ ରହିଛନ୍ତି ସ୍ଥାନୀୟ ପୁଲିସ, ରେଳ ଅଧିକାରୀ ଓ ବନ୍ଦରର ପରିବହନ ସଂସ୍ଥା । ତାଛଡ଼ା ଏହି ଚୋରି ନେଟ୍ୱର୍କରେ ସେମାନଙ୍କୁ ସାହାଯ୍ୟ କରିବାକୁ ନିଯୁକ୍ତ ହୋଇଛନ୍ତି ଅନେକ ଲୋକ ।
ଖାସ୍ କୋଇଲା ଓ ଅନ୍ୟାନ୍ୟ ମାଲ ପରିବହନ ଲାଗି ଧାମରାରୁ ଭଦ୍ରକ ପର୍ଯ୍ୟନ୍ତ ୬୨ କିଲୋମିଟର ସ୍ୱତନ୍ତ୍ର ରେଳ ଲାଇନ ବିଛାଯାଇଛି । ଏହି ରେଳ ଲାଇନ କୋଇଲା ମାଫିଆଙ୍କ ପାଇଁ ଆଣିଛି ଅପୂର୍ବ ସୁଯୋଗ । ଅଭିନବ ଉପାୟରେ ଟ୍ରେନ୍ରୁ ଚୋରି କରାଯାଉଛି କୋଇଲା । ରାତିକୁ ଲକ୍ଷ ଲକ୍ଷ, ମାସିକ କୋଟି କୋଟି ଟଙ୍କା ରୋଜଗାର ହେଉଛି । ମାଫିଆଙ୍କ ନେଟୱର୍କରୁ ଭାଗ ପାଉଛନ୍ତି ସ୍ଥାନୀୟ ନେତା, ପୁଲିସ, ପ୍ରଶାସନ ଓ ରେଳ ବିଭାଗର ଅଧିକାରୀମାନେ । ତେଣୁ ଭୟ କାହାକୁ, ଡର କାହାକୁ । ୨୦୧୧ରେ ଧାମରା ବନ୍ଦରରେ ପରିବହନ ଆରମ୍ଭ ହେବା ପରଠାରୁ ଏହି କୋଇଲା ମାଫିଆ ସକ୍ରିୟ ହୋଇ ଉଠିଛନ୍ତି ।
ସାଧାରଣତଃ ଧାମରା ବନ୍ଦରକୁ ଜାହାଜରେ ଦକ୍ଷିଣ ଆଫ୍ରିକା, ଚୀନ୍ ଓ ଅଷ୍ଟ୍ରେଲିଆରୁ କୋଇଲା ଆସୁଛି । ଆଫ୍ରିକା ଓ ଚୀନ୍ର କୋଇଲା ଟିକେ ନିମ୍ନମାନର ହୋଇଥିବା ବେଳେ ଅଷ୍ଟ୍ରେଲିଆର କୋଇଲା ଉଚ୍ଚମାନର ଥିବାରୁ ତାହାର ଚାହିଦା ବିଭିନ୍ନ କମ୍ପାନି ଓ କାରଖାନା ପାଇଁ ଅଧିକ । ବନ୍ଦରରେ କୋଇଲା ଅନଲୋଡ୍ ହେବା ପରେ ଭିନ୍ନ ଭିନ୍ନ ଷ୍ଟକୟାର୍ଡରେ ମହଜୁଦ୍ ରହୁଛି । ଏହାପରେ ଟ୍ରେନ୍ ଯୋଗେ ଉତ୍ତର ପ୍ରଦେଶ, ଝାଡ଼ଖଣ୍ଡ, ପଶ୍ଚିମବଙ୍ଗ, ବିହାର ଭଳି ରାଜ୍ୟକୁ ତାହା ପଠାଯାଉଛି । ବନ୍ଦରକୁ ମାସିକ ପ୍ରାୟ ୮/୯ଟି କୋଇଲା ଜାହାଜ ଆସୁଥିବା ବେଳେ ଧାମରା ଷ୍ଟେସନରୁ ଦୈନିକ ପ୍ରାୟ ୮/୧୦ଟି ଟ୍ରେନ୍ ଭଦ୍ରକ ଦେଇ ଗନ୍ତବ୍ୟ ସ୍ଥଳ ଅଭିମୁଖେ ଯାଉଛି ।
