ମାଲକାନଗିରି/କାଲିମେଳା, ୨/୮ : କାଲିମେଳା କନ୍ୟାଶ୍ରମରେ ନବମ ଶ୍ରେଣୀ ଛାତ୍ରୀଙ୍କୁ ଅସଦାଚରଣ। ଏହି ଅଭିଯୋଗ ଜଣେ ଶିକ୍ଷକଙ୍କୁ ଗିରଫ କରାଯାଇଛି। ଗିରଫ ହୋଇଥିବା ଶିକ୍ଷକ ଜଣଙ୍କ ହେଉଛନ୍ତି ଦୀପକ କୁମାର ନାୟକ।
ମାଲକାନଗିରି ଜିଲ୍ଲା କାଲିମେଳା ଥାନାସ୍ଥ କନ୍ୟା ଆଶ୍ରମ ବିଦ୍ୟାଳୟରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି। ଗୁରୁବାର ରାତ୍ରୀ ଭୋଜନ ସମୟରେ ବିଦ୍ୟାଳୟର ଶିକ୍ଷକ ଦୀପକ କୁମାର ନାୟକ ନବମ ଶ୍ରେଣୀରେ ପଢୁଥିବା ଜଣେ ଛାତ୍ରୀଙ୍କୁ ଅସଦାଚରଣ କରିଥିଲେ। ଛାତ୍ରୀ ଜଣକ ଏହି ଘଟଣା ବିଷୟରେ ହଷ୍ଟେଲ ମେଟ୍ରନ ଦିଦିଙ୍କୁ ଜଣାଇଥିଲେ। ପରେ ବିଦ୍ୟାଳୟର ପ୍ରଧାନ ଶିକ୍ଷୟତ୍ରୀଙ୍କୁ ଜଣାଇଥିଲେ ଛାତ୍ରୀ ଜଣକ। ଏହାପରେ ପ୍ରଧାନ ଶିକ୍ଷକ ଜିଲ୍ଲା ମଙ୍ଗଳ ଅଧିକାରୀଙ୍କ ନିର୍ଦ୍ଦେଶ କ୍ରମେ କାଲିମେଳା ଥାନାରେ ଲିଖିତ ଅଭିଯୋଗ କରିଛନ୍ତି ।
ଆଜି ଘଟଣାସ୍ଥଳରେ ଜିଲ୍ଲା ମଙ୍ଗଳ ଅଧିକାରୀ ଶ୍ରୀନିବାସ ଆଚାରି ଓ ପୁଲିସ ପହଁଚି ତଦନ୍ତ ଆରମ୍ଭ କରିଛନ୍ତି। ପରେ ଛାତ୍ରୀଙ୍କ ପରିବାର ଲୋକ ବିଦ୍ୟାଳୟକୁ ଯାଇ ଘଟଣା ବିଷୟରେ ଜାଣିବା ପରେ ଶିକ୍ଷକଙ୍କ ବିରୋଧରେ କାଲିମେଳା ଥାନାରେ ପୁଣି ଲିଖିତ ଅଭିଯୋଗ କରିଥିଲେ। ଏସମ୍ପର୍କରେ କାଲିମେଳା ଥାନା କେସ୍ ନମ୍ବର ୧୭୩୵୨୪ ରେ ମାମଲା ରୁଜୁ କରି ଦଫା ପୋକ୍ସ ଆକ୍ଟ ୧୨, ଡିଏନ୍ଏସ୍ ୭୪,୭୫,୧୧୫,+୨ ଦଫା ଲଗାଇ ଶିକ୍ଷକଙ୍କୁ ଗିରଫ କରିଛି। ଏନେଇ ଅଧିକ ତଦନ୍ତ ଚାଲିଛି ବୋଲି ଥାନା ଅଧିକାରୀ ଚନ୍ଦ୍ରକାନ୍ତ ତାଣ୍ଡି ସୂଚନା ଦେଇଛନ୍ତି।
