ପୁରୀ,୨୩/୦୮: ଶ୍ରୀମନ୍ଦିର ରତ୍ନଭଣ୍ଡାର ଶୁକ୍ରବାର ପୁଣି ଖୋଲିବ । ବାହାର ଏବଂ ଭିତର ରତ୍ନଭଣ୍ଡାରର ସମସ୍ତ ଖାଲି ଆଲମିରା ଏବଂ ସିନ୍ଦୁକଗୁଡ଼ିକୁ ସ୍ଥାନାନ୍ତର କରାଯିବ । ଶ୍ରୀମନ୍ଦିର ପରିସର ନୀଳାଦ୍ରି ବିହାର ମ୍ୟୁଜିୟମ୍ ନିକଟସ୍ଥ ଏକ ଗୃହରେ ଏହାକୁ ସୁରକ୍ଷିତ ରଖାଯିବ । ରାଜ୍ୟ ସରକାରଙ୍କ ଅନୁମୋଦିତ ମାର୍ଗଦର୍ଶିକା ଅନୁସାରେ ଏହି ସ୍ଥାନାନ୍ତରଣ ପ୍ରକ୍ରିୟା ଅନୁଷ୍ଠିତ ହେବ । ଦିନ ୧ଟାଠାରୁ ସ୍ଥାନାନ୍ତର ଆରମ୍ଭ ହେବ । ଏହା ଶେଷ ପର୍ଯ୍ୟନ୍ତ ସର୍ବସାଧାରଣଙ୍କ ଠାକୁର ଦର୍ଶନ ବନ୍ଦ ରହିବ । ସଅଳ ନୀତିକାନ୍ତି ନିମନ୍ତେ ରାତି ଶ୍ରୀମନ୍ଦିର ଦ୍ୱାର ଫିଟା ଯିବ । ମଙ୍ଗଳ ଆଳତି, ଅବକାଶ ପ୍ରଭୃତି ନୀତି ବଢ଼ିବ । ମହାପ୍ରସାଦ କ୍ରୟ କରିବାକୁ ଇଚ୍ଛୁକ ଭକ୍ତ ସିଂହଦ୍ୱାର ବାଟେ ବାଇଶି ପାହାଚ ହୋଇ ଆନନ୍ଦ ବଜାରକୁ ଯାଇପାରିବେ । ମହାପ୍ରସାଦ କ୍ରୟ କରି ଉତ୍ତର ଦ୍ୱାର ପଟେ ପ୍ରସ୍ଥାନ କରିବେ ।
ଗତ ଜୁଲାଇ ୧୪ ଓ ୧୮ ତାରିଖ ଯଥାକ୍ରମେ ବାହାର ଓ ଭିତର ରତ୍ନଭଣ୍ଡାରରୁ ଅଳଙ୍କାର ଏବଂ ମୂଲ୍ୟବାନ ସାମଗ୍ରୀ ସ୍ଥାନାନ୍ତର ହୋଇଥିଲା। ଏହା ଅସ୍ଥାୟୀ ଷ୍ଟ୍ରଙ୍ଗରୁମ୍ରେ ରହିଛି । ପୁରୁଣା ସିନ୍ଦୁକ, ଆଲମିରା ଓ ବାକ୍ସରୁ ରତ୍ନଅଳଙ୍କାର ବାହାର କରାଯାଇ ନୂଆ ସିନ୍ଦୁକ, ଆଲମିରା ଓ ବାକ୍ସରେ ରଖାଯାଇଛି । ଏହି ପୁରୁଣା ସିନ୍ଦୁକ, ଆଲମିରା ଓ ବାକ୍ସକୁ ସ୍ଥାନାନ୍ତର କରାଯିବ । ଏହାର ଭିଡିଓ ରେକର୍ଡିଂ କରାଯିବ । ରତ୍ନଭଣ୍ଡାର ମରାମତି ଲାଗି ଏଏସ୍ଆଇକୁ ଯାଞ୍ଚ ନିମନ୍ତେ ଦେବାକୁ ଏଭଳି ପଦକ୍ଷେପ ନିଆଯାଉଛି।
