ଭୁବନେଶ୍ୱର,୦୧/୦୪: ଯେଉଁ ଅଧିକାରୀ ଗୋଟିଏ ସ୍ଥାନରେ ତିନିବର୍ଷରୁ ଅଧିକ ସମୟ ଥିବେ ୨୦୨୪ ଜାନୁଆରୀ ୩୧ ସୁଦ୍ଧା ସେମାନଙ୍କର ବଦଳି କରିବାକୁ ନିର୍ବାଚନ କମିଶନର କଡ଼ା ନିର୍ଦ୍ଦେଶ ଦେଲେ । କିନ୍ତୁ କିଛି ଅଧିକାରୀ ନିର୍ଦ୍ଦେଶ ପାଳନ ନ କରି କମିଶନଙ୍କୁ ଚକମା ଦେଖାଇ ଦେଲେ । କାଗଜପତ୍ରରେ ଷ୍ଟେସନ୍ ଛାଡିଲେ..., ହେଲେ ଗାଦି ହଟିଲା ନାହିଁ । ଯେଉଁଠି ଥିଲେ ସେଇଛି ଅଛନ୍ତି । ଏବେ ବି ସେମାନେ ଗାଦି ମାଡ଼ି ବସିଛନ୍ତି । ଏଥିରେ ପୁଲିସ୍, ଭୁବନେଶ୍ୱର ମହାନଗର ନିଗମ (ବିଏମ୍ସି), କଟକ ମହାନଗର ନିଗମ (ସିଏମ୍ସି) ଓ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ର ମାଳ ମାଳ ଅଫିସର ଅଛନ୍ତି । କମିଶନଙ୍କ ନିୟମ ଭାଙ୍ଗିବାରେ ପୁଲିସ ଅଧିକାରୀମାନେ ଆଗରେ ରହିଛନ୍ତି ।
ନିର୍ବାଚନ କମିଶନଙ୍କୁ କିପରି ଚକ୍ମା ଦିଆଯାଇଛି ଆସନ୍ତୁ ଜାଣିବା । ବିଡିଏର ଜଣେ ବରିଷ୍ଠ ଅଧିକାରୀଙ୍କ ପ୍ରଥମେ ସିଡିଏକୁ ବଦଳି ହୋଇଥିଲା । ହେଲେ ସେ ଯୋଗଦେଇ ନ ଥିଲେ । କିଛି ବରିଷ୍ଠ ଅଧିକାରୀଙ୍କୁ ଧରି ଓଡ଼ିଶା ଖଣି ନିଗମରେ ଯୋଗଦେଲେ । ହେଲେ ଏବେ ସେଠାରେ ସେ ନ ବସି ବରମୁଣ୍ଡା ବସ୍ଷ୍ଟାଣ୍ଡରେ ଓଏସ୍ଡି ଭାବେ କାର୍ଯ୍ୟ କରୁଛନ୍ତି । ଯାହାକୁ ନେଇ ପ୍ରଶ୍ନ ଉଠିଛି । ଶୁଣାଯାଉଛି ଯେ ନିର୍ବାଚନ ପରେ ସେ ପୁଣି ବିଡିଏକୁ ଫେରିବେ । .
କଟକର କିଛି ପୁଲିସ୍ ଅଧିକାରୀଙ୍କ ମୁଖ୍ୟାଳୟକୁ ବଦଳି ହୋଇଛି । ଭୁବନେଶ୍ୱରର କିଛି ଅଧିକାରୀଙ୍କ ବଦଳି ହୋଇଛି । ହେଲେ ସେମାନେ କମିଶନରେଟ୍ ପୁଲିସ୍ ମୁଖ୍ୟାଳୟ ଛାଡ଼ିବାକୁ ନାରାଜ । ଏହିସବୁ ଅଧିକାରୀଙ୍କ ବିରୋଧରେ ବିଜେପି ନିକଟରେ ନିର୍ବାଚନ କମିଶନରଙ୍କୁ ଫେରାଦ ହୋଇଥିଲା । ଅନ୍ୟ କିଛି ପୁଲିସ ଅଧିକାରୀଙ୍କ ବଦଳି ସ୍ଥାନ ବି ହାସ୍ୟାସ୍ପଦ ଓ ନିର୍ବାଚନ କମିଶନଙ୍କ ନିର୍ଦ୍ଦେଶକୁ ମୋଡ଼ି ଦେବାକୁ ଉଦ୍ଦିଷ୍ଟ । କିଏ ଥାନା ଛାଡ଼ି ୧୦୦ ମିଟର ଦୂରରେ ଥିବା କ୍ରାଇମ୍ବ୍ରାଞ୍ଚ ଅଫିସ ଗଲା ତ ପୁଣି କିଏ ୧ କିମି ଦୂରରେ ଥିବା ସ୍ପେଶାଲ୍ବ୍ରାଞ୍ଚରେ ବସି ପଡ଼ିଲା । ଆଉ କିଛି ଓଏଏସ୍ ଅଧିକାରୀ ତ ତଳ ମହଲାରୁ ଉପର ମହଲାକୁ ବଦଳି ହେଲେ । ଏମାନଙ୍କ ଚେର ପାତାଳକୁ ଲମ୍ବିଛି ଯେ, ସେଥିପାଇଁ ଟୁଇନ୍ ସିଟି ଛାଡି଼ଲେ ଅନ୍ୟ କେଉଁଠି ବଦଳି ହୋଇନାହିଁ । ଆଉ ଯେଉଁମାନେ ଧରାଧରି କରିପାରିଲେ ନାହିଁ ବିଚରା ଭୁବନେଶ୍ୱର ଛାଡି ୧୦୦/୨୦୦ କିଲୋମିଟର ଦୂରକୁ ଗଲେ ।
ରାଜ୍ୟର ବିଭିନ୍ନ ଜିଲ୍ଲାରେ ଥିବା ଅଧିକାରୀଙ୍କ ଯେତେବେଳେ ଭୁବନେଶ୍ୱର-କଟକକୁ ବଦଳି ହୁଏ ପ୍ରଥମେ ସେମାନେ ଆସିବାକୁ ରାଜି ହୁଅନ୍ତି ନାହଁ । ହେଲେ ଏଠାରେ ପହଞ୍ଚିଲା ପରେ ସେମାନଙ୍କ ପାଟିରେ କି ମହୁ ଲାଗେ କେଜାଣି, ଯିବା କଥା କହିଲେ ଯେମିତି ସବୁ ରୋଗ ମାଡ଼ି ବସେ । ଏଠାରୁ ନ ଯିବାକୁ ବିଭିନ୍ନ ବାହାନା ଦେଖାନ୍ତି ।
ଯଦି ଆମେ ପୁଲିସ୍ କଥା ଦେଖିବା, ନିର୍ବାଚନ କମିଶନଙ୍କ ନିୟମ ଅନୁଯାୟୀ କୌଣସି ଅଧିକାରୀ ପୁଲିସ୍ ଜିଲ୍ଲାରେ ୩ ବର୍ଷରୁ ଅଧିକ ସମୟ ଥିବେ କିମ୍ବା ପୂର୍ବ ସାଧାରଣ ନିର୍ବାଚନରେ ସେହି ସ୍ଥାନରେ କାର୍ଯ୍ୟ କରିଥିବେ ତା’ହେଲେ ବଦଳି ବାଧ୍ୟତାମୂଳକ । କିନ୍ତୁ ଭୁବନେଶ୍ୱର-କଟକରେ ରହୁଥିବା ଅଧିକାରୀଙ୍କ ନାମକୁ ମାତ୍ର ବଦଳି ହୁଏ । କାହାକୁ କଟକରୁ ଭୁବନେଶ୍ୱର ତ ଆଉ କାହାକୁ ଭୁବନେଶ୍ୱର ବିଭିନ୍ନ ଅଫିସ୍ ଯେମିତି ସ୍ପେଶାଲ୍ ବ୍ରାଞ୍ଚ, ଏସ୍ଆଇଡବ୍ଲ୍ୟୁ, କ୍ରାଇମ୍ବ୍ରାଞ୍ଚ ଏବଂ ବିପିଏସ୍ପିଏ ଭଳି ସ୍ଥାନକୁ । ନିର୍ବାଚନକୁ ଦୃଷ୍ଟିରେ ରଖି ଏହି ଅଧିକାରୀମାନେ ଧରାଧରି କରି ଏଠି ସେଠି ଗେଞ୍ଜି ହୋଇ ରହିଯାଉଛନ୍ତି । ଯେମିତି ନିର୍ବାଚନ ଗାଇଡ୍ଲାଇନ୍ ସରୁଛି ପୁଣି କମିଶନରେଟ୍ ଫେରିବାକୁ ସମସ୍ତ ଶକ୍ତି ଲଗାଇ ଦେଉଛନ୍ତି । ଏହି ଅଧିକାରୀମାନଙ୍କ ମୂଳ ଲକ୍ଷ୍ୟ ଯାହା ହୋଇଯାଉ ପଛେ ଆମେ କଟକଭୁବନେଶ୍ୱରରେ ହିଁ ରହିବୁ ।
ଏହି ଅଧିକାରୀମାନଙ୍କ ସଂଖ୍ୟା ୫୦ରୁ ଅଧିକ ହେବ । ଗତ ୧୨ ବର୍ଷ ହେବ ଏମାନଙ୍କର କଟକ ଓ ଭୁବନେଶ୍ୱର ଛଡ଼ା ଅନ୍ୟ କେଉଁଠି ବଦଳି ହୋଇନାହିଁ।