ପ୍ୟାରିସ୍ – ପ୍ୟାରିସ୍ ଅଲିମ୍ପିକ ୨୦୨୪ରେ ଭିନେଶ ଫୋଗାଟଙ୍କ ମାମଲାରେ ଶୁଣାଣି ୯ ଅଗଷ୍ଟ ( ଶୁକ୍ରବାର)ରେ ଶେଷ ହୋଇଥିଲା। ଏବେ ଏହି ମାମଲାରେ ରାୟକୁ ପୂରା ଦେଶ ଅପେକ୍ଷା କରିଛି। ପ୍ରଥମେ ୧୦ ଅଗଷ୍ଟରେ (ଶନିବାର ) ରାୟ ଆସିବାର ଆଶା ଥିଲା, ହେଲେ ଏବେ ରାୟର ଟାଇମଲାଇନ୍କୁ ବଢାଇ ଦିଆଯାଇଛି। ଏବେ ଭିନେଶଙ୍କୁ ରୌପ୍ୟ ମିଳିବା ନା ନାହିଁ , ଏହା ଉପରେ ରାୟ ୧୧ ଅଗଷ୍ଟ ଅର୍ଥାତ୍ ଆସନ୍ତା ରବିବାର ଭାରତୀୟ ସମୟାନୁସାରେ ୯.୩୦ରେ ଆସିବ। ହେଲେ ଏହି ନିଷ୍ପତ୍ତିର ଡିଟେଲ ଅର୍ଡର ପରେ ଜାରି କରାଯିବ।
ଡ. ଏନାବେଲେ ବେନେଟ ଏସି ଏସସି ଉକ୍ତ ମାମଲାରେ ରାୟ ଶୁଣାଇବେ। କହି ରଖୁଛୁ କି ପ୍ରଥମେ ସିଏଏସ ( କୋର୍ଟ ଅଫ୍ ଅର୍ବିଟ୍ରାସନ ଫର ସ୍ପୋର୍ଟସ) ନିଜର ରାୟ ଶୁଣାଇବା ପାଇଁ ୧୦ ଅଗଷ୍ଟ ଭାରତୀୟ ସମୟାନୁସାରେ ରାତି ୯.୩୦ ର ସମୟ ରଖିଥିଲେ। ସାଧାରଣତଃ ଆଡ୍-ହକ୍ ପ୍ୟାନେଲ୍କୁ ରାୟ ଶୁଣାଇବା ପାଇଁ ୨୪ ଘଣ୍ଟାର ସମୟ ଦିଆଯାଇ ଥାଏ। କିନ୍ତୁ ଏବେ ରାୟର ତାରିଖ ପୁଣି ଆଗକୁ ବଢାଇ ଦିଆଯାଇଛି।
ଉଲ୍ଲେଖନୀୟ ଯେ,ପ୍ୟାରିସ୍ ଅଲିମ୍ପିକରେ ଭାରତର ଆଶାକୁ ସେତେବେଳେ ଝଟକା ଲାଗିଲା , ଯେବେ ଭିନେଶ ଫୋଗାଟଙ୍କୁ ଅଯୋଗ୍ୟ ଘୋଷିତ କରାଯାଇ ଥିଲା। ୫୦ କି.ଗ୍ରା ଫ୍ରିଷ୍ଟାଇଲ୍ ରେସଲିଂ କ୍ୟାଟେଗୋରୀରେ ତାଙ୍କର ଓଜନ ପାଖାପାଖି ୧୦୦ ଗ୍ରାମ ଅଧିକ ଥିବାର ଜଣାପଡ଼ି ଥିଲା। ଭିନେଶଙ୍କ ପାଖରେ ଗୋଲ୍ଡ ମେଡାଲ ଜିତିବାର ସୁଯୋଗ ଥିଲା , କିନ୍ତୁ ଓଜନ ଅଧିକ ହେବା କାରଣରୁ ଫାଇନାଲ ମୁକାବିଲାର କିଛି ଘଣ୍ଟା ପୂର୍ବରୁ ହିଁ ତାଙ୍କୁ ଅଯୋଗ୍ୟ କରିଦିଆ ଯାଇଛି। ଏମିତି ନିୟମ କାରଣରୁ ସେ ସେମିଫାଇନାଲ ଜିତିବା ପରେ ମଧ୍ୟ ମେଡାଲରୁ ଦୂରରେ ରହିଛନ୍ତି।