ଏହି କୋଇଲା ବୋଝେଇ ଟ୍ରେନ୍ ହିଁ ମାଫିଆଙ୍କ ପାଇଁ ହୋଇଛି ସୁନାଖଣି(ରୋଜଗାରର ମାଧ୍ୟମ) । ପ୍ରତି ଟ୍ରେନରେ ୫୯/୬୦ଟି ବଗି/ ରେକ୍ ରହୁଛି । ଷ୍ଟକ୍ୟାର୍ଡରେ ବାହାରିବା ବେଳକୁ ଅଧିକାଂଶ ରେକ୍ ଓଭରଲୋଡ ହୋଇ ବାହାରୁଛି । ଧାମରାରୁ ଚରମ୍ପା ଷ୍ଟେସନ ମଧ୍ୟରେ ମାଣିପୁର, ଗୁରୁଦାସପୁର, ତିହିଡ଼ି, ଜିଝାରପୁର, ଭଟ୍ଟାତିରା ଭଳି ଛୋଟ ଛୋଟ ଷ୍ଟେସନ ରହିଛି । ଟ୍ରେନ୍ ଲାଇନ ପାଶ୍ୱର୍ରେ ଥିବା ବିଦ୍ୟୁତ ଖୁଣ୍ଟ ଗୁଡ଼ିକୁ କୋଇଲା ଚୋରିର ମାଧ୍ୟମ କରାଯାଇଛି । କେଉଁ କାରଣରୁ ଏହି ରୁଟ୍ରେ ଟ୍ରେନ୍ ଅତି ଧୀରେ ଧୀରେ ଚାଲେ, ତାହା ଅଜଣା । ବିଦ୍ୟୁତ ଖୁଣ୍ଟରେ ଚଢ଼ି ଯୁବକମାନେ ଲୁହା ଓ କାଠରେ ସ୍ୱତନ୍ତ୍ର ଭାବେ ପ୍ରସ୍ତୁତ ହୋଇଥିବା ଯନ୍ତ୍ରରେ ଚଳନ୍ତା ଟ୍ରେନରୁ କୋଇଲା କାଢ଼ନ୍ତି । ପ୍ରାୟ ୩ ଶହରୁ ଅଧିକ ଖୁଣ୍ଟକୁ ଏଭଳି କାମରେ ବ୍ୟବହାର କରାଯାଉଛି । ତଳେ ପଲିଥିନ ବିଛା ଯାଇଥାଏ । ଦିନ ରାତି ଚବିଶ ଘଣ୍ଟା ଏହି ପ୍ରକ୍ରିୟା ଚାଲେ । ଟ୍ରେନ୍ ଯିବା ପରେ କୋଇଲାକୁ ଛୋଟ ଛୋଟ ବସ୍ତାରେ ଭର୍ତ୍ତି କରାଯାଇ ଆଖପାଖରେ ସ୍ଥିର ହୋଇଥିବା ପଡ଼ିଆରେ ନେଇ ମହଜୁଦ୍ କରାଯାଏ । ସେଠାରୁ ରାତିରେ ଅଟୋ, ପିକ୍ଅପ ଭ୍ୟାନ୍ରେ ରେଳ ଲାଇନ ପାଶ୍ୱର୍ ସର୍ଭିସ ରୋଡ୍ରେ ନେଇ ରାଜପଥରେ ପହଞ୍ଚାଯାଏ । ରାଜପଥରେ ପ୍ରସ୍ତୁତ ହୋଇ ରହିଥାଏ ବଡ଼ ଟ୍ରକ୍ । ସେଥିରେ କୋଇଲା ଯାଏ ମାଫିଆଙ୍କ ଦ୍ୱାରା ନିର୍ଦ୍ଧାରିତ ହୋଇଥିବା କାରଖାନାକୁ । ଏହି କାରବାର ସମ୍ପୂର୍ଣ୍ଣ ଭାବେ ୭ ଜଣ ବଡ଼ ମାଫିଆଙ୍କ ଦ୍ୱାରା ପରିଚାଳିତ । ସେମାନଙ୍କ ଅଧୀନରେ ଅଛନ୍ତି କୁଜି ମାଫିଆ ଓ ଦଲାଲ । ଟ୍ରେନ୍ ଲାଇନ ପାଶ୍ୱର୍ ବିଦ୍ୟୁତ ଖୁଣ୍ଟ ବି ଏଥିଲାଗି ହେଉଛି ନିଲାମ । ମାସିକିଆ କିମ୍ବା ବର୍ଷିକିଆ ଅବଧିରେ ନିଲାମ ନିଆଯାଉଛି । ଖୁଣ୍ଟରେ ଚଢ଼ି ବିପଜ୍ଜନକ ଭାବେ ବଗିରୁ କୋଇଲା କାଢ଼ିବାକୁ ପ୍ରଶିକ୍ଷଣ ପାଇ କିଛି ଯୁବକ ଦରମା ନେଇ ନିଯୁକ୍ତ ଅଛନ୍ତି । ଏହି କଳା କୌଶଳରେ ଯିଏ ଯେତେ ପାରଙ୍ଗମ ତାକୁ ସେତେ ଅଧିକ ବୋନସ୍ ମିଳୁଛି ।
