ଲକ୍ଷ୍ନୌ: ସଂସ୍କୃତ ଭାଷାକୁ ପ୍ରୋତ୍ସାହନ ଦେବାକୁ ଉତ୍ତର ପ୍ରଦେଶର ଯୋଗୀ ଆଦିତ୍ୟନାଥ ସରକାର ବଡ଼ ଘୋଷଣା କରିଛନ୍ତି । ସଂସ୍କୃତ ବିଦ୍ୟାର୍ଥୀଙ୍କ ଛାତ୍ରବୃତ୍ତି ବଢ଼ାଇଛନ୍ତି ରାଜ୍ୟ ସରକାର ।ଦୀର୍ଘ ୨୪ ବର୍ଷ ପରେ ସଂସ୍କୃତ ବିଦ୍ୟାଳୟ ଏବଂ ମହାବିଦ୍ୟାଳର ଛାତ୍ରଛାତ୍ରୀଙ୍କ ଛାତ୍ରବୃତ୍ତି ବଢ଼ାଇବାକୁ ନିଷ୍ପତ୍ତି ନେଇଛି ରାଜ୍ୟ କ୍ୟାବିନେଟ । ରାଜ୍ୟରେ ଷଷ୍ଠ ଓ ସପ୍ତମ ଶ୍ରେଣୀର ଛାତ୍ରଛାତ୍ରୀଙ୍କ ଲାଗି ୫୦ ଟଙ୍କା ଏବଂ ଅଷ୍ଟମ ଶ୍ରେଣୀର ଛାତ୍ରାଛାତ୍ରୀଙ୍କୁ ପ୍ରତ୍ୟେକ ମାସ ୭୫ ଟଙ୍କା ଛାତ୍ରବୃତ୍ତି ମିଳିବ । 

ସେହିଭଳି ନବମ ଓ ଦଶମ ଶ୍ରେଣୀ ଲାଗି ୧୦୦ ଟଙ୍କା ଛାତ୍ରବୃତ୍ତି ଧାର୍ଯ୍ୟ ହୋଇଥିବା ବେଳେ ଏକାଦଶ ଓ ଦ୍ବାଦଶ ଶ୍ରେଣୀର ଛାତ୍ରଛାତ୍ରୀଙ୍କ ଲାଗି ୧୫୦ ଟଙ୍କା ଲେଖାଏଁ ଛାତ୍ରବୃତ୍ତି ଘୋଷଣା କରାଯାଇଛି । ଗ୍ରାଜୁଏସନ ଛାତ୍ରଛାତ୍ରୀଙ୍କୁ ଛାତ୍ରବୃତ୍ତି ବାବଦରେ ପ୍ରତିମାସ ୨୫୦ ଟଙ୍କା ଲେଖାଏଁ ଦେବେ ସରକାର । 

ଦୁନିଆର ସବୁଠାରୁ ପ୍ରାଚୀନ ଭାଷା ମଧ୍ୟରୁ ଅନ୍ୟତମ ସଂସ୍କୃତ ଭାଷାକୁ ପ୍ରୋତ୍ସାହିତ କରିବା ଲାଗି ଉତ୍ତର ପ୍ରଦେଶ କ୍ୟାବିନେଟ୍‌ ବଡ଼ ପଦକ୍ଷେପ ଗ୍ରହଣ କରିଛି । ଆଜି (ମଙ୍ଗଳବାର) ଲୋକ ଭବନରେ ଆୟୋଜିତ କ୍ୟାବିନେଟ ବୈଠକ ହୋଇଥିଲା । ଏହି ବୈଠକ ପ୍ରାୟ ଏକ ଘଣ୍ଟା ଧରି ଚାଲିଥିଲା । ସଂସ୍କୃତ ସବୁ ଭାଷାର ଜନନୀ ହୋଇଥିବାରୁ ତେଣୁ ଏହି ଭାଷା ଉପରେ ସରକାର ବିଶେଷ ଗୁରୁତ୍ବ ଦେଉଛନ୍ତି ବୋଲି ବୈଠକରେ ପରେ ସୂଚନା ଦିଆଯାଇଛି । 

ଆଜିର ଏହି ବୈଠକରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ଦୁଇ ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଏବଂ ବ୍ରଜେଶ ପାଠକ ଉପସ୍ଥିତ ଥିଲେ । ଏହା ସହ ସମସ୍ତ କ୍ୟାବିନେଟ୍‌ ମନ୍ତ୍ରୀ ଉପସ୍ଥିତ ଥିଲେ । ଏହି ବୈଠକରେ ୧୩ଟି ପ୍ରସ୍ତାବକୁ ମଞ୍ଜୁରୀ ମିଳିଛି ।ଏହା ବ୍ୟତୀତ ୧୪ଟି ପ୍ରସ୍ତାବ ଆଗତ ହୋଇଥିଲା ।