କୋଲକାତା: ସନ୍ଦେଶଖାଲି ମାମଲାର ମୁଖ୍ୟ ଅଭିଯୁକ୍ତ ଶେଖ ଶାହାଜାହାଁଙ୍କ ପାଇଁ ଅଡ଼ୁଆ ବଢ଼ିବାରେ ଲାଗିଛି । ଶେଖ ଶାହଜାହାଁଙ୍କୁ ୬ ବର୍ଷ ଲାଗି ଦଳରୁ ନିଳମ୍ବିତ କରିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ସେପଟେ ବିଜେପିକୁ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମା, ବ୍ରଜଭୂଷଣ ଶରଣ ସିଂହ ଏବଂ ଅଜୟ ମିଶ୍ର ଟେନିଙ୍କୁ ଦଳରୁ ବାହାର କରିବା ଲାଗି ତୃଣମୂଳ କଂଗ୍ରେସ (ଟିଏମସି) ଆହ୍ବାନ ଦେଇଛି ।
ଡେରେକ ଓ’ବ୍ରାଏନ୍ ଆଜି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଶେଖ ଶାହାଜାହାଁଙ୍କୁ ଟିଏମସିରୁ ୬ ବର୍ଷ ଯାଏଁ ସସପେଣ୍ଡ କରାଯାଇଛି । ଏମିତି ହେବାର କାରଣ ହେଉଛି ଦୁଇ ପ୍ରକାର ଦଳ ରହିଛି । ଗୋଟିଏ ପାର୍ଟି କେବେଳ କହେ ଏବଂ ଆମେ କାମରେ କରି ଦେଖାଉ ବୋଲି ସେ କହିଛନ୍ତି । ତେବେ ସନ୍ଦେଶଖାଲିର ମହିଳାମାନଙ୍କ ଅଭିଯୋଗ ରହିଛି ଯେ, ଶେଖ ଶାହାଜାହାଁ ଏବଂ ତାର ସାଥିମାନେ ସେମାନଙ୍କୁ ଯୌନ ନିର୍ଯାତନା ଦେଇଥିଲେ । ଏପରିକି ସେମାନେ ଜମି ହଡ଼ପ କରିଛନ୍ତି । ସେପଟେ ଫେରାର ହୋଇଯାଇଥିବା ଶେଖ ଶାହାଜାହାଁଙ୍କୁ ଗୁରୁବାର ଗିରଫ କରାଯାଇଛି ।
ଅନ୍ୟପଟେ ଓ’ବ୍ରାଏନ୍ ବିଜେପିକୁ ଆହ୍ବାନ ଦେଇଛନ୍ତି । ସେ କହିଛନ୍ତି, ‘ଦୁର୍ନୀତି ସମେତ ଅନ୍ୟ କେତେକ ଅପରାଧରେ ସାମିଲ ଥିବା ନେତାମାନଙ୍କୁ ନିଲମ୍ବିତ କରିବା ପାଇଁ ଆମେ ବିଜେପିକୁ ଆହ୍ବାନ ଦେଉଛୁ ।’ ତେବେ ଶାହାଜାହାଁ ସନ୍ଦେଶଖାଲି ବିଧାନସଭା କ୍ଷେତ୍ରରେ ଦଳର ସଂଯୋଜକ ଥିଲେ। ଏହା ସହ ସେ ୨୪ ପ୍ରଗଣା ଜିଲ୍ଲା ପରିଷଦ ସଦସ୍ୟ ମଧ୍ୟ ଥିଲେ । ଟିଏମସିର ୫୩ ବର୍ଷୀୟ ବାହୁବଳୀ ନେତା ଶାହାଜାହାଁଙ୍କୁ ଦୀର୍ଘ ୫୫ ଦିନ ପରେ ଗିରଫ କରାଯାଇଛି । କୋର୍ଟ ତାଙ୍କୁ ୧୦ ଦିନିଆ ରିମାଣ୍ଡରେ ପଠାଇଛନ୍ତି ।