ନୂଆଦିଲ୍ଲୀ ୦୮/୦୯: ମୁକ୍ତିଲାଭ କରିଛି ଶାହରୁଖ ଖାନ୍ଙ୍କ ବହୁ ପ୍ରତୀକ୍ଷିତ ଆକ୍ସନ୍- ଥ୍ରିଲର୍ ଫିଲ୍ମ ‘ଯୱାନ’ । ଫାର୍ଷ୍ଟ ଡେ ଫାର୍ଷ୍ଟ ଶୋ’ ଦେଖିବାକୁ ଦେଶବ୍ୟାପୀ ଥିଏଟର ସାମ୍ନାରେ ଲୋକଙ୍କ ପ୍ରବଳ ଭିଡ଼ ଜମିଥିଲା । ସକାଳ ୬ ଟାରେ ପ୍ରଥମ ଶୋ’ ଦେଖିବାକୁ ଯାଇଥିବା ଫ୍ୟାନ୍ଙ୍କ ଭିଡ଼ର ଭିଡିଓ ଉପରେ ଶାହରୁଖଙ୍କ ପ୍ରତିକ୍ରିୟା ଏବେ ଖୁବ୍ ଭାଇରାଲ ହେଉଛି । ସକାଳୁ ସକାଳୁ ଫ୍ୟାନ୍ଙ୍କ ପୋଷ୍ଟ୍ର ପ୍ରତିକ୍ରିୟା ଦେଇ ଶାହରୁଖ୍ ଦର୍ଶକଙ୍କ ଉତ୍ସାହ ଆହୁରି ବଢ଼ାଇ ଦେଇଥିଲେ । ‘ଯୱାନ’ ଦେଖିବା ପାଇଁ ଏହା ବାଧ୍ୟ କରିଥିଲା ।
ନିଜର ପ୍ରିୟ ଅଭିନେତାଙ୍କ ଫିଲ୍ମ ଦେଖିବାକୁ ଉତ୍ସାହର ସହ ଅପେକ୍ଷା କରିଥିବା ଫ୍ୟାନ୍ଙ୍କ ସୋସିଆଲ ମିଡିଆ ପୋଷ୍ଟ୍ର ପ୍ରତିକ୍ରିୟାରେ ଶାହରୁଖ ଲେଖିଥିଲେ ‘ଲଭ୍ ୟୁ ବଏଜ୍ ଆଣ୍ଡ ଗର୍ଲସ, ଆପଣ ଏହି ଫିଲ୍ମର ଭରପୂର ଆନନ୍ଦ ଉଠାଇବେ ବୋଲି ଆଶା କରୁଛି । ଆପଣଙ୍କୁ ଥିଏଟର ଯିବାର ଦେଖିବା ପାଇଁ ମୁଁ ସକାଳ ପର୍ଯ୍ୟନ୍ତ ଚାହିଁ ରହିଥିଲି । ବହୁତ ସାରା ଭଲପାଇବା ଓ ଧନ୍ୟବାଦ ।’ପ୍ରଥମ ଦିନ ‘ଯୱାନ’ ବିଶ୍ୱସ୍ତରରେ ୧୩୫ରୁ ୧୫୦ କୋଟି ଆୟ କରିଥିବା ଅଗ୍ରୀମ ଟିକେଟ୍ ବୁକିଂରୁ ଜଣାପଡୁଛି । ଫିଲ୍ମଟି ହିନ୍ଦୀ ଭାଷାରେ ହାରାହାରି ୮୫ କୋଟି ଆୟ କରିଥିବା ସମୀକ୍ଷମାନେ କହିଛନ୍ତି । ଏହା ପ୍ରାଥମିକ ଆକଳନ ହୋଇଥିଲେ ମଧ୍ୟ ଦିନ ଶେଷ ସୁଦ୍ଧା ଫିଲ୍ମର କଲେକ୍ସନ୍ ରେକର୍ଡ ଭାଙ୍ଗିବ ବୋଲି ଆକଳନ କରାଯାଇଛି । କାରଣ ‘ଯୱାନ’କୁ ନେଇ ପ୍ରଥମ ଦିନ ଦର୍ଶକଙ୍କର ଜବରଦସ୍ତ କ୍ରେଜ୍ ଦେଖିବାକୁ ମିଳିଛି ।
Love u boys and girls I hope u enjoy the entertainment. Kept awake to see u go to the theater. Big love and thanks https://t.co/WYOKRfqspG
— Shah Rukh Khan (@iamsrk) September 7, 2023
ଆଟଲିଙ୍କ ନିର୍ଦ୍ଦେଶିତ ଏହି ଫିଲ୍ମରେ ନୟନତାରା, ବିଜୟ ସେତୁପତିଙ୍କ ସମେତ ପ୍ରିୟମଣି, ସାନ୍ୟା ମଲହୋତ୍ରା ଓ ରିଧି ଡୋଗ୍ରା ପ୍ରମୁଖ ଅଭିନୟ କରିଛନ୍ତି । ଦୀପିକାଙ୍କର ୨୦ ମିନିଟ୍ର ଭୂମିକା ଫିଲ୍ମରେ ରହିଛି । ଏହି ୨୦ ମିନିଟ୍ରେ ସେ ଦର୍ଶକଙ୍କ ମନ ଜିଣିଥିବା ସୋସିଆଲ ମିଡିଆରେ ଚର୍ଚ୍ଚା ହେଉଛି । ଫିଲ୍ମର ମୁଖ୍ୟ ଆକର୍ଷଣ ଶାହରୁଖ ଡବଲ୍ ରୋଲ୍ରେ ନଜର ଆସିଛନ୍ତି । ଫିଲ୍ମରେ ତାଙ୍କର ଭିନ୍ନ ଭିନ୍ନ ଲୁକ୍ ଦେଖିବାକୁ ମିଳିଛି । ପ୍ରତ୍ୟେକ ଲୁକ୍ ତାଙ୍କୁ ବେଶ ମାନୁଛି ବୋଲି ଦର୍ଶକ କହୁଛନ୍ତି ।
