ନୂଆଦିଲ୍ଲୀ,୧୪/୦୮ : ଅଣ-ପଞ୍ଜୀକୃତ କଲର୍ମାନଙ୍କ ପାଖରୁ ଆସୁଥିବା ସମସ୍ତ ପ୍ରମୋସନାଲ କଲ୍ଗୁଡ଼ିକ ଉପରେ ରୋକ୍ ଲାଗିବ । ଏଥିପାଇଁ ଭାରତୀୟ ଟେଲିକମ୍ ନିୟାମକ ଟ୍ରାଇ ଟେଲିକମ୍ କମ୍ପାନିଗୁଡ଼ିକୁ ନିର୍ଦ୍ଦେଶ ଦେଇଛି । ଏଭଳି କଲର୍ମାନଙ୍କୁ ବ୍ଲାକ୍ଲିଷ୍ଟ କରିବା ପାଇଁ ଟ୍ରାଇ ସେବା ପ୍ରଦାନକାରୀଙ୍କୁ ନିର୍ଦ୍ଦେଶ ଦେଇଛି । ସମ୍ପ୍ରତି ସ୍ପାମ୍ ଏବଂ ଫିସିଂ କଲ୍ ମାତ୍ରା ବଢ଼ି ଚାଲିଥିବାବେଳେ ଏଥିଯୋଗୁ ଲୋକମାନେ ବିପୁଳ ମାତ୍ରାରେ ଅର୍ଥ ହରାଉଛନ୍ତି । ସ୍ପାମ୍ କଲ୍ କରି ଲୋକଙ୍କୁ ପ୍ରଚୁର ମାତ୍ରାରେ ଠକୁଛନ୍ତି କଲର୍ । ଏହା ଉପରେ ଅଙ୍କୁଶ ଲଗାଇବା ପାଇଁ ଟ୍ରାଇ ପକ୍ଷରୁ କଡ଼ା ଆଭିମୁଖ୍ୟ ପ୍ରକାଶ ପାଇଛି ।
ଏଭଳି ଅନେକ କଲ୍ ଆସୁଛି, ଯେଉଁଥିଲେ କଲର୍ ନିଜକୁ ଫେଡ୍ଏକ୍ସ ଏବଂ ବ୍ଲୁ ଡାର୍ଟ ଭଳି କମ୍ପାନିଗୁଡ଼ିକର ପ୍ରତିନିଧି ଦର୍ଶାଇ ବଡ଼ ଆକାରରେ ଲୁଟୁଛନ୍ତି । ଫିସିଂ ଲିଙ୍କ୍ ପଠାଇ ସେମାନଙ୍କଠାରୁ ବିତ୍ତୀୟ ତଥ୍ୟ ହାସଲ କରି ଅର୍ଥ ହଡ଼ପ କରୁଛନ୍ତି । ଏସବୁ ଅଭିଯୋଗଗୁଡ଼ିକୁ ଆଖି ଆଗରେ ରଖି ସରକାର କଡ଼ା ପଦକ୍ଷେପ ଗ୍ରହଣ କରୁଛନ୍ତି । ଟ୍ରାଇ ଏକ ବିବୃତି ଜାରି କରି ପ୍ରକାଶ କରିଛି ଯେ, ଅଣ-ପଞ୍ଜୀକୃତ କଲର କିମ୍ବା ଟେଲିମାର୍କେଟରମାନଙ୍କଠାରୁ ଆସୁଥିବା ସମସ୍ତ ଭଏସ୍ କଲ୍କୁ ତତ୍କାଳ ଭାବେ ବନ୍ଦ କରାଯିବ । ଦୁଇ ବର୍ଷ ପର୍ଯ୍ୟନ୍ତ ଏଭଳି ଅଣ-ପଞ୍ଜୀକୃତ କଲର୍ଙ୍କୁ ବ୍ଲାକ୍ଲିଷ୍ଟ କରାଯିବ । ସ୍କାମ୍ କଲର୍ମାନଙ୍କ ବିରୋଧରେ କ’ଣ କାର୍ଯ୍ୟାନୁଷ୍ଠାନ ନିଆଯାଇଛି ତାହାକୁ ନେଇ ଟେଲିକମ୍ ସେବା ପ୍ରଦାନକାରୀମାନେ ପ୍ରତି ମାସର ୧ ଏବଂ ୧୬ ତାରିଖରେ ଅପ୍ଡେଟ୍ ଦେବେ ।
