ନୂଆଦିଲ୍ଲୀ,୧୯।୮: କୋଲକାତା ଆରଜି କର ମେଡିକାଲ କଲେଜରେ ଦୁଷ୍କର୍ମ ମାମଲାର ତଦନ୍ତ ଜାରି ରହିଛି। ଏହା ମଧ୍ୟରେ ଅଟୋପ୍ସି (ବ୍ୟବଚ୍ଛେଦ) ରିପୋର୍ଟରୁ ବହୁ ଚାଞ୍ଚଲ୍ୟକର କଥା ଖୁଲାସା ହୋଇଛି। ଏଥିରେ କୁହାଯାଇଛି ଯେ, ଟ୍ରେନି ଡାକ୍ତରଙ୍କ ଗୁପ୍ତାଙ୍ଗ ସହ ଶରୀରର ବହୁ ସ୍ଥାନରୁ ଗଭୀର କ୍ଷତ ଚିହ୍ନ ଦେଖିବାକୁ ମିଳିଛି।। ଘଟଣାକୁ ନେଇ ସାରା ଦେଶରେ ଡାକ୍ତରଙ୍କ ବିରୋଧ ପ୍ରଦର୍ଶନ ଜାରି ରହିଛି। 

ଇଣ୍ଡିଆ  ଟୁଡେ ରିପୋର୍ଟ ଅନୁସାରେ, ପଅଟୋପ୍ସି ରିପୋର୍ଟରେ ଯୌନ ହିଂସା ଭଳି ବହୁ ପ୍ରମାଣ ମିଳିଛି। ଏହା ଅନୁସାରେ, ପୀଡିତାଙ୍କ ମୁଣ୍ଡ, ମୁହଁ, ବେକ, ହାତ ଓ ଗୁପ୍ତାଙ୍ଗ ଭଳି ୧୪ଟି ସ୍ଥାନରେ ଆଘାତ ଦେଖିବାକୁ ମିଳିଛି। ଏହା ସହ ତାଙ୍କୁ ତଣ୍ଟି ଚିପି ହତ୍ୟା କରାଯାଇଥିବା କଥା ରିପୋର୍ଟରେ ସ୍ପଷ୍ଟ ଭାବରେ ଉଲ୍ଲେଖ ରହିଛି। କେବଳ ସେତିକି ନୁହେଁ ପୀଡିତାଙ୍କ ହତ୍ୟା ପୂର୍ବରୁ ଯୌନ ଉତ୍ପୀଡନ କରାଯାଇଥିବା କଥା ମଧ୍ୟ ରିପୋର୍ଟରେ ଖୁଲାସା ହୋଇଛି।

ଏହି ରିପୋର୍ଟରେ ଫୁସଫୁସରେ ରକ୍ତସ୍ରାବ ଏବଂ ଶରୀରରେ ରକ୍ତ ଜମାଟ ବାନ୍ଧିବା ବିଷୟରେ ମଧ୍ୟ ଉଲ୍ଲେଖ କରାଯାଇଛି। ଅଧିକ ତଦନ୍ତ ପାଇଁ ରକ୍ତ ଏବଂ ଅନ୍ୟାନ୍ୟ ଶାରୀରିକ ତରଳ ପଦାର୍ଥର ନମୁନା ପଠାଯାଇଛି। ରିପୋର୍ଟରେ କୁହାଯାଇଛି ଯେ ପୀଡିତାଙ୍କ ଶରୀର ଏବଂ ପ୍ରାଇଭେଟ୍‌ ପାର୍ଟରେ ଥିବା ସମସ୍ତ ଆଘାତ ତାଙ୍କ ମୃତ୍ୟୁ ପୂର୍ବର।ଅଟୋସ୍ପି ରିପୋର୍ଟକୁ ଭିତ୍ତି କରି ମେଡିକାଲ ଅଧିକାରୀ କହିଛନ୍ତି ଯେ ଦୁଇ ହାତରେ ତଣ୍ଟି ଚିପିବା ଯୋଗୁ ପୀଡିତାଙ୍କ ମୃତ୍ୟୁ ହୋଇଛି।