କୋଇଲା ଭର୍ତ୍ତି କରିବାକୁ ଆବଶ୍ୟକ ସିମେଣ୍ଟ ଓ ସାର ବସ୍ତା ସଂଗ୍ରହ କରିବାକୁ ମଜୁରି ଭିତ୍ତିରେ ଗାଁ ଗାଁ ବୁଲୁଛନ୍ତି କବାଡ଼ିଆ । ବସ୍ତାରେ କୋଇଲା ଭର୍ତ୍ତି କରି ପାଖ ପଡ଼ିଆରେ ପହଞ୍ଚାଇବାକୁ ନିଯୁକ୍ତ ହୋଇଛନ୍ତି ସୁପରଭାଇଜର । କୋଇଲା ବସ୍ତା ନେଇ ଅଟୋ-ଭ୍ୟାନ୍ରେ ରାଜପଥରେ ପହଞ୍ଚାଇବାକୁ ଠିକା ନେଇଛନ୍ତି ପରିବହନ ଠିକାଦାର । ସମ୍ପୂର୍ଣ୍ଣ ପ୍ରକ୍ରିୟାକୁ ଠିକଣା ଢଙ୍ଗରେ ପରିଚାଳନା କରିବାକୁ ସିକ୍ୟୁରିଟି କାମରେ ମୁତୟନ ହୋଇଛନ୍ତି ଗୁଣ୍ଡା ଶ୍ରେଣୀୟ ଯୁବକ। ସେମାନଙ୍କ ହାତରେ ଅସ୍ତ୍ରଶସ୍ତ୍ର ଆଉ ସବୁବେଳେ ନିଶାରେ ଚୁର୍ । ସର୍ଭିସ ରୋଡରେ କୋଇଲା ଭ୍ୟାନ୍ ଯିବା ବେଳେ ଆଗ ପଛରେ ବାଇକରେ ଯାଉଛନ୍ତି ଏସକର୍ଟ ଗାର୍ଡ । ରାଜପଥରେ କୋଇଲା ଟ୍ରକ ଭଦ୍ରକ ଜିଲ୍ଲା ପାର୍ ହେବା ପର୍ଯ୍ୟନ୍ତ ଏସକର୍ଟ ଭ୍ୟାନ୍ ମଧ୍ୟ ରହୁଛି । କେବଳ ଯେ ସଡ଼କ ପଥରେ ମାଫିଆଙ୍କ ନେଟୱର୍କ ରହିଛି ତାହା ନୁହେଁ, ଜଳପଥରେ ମଧ୍ୟ ସେମାନଙ୍କ କାରବାର ସକ୍ରିୟ । ବ୍ରାହ୍ଣଣୀ, ବୈତରଣୀ ଏବଂ ଖରସୁଆଁ ନଦୀରେ ବୋଟ୍ ମାଧ୍ୟମରେ ବି କୋଇଲାର ଏହି ଚୋରା କାରବାର ଚାଲିଛି ।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ଯେ, ମାଫିଆଙ୍କ ଏହି କାରବାରକୁ ରୋକିବାକୁ ଏଠି କେହି ନାହିଁ । ସ୍ଥାନୀୟ ପୁଲିସ, ବନ୍ଦରର ଷ୍ଟକୟାର୍ଡ ଦାୟିତ୍ୱରେ ଥିବା ଏଜେନ୍ସି, ଟ୍ରେନ୍ରେ କୋଇଲା ଲୋଡିଂ କରୁଥିବା ଏଜେନ୍ସି, ପ୍ରଶାସନିକ ଅଧିକାରୀ ଏବଂ ରେଳବାଇ ପୁଲିସ ସମସ୍ତେ ମାଫିଆଙ୍କ ଦ୍ୱାରା ଉପକୃତ ହେଉଛନ୍ତି । କୋଇଲା କାରବାରରୁ ବିପୁଳ ଅର୍ଥ ରୋଜଗାର କରୁଥିବା ବେକାର ଯୁବକମାନେ ବ୍ରାଉନ ସୁଗର ଓ ବନ୍ଧୁକ ବେପାରରେ ଟଙ୍କା ଖଟାଉଥିବା ଜଣାପଡ଼ୁଛି । ଜିଲ୍ଲାରେ ଆଇନଶୃଙ୍ଖଳା ସ୍ଥିତି ମଧ୍ୟ ଏମାନଙ୍କ ଦ୍ୱାରା ପ୍ରଭାବିତ ହେଉଛି।
